ਚੰਡੀਗੜ੍ਹ, 27 ਫਰਵਰੀ, Gee98 News service
-ਆਮ ਆਦਮੀ ਪਾਰਟੀ ਦੇ ਵਿਧਾਇਕ ਬਲਕਾਰ ਸਿੱਧੂ ਦੀ ਇੱਕ ਵਾਇਰਲ ਆਡੀਓ ਦੇ ਮਾਮਲੇ ‘ਚ ਰਾਮਪੁਰਾ ਫੂਲ ਦੀ ਪੁਲਿਸ ਨੇ ਪੱਤਰਕਾਰ ਮਨਿੰਦਰਜੀਤ ਸਿੰਘ ਸਿੱਧੂ ਅਤੇ ਰਾਜੂ ਜੇਠੀ ਦੇ ਖ਼ਿਲਾਫ਼ ਮੁਕੱਦਮਾ ਦਰਜ ਕਰਨ ਤੋਂ ਬਾਅਦ ਵਿਧਾਇਕ ਬਲਕਾਰ ਸਿੱਧੂ ਅਤੇ ਪੰਜਾਬ ਪੁਲਿਸ ਸਵਾਲਾਂ ਦੇ ਘੇਰੇ ਵਿੱਚ ਘਿਰ ਗਈ ਹੈ। ਬਲਕਾਰ ਸਿੱਧੂ ਦੇ ਨਿੱਜੀ ਸਹਾਇਕ ਰੇਸ਼ਮ ਸਿੰਘ ਨੇ ਬਿਆਨ ਦਰਜ ਕਰਵਾਏ ਹਨ ਕਿ ਇਹ ਆਡੀਓ ਐਡੀਟਿੰਗ ਕੀਤੀ ਹੋਈ ਹੈ ਪ੍ਰੰਤੂ ਹੁਣ ਇਹ ਆਡੀਓ ਰਿਕਾਰਡਿੰਗ ਕਰਨ ਵਾਲਾ ਰਾਜੂ ਜੇਠੀ ਨੇ ਇੱਕ ਵਾਰ ਫੇਰ ਕੈਮਰੇ ਸਾਹਮਣੇ ਆ ਕੇ ਆਪਣੀ ਵੀਡੀਓ ਕਲਿੱਪ ਵਾਇਰਲ ਕੀਤੀ ਜਿਸ ਵਿੱਚ ਉਸਨੇ ਕਿਹਾ ਕਿ ਬਲਕਾਰ ਸਿੱਧੂ ਦੀ ਇਹ ਆਡੀਓ ਕਲਿੱਪ 101 ਫੀਸਦੀ ਸੱਚੀ ਹੈ ਅਤੇ ਇਸ ਨਾਲ ਕੋਈ ਛੇੜਛਾੜ ਨਹੀਂ ਹੋਈ। ਰਾਜੂ ਨੇ ਪੰਜਾਬ ਪੁਲਿਸ ਤੋਂ ਮੰਗ ਕੀਤੀ ਕਿ ਇਸ ਆਡੀਓ ਦੀ ਛੇੜਛਾੜ ਸਬੰਧੀ ਪੂਰੀ ਜਾਂਚ ਕਰਵਾਈ ਜਾਣੀ ਚਾਹੀਦੀ ਹੈ। ਸਵਾਲ ਇਹ ਵੀ ਉੱਠਦੇ ਹਨ ਕਿ ਕੀ ਪੁਲਿਸ ਨੇ ਮੁਕੱਦਮਾ ਦਰਜ ਕਰਨ ਤੋਂ ਪਹਿਲਾਂ ਇਸ ਆਡੀਓ ਦੀ ਐਡੀਟਿੰਗ ਦੀ ਜਾਂਚ ਕਰਵਾਈ ਜਾਂ ਨਹੀਂ। ਦੂਜੇ ਪਾਸੇ ਇਸ ਆਡੀਓ ਕਲਿੱਪ ਨਾਲ ਜੁੜਿਆ ਇੱਕ ਹੋਰ ਤੱਥ ਰਾਜੂ ਜੇਠੀ ਨੇ ਸਾਹਮਣੇ ਲਿਆਂਦਾ ਹੈ ਜਿਸ ਵਿੱਚ ਉਸ ਨੇ ਦੱਸਿਆ ਕਿ ਉਸਨੇ ਇਹ ਆਡੀਓ ਆਮ ਆਦਮੀ ਪਾਰਟੀ ਦੇ ਸੀਨੀਅਰ ਆਗੂਆਂ ਨੂੰ ਵੀ ਦਿੱਤੀ ਸੀ ਜਿਸ ਤੋਂ ਬਾਅਦ ਉਸ ਨੂੰ ਯਕੀਨ ਦਿਵਾਇਆ ਗਿਆ ਸੀ ਕਿ ਜਲਦੀ ਹੀ ਮੁੱਖ ਮੰਤਰੀ ਹਾਊਸ ਬੁਲਾ ਕੇ ਉਸ ਦਾ ਪੱਖ ਸੁਣਿਆ ਜਾਵੇਗਾ। ਰਾਜੂ ਜੇਠੀ ਨੇ ਦੱਸਿਆ ਕਿ ਇਹ ਆਡੀਓ ਕਲਿੱਪ ਪੂਰੀ ਆਡੀਓ ਦਾ ਕੁਝ ਹਿੱਸਾ ਹੀ ਹੈ ਜਦਕਿ ਇਸਦੀ ਪੂਰੀ ਆਡੀਓ ਵੀ ਉਸ ਕੋਲ ਮੌਜੂਦ ਹੈ। ਰਾਜੂ ਜੇਠੀ ਨੇ ਵਿਧਾਇਕ ਬਲਕਾਰ ਸਿੱਧੂ ਨੂੰ ਸਿੱਧੇ ਤੌਰ ‘ਤੇ ਚੈਲਿੰਜ ਕੀਤਾ ਕਿ ਜੇਕਰ ਇਹ ਪੂਰੀ ਆਡੀਓ ਉਸ ਨੇ ਵਾਇਰਲ ਕਰ ਦਿੱਤੀ ਤਾਂ ਵਿਧਾਇਕ ਬਲਕਾਰ ਸਿੱਧੂ ਨੂੰ ਜਵਾਬ ਦੇਣਾ ਔਖਾ ਹੋ ਜਾਵੇਗਾ। ਉਸਨੇ ਦੱਸਿਆ ਕਿ ਪੂਰੀ ਆਡੀਓ ਵਿੱਚ ਬਲਕਾਰ ਸਿੱਧੂ ਨੇ ਸਪੀਕਰ ਕੁਲਤਾਰ ਸਿੰਘ ਸੰਧਵਾਂ ਅਤੇ ਰਾਮਗੜੀਆ ਭਾਈਚਾਰੀ ਬਾਰੇ ਨਿੰਦਣਯੋਗ ਸ਼ਬਦਾਵਲੀ ਦੀ ਵਰਤੋਂ ਕੀਤੀ ਹੈ। ਰਾਜੂ ਜੇਠੀ ਨੇ ਇਹ ਵੀ ਖੁਲਾਸਾ ਕੀਤਾ ਕਿ ਉਸ ਨੇ ਪੂਰੀ ਆਡੀਓ ਸਪੀਕਰ ਸੰਧਵਾਂ ਨੂੰ ਵੀ ਮਿਲ ਕੇ ਸੁਣਾਈ ਸੀ ਜਿਸ ਤੋਂ ਬਾਅਦ ਸਪੀਕਰ ਨੇ ਕਿਹਾ ਸੀ ਕਿ ਇਸ ਨੂੰ ਵਾਇਰਲ ਨਾ ਕੀਤਾ ਜਾਵੇ ਜਿਸ ਨਾਲ ਇੱਕ ਵੱਡਾ ਵਿਵਾਦ ਖੜਾ ਹੋ ਜਾਵੇਗਾ। ਉਸ ਨੇ ਕਿਹਾ ਕਿ ਹੁਣ ਜਦੋਂ ਵਿਧਾਇਕ ਦੇ ਦਬਾਅ ਹੇਠ ਆ ਕੇ ਪੰਜਾਬ ਪੁਲਿਸ ਨੇ ਉਸ ਉਪਰ ਝੂਠਾ ਮੁਕੱਦਮਾ ਦਰਜ ਕੀਤਾ ਤਾਂ ਉਹ ਮੀਡੀਆ ਸਾਹਮਣੇ ਪੂਰੀ ਆਡੀਓ ਵੀ ਜਨਤਕ ਕਰੇਗਾ ਜਿਸ ਵਿੱਚ ਵਿਧਾਇਕ ਸਿੱਧੂ ਨੇ ਸਪੀਕਰ ਸੰਧਵਾਂ ਅਤੇ ਰਾਮਗੜੀਆ ਭਾਈਚਾਰੇ ਬਾਰੇ ਅਤੇ ਪੰਜਾਬੀਆਂ ਦੀ ਪੱਗ ਬਾਰੇ ਮੰਦੀ ਸ਼ਬਦਾਵਲੀ ਦੀ ਵਰਤੋਂ ਕੀਤੀ ਹੈ। ਰਾਜੂ ਜੇਠੀ ਨੇ ਆਪਣੇ ਵੀਡੀਓ ਕਲਿੱਪ ਵਿੱਚ ਰਾਮਪੁਰਾ ਦੇ ਐਸਐਚਓ ਵੱਲੋਂ ਉਸ ਦੇ ਪਰਿਵਾਰ ਨਾਲ ਕੀਤੀ ਬਦਸਲੂਕੀ ਦਾ ਜ਼ਿਕਰ ਕਰਦੇ ਹੋਏ ਕਿਹਾ ਕਿ ਉਹ ਐਸਐਚਓ ਦੇ ਖ਼ਿਲਾਫ਼ ਹਾਈਕੋਰਟ ਤੱਕ ਜਾਵੇਗਾ। ਹੁਣ ਰਾਜੂ ਜੇਠੀ ਦੇ ਇਸ ਨਵੇਂ ਵੀਡੀਓ ਕਲਿੱਪ ਤੋਂ ਬਾਅਦ ਵਿਧਾਇਕ ਸਿੱਧੂ ਹੋਰ ਮੁਸ਼ਕਿਲਾਂ ਵਿੱਚ ਘਿਰਦੇ ਨਜ਼ਰ ਆ ਰਹੇ ਹਨ ਕਿਉਂਕਿ ਹੁਣ ਨਵੇਂ ਸਵਾਲ ਇਹ ਉੱਠਣਗੇ ਕਿ ਆਖਰ ਵਿਧਾਇਕ ਸਿੱਧੂ ਨੇ ਪੂਰੇ ਆਡੀਓ ਕਲਿੱਪ ਵਿੱਚ ਰਾਮਗੜੀਆ ਭਾਈਚਾਰੇ ਅਤੇ ਪੰਜਾਬੀਆਂ ਦੀ ਪੱਗ ਬਾਰੇ ਕੀ ਕਿਹਾ ਹੈ ? ਦੂਜੇ ਪਾਸੇ ਪੱਤਰਕਾਰ ਤੇ ਮੁਕੱਦਮਾ ਦਰਜ ਹੋਣ ਤੋਂ ਬਾਅਦ ਵੀ ਬਲਕਾਰ ਸਿੱਧੂ ਦੀਆਂ ਮੁਸ਼ਕਲਾਂ ਵਧਣਗੀਆਂ ਕਿਉਂਕਿ ਇਹ ਤਾਂ ਮੰਨਿਆ ਨਹੀਂ ਜਾ ਸਕਦਾ ਕਿ ਵਿਧਾਇਕ ਦੀ ਸਹਿਮਤੀ ਤੋਂ ਬਿਨਾਂ ਹੀ ਉਸ ਦੇ ਪੀਏ ਨੇ ਮੁਕੱਦਮਾ ਦਰਜ ਕਰਵਾਇਆ ਹੋਵੇ। ਕੁੱਲ ਮਿਲਾ ਕੇ ਇਸ ਮਾਮਲੇ ਵਿੱਚ ਵਿਧਾਇਕ ਬਲਕਾਰ ਸਿੱਧੂ ਬੁਰੀ ਤਰ੍ਹਾਂ ਘਿਰਦੇ ਨਜ਼ਰ ਆ ਰਹੇ ਹਨ ਸਗੋਂ ਪੱਤਰਕਾਰ ‘ਤੇ ਮੁਕੱਦਮਾ ਦਰਜ ਕਰਵਾਉਣ ਤੋਂ ਬਾਅਦ ਤਾਂ ਪੱਤਰਕਾਰ ਭਾਈਚਾਰੇ ਵਿੱਚ ਵੀ ਰੋਸ ਹੈ।
ਸਬੰਧਤ ਖਬਰ
