ਚੰਡੀਗੜ੍ਹ, 23 ਜਨਵਰੀ, Gee98 News service
-ਔਰਤ ਨੂੰ ਨੌਕਰੀ ਜਾਂ ਕਿਸੇ ਕੰਮ ਦੇ ਮਾਮਲੇ ਵਿੱਚ ਜੇਕਰ ਘਰ ਤੋਂ ਬਾਹਰ ਨਾ ਜਾਣ ਦਿੱਤਾ ਜਾਵੇ ਤਾਂ ਇਸ ਨੂੰ ਜ਼ਿੰਦਗੀ ਜਿਉਣ ਦੇ ਹੱਕਾਂ ‘ਤੇ ਡਾਕਾ ਜਾਂ ਆਜ਼ਾਦੀ ‘ਤੇ ਪਾਬੰਦੀ ਕਿਹਾ ਜਾਂਦਾ ਹੈ ਪ੍ਰੰਤੂ ਪਤੀ ਜਾਂ ਪਰਿਵਾਰ ਦੀ ਸਹਿਮਤੀ ਨਾਲ ਨੌਕਰੀ ਜਾਂ ਕੰਮ ਦੇ ਮਾਮਲੇ ‘ਚ ਬਾਹਰ ਜਾਣ ਵਾਲੀ ਔਰਤ ਜੇਕਰ ਪਤੀ ਜਾਂ ਪਰਿਵਾਰ ਦੇ ਭਰੋਸੇ ਨੂੰ ਲੱਤ ਮਾਰ ਦੇਵੇ ਤਾਂ ਅਜਿਹੀ ਸਥਿਤੀ ਵਿੱਚ ਕਿਸ ਨੂੰ ਕਸੂਰਵਾਰ ਮੰਨਿਆ ਜਾਵੇ। ਅਜਿਹੇ ਮਾਮਲੇ ਅਕਸਰ ਸਾਹਮਣੇ ਆਉਂਦੇ ਰਹਿੰਦੇ ਹਨ, ਜਿੱਥੇ ਸ਼ਾਦੀਸ਼ੁਦਾ ਔਰਤਾਂ ਆਪਣੇ ਪਤੀ ਅਤੇ ਬੱਚਿਆਂ ਨੂੰ ਛੱਡ ਕੇ ਕਿਸੇ ਹੋਰ ਮਰਦ ਨਾਲ ਫਰਾਰ ਹੋ ਜਾਂਦੀਆਂ ਹਨ ਅਤੇ ਫਿਰ ਲਿਵ ਇਨ ਰਿਲੇਸ਼ਨਸ਼ਿਪ ਦੀ ਕਹਾਣੀ ਸ਼ੁਰੂ ਹੋ ਜਾਂਦੀ ਹੈ। ਅਜਿਹੀ ਸਥਿਤੀ ਵਿੱਚ ਕਾਨੂੰਨ ਦੀ ਲਚਕ ਦਾ ਵੀ ਖ਼ੂਬ ਫਾਇਦਾ ਉਠਾਇਆ ਜਾਂਦਾ ਹੈ। ਅਜਿਹੀ ਇਹ ਇੱਕ ਤਾਜ਼ਾ ਘਟਨਾ ਗੁਰਦਾਸਪੁਰ ਜ਼ਿਲ੍ਹੇ ਵਿੱਚ ਵਾਪਰੀ ਜਿੱਥੇ ਗੁਰਦਾਸਪੁਰ ਦੇ ਇੱਕ ਨੇੜਲੇ ਪਿੰਡ ਦੀ ਦੋ ਬੱਚਿਆਂ ਦੀ ਮਾਂ ਇੱਕ ਔਰਤ ਸ਼ਹਿਰ ਵਿੱਚ ਟੈਟੂ ਬਣਾਉਣ ਦਾ ਕੰਮ ਸਿੱਖ ਰਹੀ ਸੀ। ਇਹ ਔਰਤ ਰੋਜ਼ਾਨਾ ਘਰ ਤੋਂ ਸ਼ਹਿਰ ਟੈਟੂ ਬਣਾਉਣ ਦਾ ਕੰਮ ਸਿਖਾਉਣ ਵਾਲੇ ਦੀ ਦੁਕਾਨ ‘ਤੇ ਜਾਂਦੀ ਸੀ ਪ੍ਰੰਤੂ ਕੁਝ ਸਮੇਂ ਬਾਅਦ ਹੀ ਇਹ ਔਰਤ ਟੈਟੂ ਬਣਾਉਣ ਦਾ ਕੰਮ ਸਿਖਾਉਣ ਵਾਲੇ ਵਿਅਕਤੀ ਨਾਲ ਹੀ ਫਰਾਰ ਹੋ ਗਈ। ਜਿਸ ਤੋਂ ਬਾਅਦ ਉਸਦੇ ਪਤੀ ਨੇ ਥਾਣਾ ਸਿਟੀ ਵਿਖੇ ਉਕਤ ਟੈਟੂ ਬਣਾਉਣ ਵਾਲੇ ਦੇ ਖ਼ਿਲਾਫ਼ ਸ਼ਿਕਾਇਤ ਦਰਜ ਕਰਵਾਈ ਕਿ ਟੈਟੂਆਂ ਵਾਲਾ ਉਸ ਦੀ ਪਤਨੀ ਨੂੰ ਲੈ ਕੇ ਫਰਾਰ ਹੋ ਗਿਆ ਹੈ। ਥਾਣਾ ਸਿਟੀ ਦੇ ਐਸਐਚਓ ਗੁਰਮੀਤ ਸਿੰਘ ਨੇ ਦੱਸਿਆ ਕਿ ਇੱਕ ਵਿਅਕਤੀ ਨੇ ਲਿਖਤੀ ਦਰਖਾਸਤ ਦਿੱਤੀ ਹੈ ਕਿ ਕੋਈ ਨੌਜਵਾਨ ਉਸ ਦੀ ਪਤਨੀ, ਜੋ ਦੋ ਬੱਚਿਆਂ ਦੀ ਮਾਂ ਹੈ, ਨੂੰ ਲੈ ਗਿਆ ਹੈ। ਐਸ ਐਚ ਓ ਦਾ ਕਹਿਣਾ ਹੈ ਕਿ ਮਾਮਲੇ ਦੀ ਪੜ੍ਹਤਾਲ ਕੀਤੀ ਜਾ ਰਹੀ ਹੈ, ਜਲਦੀ ਹੀ ਔਰਤ ਨੂੰ ਲੱਭ ਕੇ ਸਾਹਮਣੇ ਲਿਆਂਦਾ ਜਾਵੇਗਾ ਤੇ ਉਸ ਦੇ ਬਿਆਨਾਂ ਅਨੁਸਾਰ ਅਗਲੇਰੀ ਕਾਰਵਾਈ ਕੀਤੀ ਜਾਵੇਗੀ। ਦੱਸ ਦੇਈਏ ਕਿ ਦੋਵੇਂ ਬੱਚੇ ਨਾਬਾਲਿਗ ਹਨ ਜਿਨਾਂ ਦੀਆਂ ਅੱਖਾਂ ਆਪਣੀ ਮਾਂ ਨੂੰ ਉਡੀਕ ਰਹੀਆਂ ਹਨ ਪਰ ਮਾਂ….!
