*** ਬੱਸਾਂ ਦੀਆਂ ਬਾਡੀਆਂ..ਮਾਰੂਥਲ ਦਾ ਹੇਜ਼…!
**ਕੁਝ ਦਿਨਾਂ ਤੱਕ ਪੰਜਾਬ ਦੀਆਂ ਸੜਕਾਂ ‘ਤੇ ਨਵੀਆਂ ਸਰਕਾਰੀ (PRTC) ਲਾਰੀਆਂ ਦੌੜਨਗੀਆਂ…ਨਵੇਂ ਨਵੇਂ ਸ਼ੀਸ਼ਿਆਂ ਦੀ ਤਿੱਖੀ ਲਿਸ਼ਕੋਰ, ਦਮਦਾਰ ਬਾਡੀ…ਹੁਣ ਸਰਕਾਰੀ ਲਾਰੀਆਂ ਦੇ ਉਹ ਵੇਲੇ ਲੱਥਗੇ ਜਦੋਂ ਕਿਹਾ ਜਾਂਦਾ ਸੀ ਕਿ “ਆਗੀ ਰੋਡਵੇਜ਼ ਦੀ ਲਾਰੀ, ਨਾ ਕੋਈ ਸ਼ੀਸ਼ਾ ਨਾ ਕੋਈ ਬਾਰੀ…ਹੁਣ ਵਰਗੀਆਂ ਬਾਰੀਆਂ ਕਿੱਥੇ…ਤੇ ਰੋਡਵੇਜ਼ ਦੀਆਂ ਲਾਰੀਆਂ ਕਿੱਥੇ…ਨਾਲੇ ਇਹ ਕਿਹੜਾ ਸਾਡੇ ਪੰਜਾਬ ਦਾ ਲੋਹਾ…ਇਹ ਤਾਂ ਭਾਈ ਰਾਜਸਥਾਨ ਦਾ ਲੋਹਾ…ਪੀਆਰਟੀਸੀ ਦੀਆਂ ਲਾਰੀਆਂ ਮਾਰੂਥਲ ‘ਚੋਂ ਜਹਾਜ਼ ਬਣ ਕੇ ਆਈਆਂ ਨੇ…ਇਹ ਨਵੀਆਂ PRTC ਦੀਆਂ ਲਾਰੀਆਂ ਰਾਜਸਥਾਨ ਦੇ ਸੀਕਰ ਤੋਂ ਤਿਆਰ ਹੋ ਕੇ ਆਈਆਂ ਨੇ…ਇਹਨਾਂ ਦੇ ਸਾਰੇ ਲੀੜੇ ਕੱਪੜੇ…ਚਲੋ ਲੀੜੇ ਕੱਪੜਿਆਂ ਨੂੰ ਛੱਡੋ…ਆਪਾਂ ਇਹ ਆਖ ਦਿੰਨੇ ਆਂ ਕਿ ਇਹ ਪੂਰੇ ਦੀਆਂ ਪੂਰੀਆਂ ਰਾਜਸਥਾਨ ਤੋਂ ਤਿਆਰ ਹੋ ਕੇ ਆਈਆਂ ਨੇ…ਚੰਗੀ ਗੱਲ ਏਂ ਕਿ ਸਾਡੇ ਮੁੱਖ ਮੰਤਰੀ ਸਾਹਿਬ ਨੂੰ ਵੀ ਮਾਰੂਥਲ ਦਾ ਪ੍ਰੇਮ ਜਾਗਿਆ…ਸਾਰਾ ਭਾਰਤ ਇੱਕੋ ਹੀ ਹੈ…ਉੱਪਰ ਵਾਲੀ ਸਰਕਾਰ ਤਾਂ ਪਹਿਲਾਂ ਹੀ ਕਹਿ ਰਹੀ ਹੈ ਕਿ ਇੱਕੋ ਭਾਰਤ..ਇੱਕੋ ਹੀ ਸਾਰਾ ਕੁਝ.. ਪਰ ਅਸੀਂ ਨਹੀਂ ਸੀ ਮੰਨਦੇ..ਚਲੋ ਹੁਣ ਸਾਡੇ ਮੁੱਖ ਮੰਤਰੀ ਜੀ ਤਾਂ ਮੰਨੇ, ਕੀ ਹੋਇਆ ਜੇ ਪੰਜਾਬ ਦਾ ਕੁਝ ਸਰਮਾਇਆ ਰਾਜਸਥਾਨ ਚਲਿਆ ਗਿਆ..ਅਜੇ ਥੋੜਾ ਸਮਾਂ ਹੋਇਆ ਮੁੱਖ ਮੰਤਰੀ ਨੇ ਮਾਰੂਥਲ ਨੂੰ ਪਾਣੀ ਪੀ ਪੀ ਕੋਸਿਆ ਸੀ… ਉਦੋਂ ਜਦੋਂ ਰਾਜੇ ਵੜਿੰਗ ਨੇ ਸਰਕਾਰੀ ਬੱਸਾਂ ਦੀਆਂ ਬਾਡੀਆਂ ਰਾਜਸਥਾਨ ਤੋਂ ਲਗਵਾਈਆਂ ਸਨ… ਹਾਏ ਸਾਡਾ ਪੈਸਾ, ਹਾਏ ਸਾਡਾ ਪੰਜਾਬ ਦਾ ਸਰਮਾਇਆ..ਰਾਜਸਥਾਨ ਕਿਉਂ ਲਗਾਇਆ…ਅਖੇ ਰਾਜੇ ਨੇ ਕਮਿਸ਼ਨ ਕਮਾਇਆ…ਇਹ ਭਗਵੰਤ ਮਾਨ ਦੀ ਬੋਲੀ ਸੀ,ਪੰਜਾਬ ਦਾ ਰੁਜ਼ਗਾਰ ਰਾਜਸਥਾਨ ਨੂੰ ਦਿੱਤਾ…ਪੰਜਾਬ ‘ਚ ਕਿਉਂ ਨਹੀਂ ਲਗਵਾਈਆਂ ਬਾਡੀਆਂ… ਕਿਸੇ ਨੂੰ ਪਾਣੀ ਪੀ ਪੀ ਕੋਸਣਾ ਤਾਂ ਸਿਰੇ ਦਾ ਭੰਡੀ ਪ੍ਰਚਾਰ ਹੁੰਦੈ ਪਰ ਭਗਵੰਤ ਮਾਨ ਨੇ ਰਾਜੇ ਵੜਿੰਗ ਨੂੰ ਕੋਸਦੇ ਹੋਏ ਪਾਣੀ ਵੀ ਨਹੀਂ ਪੀਤਾ…ਤੇ ਹੁਣ ਰੱਬ ਜਾਣੇ ਕਿ ਰਾਜਸਥਾਨ ਦੀ ਊਠਣੀ ਦਾ ਦੁੱਧ ਕਿਵੇਂ ਸਵਾਦ ਲੱਗਿਆ…ਉਹੀ ਪੀਆਰਟੀਸੀ ਦੀਆਂ ਬੱਸਾਂ ਨੇ..ਉਥੋਂ ਹੀ ਬਾਡੀਆਂ ਲੱਗੀਆਂ ਜਿੱਥੋਂ ਵੜਿੰਗ ਨੇ ਲਗਵਾਈਆਂ…ਹੁਣ ਤੁਸੀਂ ਇਹ ਨਾ ਸੋਚੋ ਕਿ ਰਾਜੇ ਵੜਿੰਗ ਦੀ ਬੱਸਾਂ ਦੀ ਬਾਡੀਆਂ ਵਾਲੀ ਫਾਈਲ ਪੀਆਰਟੀਸੀ ਦੇ ਕਿਸੇ ਡੀਪੂ ਦੇ ਇੱਕ ਕੋਨੇ ‘ਚ ਖੜੀ ਪੀਆਰਟੀਸੀ ਦੀ ਪੁਰਾਣੀ ਬੱਸ ਵਿੱਚ ਰੱਖ ਦਿੱਤੀਆਂ ਜਾਣਗੀਆਂ… ਇੱਥੇ ਤਾਂ ਜੰਗਾਲ ਲੋਹੇ ਨੂੰ ਵੀ ਖਾ ਜਾਂਦੀ ਹੈ ਤੇ ਫਿਰ ਕਾਗਜ਼ ਕੀਹਦੇ ਵਿਚਾਰੇ.. ਹੁਣ ਉਧਰੋਂ ਕੋਈ ਉੱਠ ਕੇ ਇਹ ਨਾ ਆਖ ਦੇਵੇ ਕਿ ਰਾਜਸਥਾਨ ਤੋਂ ਬਾਡੀਆਂ ਲਗਵਾ ਕੇ “ਇਹਨਾਂ” ਨੇ ਵੀ ਕਮਿਸ਼ਨ ਖਾਧਾ.. ਨਾ ਭਾਈ ਨਾ.. ਇਹ ਨਹੀਂ ਆਖਣਾ…ਸਾਡੀਆਂ ਤਾਂ ਰਗਾਂ ਵਿੱਚ ਇਮਾਨਦਾਰੀ ਰੰਗ ਬਿਰੰਗੀਆਂ ਕਿਰਲੀਆਂ ਵਾਂਗ ਦੌੜ ਰਹੀ ਆਂ… ਰੰਗ ਬਿਰੰਗੀਆਂ ਤਿਤਲੀਆਂ ਤਾਂ ਸੁਣੀਆਂ ਨੇ ਇਹ ਰੰਗ ਬਰੰਗੀਆਂ ਕਿਰਲੀਆਂ ਕਿੱਥੋਂ…ਹੁਣ ਰੰਗ ਬਿਰੰਗੀਆਂ ਕਿਰਲੀਆਂ ਬਾਰੇ ਨਾ ਪੁੱਛਿਓ…ਜੇ ਨਹੀਂ ਪਤਾ ਤਾਂ ਰਾਜੇ ਵੇਲੇ ਦੀਆਂ ਬੱਸਾਂ ਅਤੇ ਹੁਣ ਨਵੀਆਂ ਰਾਜਸਥਾਨ ਤੋਂ ਬਣ ਕੇ ਆਈਆਂ ਬੱਸਾਂ ਨੂੰ ਬਰਾਬਰ ਖੜਾ ਕੇ ਵੇਖ ਲਿਓ…ਕਿਆ ਬਾਤਾਂ ਨੇ…ਇਹ ਰੰਗ ਬਰੰਗੀਆਂ ਲਾਰੀਆਂ…ਸੀਕਰ ਤੋਂ ਤਿਆਰ ਹੋ ਕੇ ਆਈਆਂ ਨੇ…ਹੱਥ ਫੇਰ ਕੇ ਦੇਖੋ ਕੂਲੀਆਂ ਕੂਲੀਆਂ ਨੇ…ਤੁਸੀਂ ਕਮਿਸ਼ਨ ਤੋਂ ਕੀ ਲੈਣਾ ਤੁਸੀਂ ਨਵੀਆਂ ਲਾਰੀਆਂ ‘ਚ ਝੂਟੇ ਲਵੋ ਆਨੰਦ ਲਵੋ… ਨਾਲੇ ਖਾਣ ਵਾਲੀਆਂ ਚੀਜ਼ਾਂ ਖਾਧੀਆਂ ਹੀ ਜਾਂਦੀਆਂ ਹੁੰਦੀਆਂ ਨੇ…ਹੋਰ ਅਸੀਂ ਇਹ ਮਾਰੂਥਲ ਦੇ ਰੇਤੇ ‘ਚ ਥੋੜਾ ਰੋਲਣੀਆਂ ਨੇ…ਨਾਲੇ ਤਿਤਲੀਆਂ ਕਮਿਸ਼ਨ ਨਹੀਂ ਖਾਂਦੀਆਂ…ਪਰ ਕਿਰਲੀਆਂ ਤਾਂ ਮੱਛਰ ਵੀ ਨਹੀਂ ਛੱਡਦੀਆਂ…ਉਹ ਵੀ ਮਾਰੂਥਲ ਦਾ ਮੱਛਰ…ਪੰਜਾਬ ਦੀ ਗੰਦਗੀ ਨਾਲੋਂ ਤਾਂ ਚੰਗਾ ਪਲਿਆ ਹੋਵੇਗਾ…ਚਲੋ ਆਪਾਂ ਕੀ ਲੈਣਾ… ਇਹ ਤਾਂ ਮਾਰੂਥਲ ਦਾ ਹੇਜ਼ ਆਂ..ਜਾਗ ਉੱਠਿਆ, ਤਾਂ ਕੋਈ ਕੀ ਕਰੇ…ਤੁਸੀਂ ਪੀਆਰਟੀਸੀ ਦੀਆਂ ਨਵੀਆਂ ਲਾਰੀਆਂ ‘ਚ ਸਫ਼ਰ ਕਰੋ,ਜਿੱਥੋਂ ਮਰਜ਼ੀ ਬਾਡੀਆਂ ਲੱਗੀਆਂ ਹੋਣ..ਬਾਡੀ ਦਾ ਕੀ ਆਂ ਇਹ ਤਾਂ ਲੋਹਾ…ਪੰਜਾਬ ਦਾ ਹੋਇਆ ਜਾਂ ਰਾਜਸਥਾਨ ਦਾ, ਕੀ ਫਰਕ ਪੈਂਦਾ ਪਰ ਤੁਸੀਂ ਇਮਾਨਦਾਰੀ ਦਾ ਰਾਗ ਨਾ ਭੁਲਿਓ…ਉਹ ਪੁਰਾਣਾ ਗੀਤ ਭੁੱਲ ਜਾਵੋ ਤੇ ਇਹ ਨਵਾਂ ਗੀਤ ਗਾਵੋ…ਰਾਜਸਥਾਨ ਤੋਂ ਤਿਆਰ ਹੋ ਕੇ ਆਈਆਂ ਸਰਕਾਰੀ ਲਾਰੀਆਂ,ਨਵੇਂ ਸ਼ੀਸ਼ੇ ਤੇ ਨਵੀਆਂ ਬਾਰੀਆਂ…!
ਨਿਰਮਲ ਸਿੰਘ ਪੰਡੋਰੀ, ਪੱਤਰਕਾਰ।
94170-33033.
