ਚੰਡੀਗੜ੍ਹ,28 ਫਰਵਰੀ, Gee98 news service
ਪੰਜਾਬ ਦੇ ਨਾਇਬ ਤਹਿਸੀਲਦਾਰ ਅਤੇ ਤਹਿਸੀਲਦਾਰ ਇਕ ਵਾਰ ਫਿਰ ਸਮੂਹਿਕ ਛੁੱਟੀ ਤੇ ਚਲੇ ਗਏ ਹਨ। ਪੰਜਾਬ ਰੈਵੀਨਿਊ ਅਫਸਰ ਐਸੋਸੀਏਸ਼ਨ ਵੱਲੋਂ ਸਰਕਾਰ ਅਤੇ ਵਿਜੀਲੈਂਸ ਵਿਭਾਗ ਦੀ ਕਾਰਵਾਈ ਦੀ ਨਿੰਦਾ ਕਰਦੇ ਹੋਏ ਸ਼ੁੱਕਰਵਾਰ ਬਾਅਦ ਦੁਪਹਿਰ ਤੋਂ ਸਮੂਹਿਕ ਛੁੱਟੀ ‘ਤੇ ਜਾਣ ਦਾ ਫੈਸਲਾ ਲਿਆ ਹੈ। ਸੂਬੇ ਦੇ ਇਹਨਾਂ ਮਾਲ ਅਫਸਰਾਂ ਦਾ ਕਹਿਣਾ ਹੈ ਕਿ ਜਥੇਬੰਦੀ ਦੇ ਸੂਬਾ ਪ੍ਰਧਾਨ ਸੁਖਚਰਨ ਸਿੰਘ ਚੰਨੀ ਤਹਿਸੀਲਦਾਰ ਤਪਾ ਉਪਰ ਨਜਾਇਜ਼ ਵਿਜੀਲੈਂਸ ਪਰਚਾ ਤੇ ਗ੍ਰਿਫਤਾਰੀ, ਜਗਸੀਰ ਸਿੰਘ ਸਬ-ਰਜਿਸਟਰਾਰ, ਲੁਧਿਆਣਾ ਜੋ ਕਿ ਇਕ ਰਜਿਸਟਰੇਸ਼ਨ ਦੇ ਕੰਮ ‘ਚ ਖੁਦ ਸ਼ਿਕਾਇਤਕਰਤਾ ਹੈ, ਉੱਪਰ ਵਿਜੀਲੈਂਸ ਵਿਭਾਗ ਵਲੋਂ ਪਰਚਾ ਦਰਜ ਕੀਤਾ ਜਾਣਾ, ਪਿਛਲੇ ਦੋ ਦਿਨਾਂ ਦੌਰਾਨ ਵੱਖ-ਵੱਖ ਤਹਿਸੀਲਾਂ ‘ਚ ਵਿਜੀਲੈਂਸ ਵਿਭਾਗ ਵਲੋਂ ਕੀਤੀ ਗਈ ਛਾਪਾਮਾਰੀ ਅਤੇ ਖਾਸ ਤੌਰ ‘ਤੇ ਤਹਿਸੀਲ ਮਾਨਸਾ ਤੋਂ ਸਰਕਾਰੀ ਰਿਕਾਰਡ ਨੂੰ ਚੁੱਕ ਕੇ ਲੈ ਜਾਣਾ ਆਦਿ ਬਹੁਤ ਹੀ ਗੈਰ ਕਾਨੂੰਨੀ, ਗੈਰ ਵਾਜਬ,ਨਾ ਸਹਿਣਯੋਗ ਤੇ ਨਿੰਦਾ ਕਰਨਯੋਗ ਹੈ। ਪੰਜਾਬ ਰੈਵੀਨਿਊ ਅਫਸਰ ਐਸੋਸੀਏਸ਼ਨ ਵੱਲੋਂ ਸਰਕਾਰ ਅਤੇ ਵਿਜੀਲੈਂਸ ਵਿਭਾਗ ਦੀ ਇਸ ਗੈਰ-ਜ਼ਿੰਮੇਵਾਰਾਨਾ ਕਾਰਵਾਈ ਦੀ ਨਿੰਦਾ ਕੀਤੀ ਜਾਂਦੀ ਹੈ। ਜਦੋਂ ਤਕ ਉਪਰੋਕਤ ਮਸਲੇ ਹੱਲ ਨਹੀਂ ਕੀਤੇ ਜਾਂਦੇ, ਸਾਰੇ ਰੈਵੀਨਿਊ ਅਧਿਕਾਰੀ ਸਮੂਹਿਕ ਛੁੱਟੀ ‘ਤੇ ਰਹਿਣਗੇ। ਸੋ ਅਸੀਂ ਇਸ ਸਮੇਂ ਕਿਹਾ ਕਿ ਇਸ ਤੋਂ ਇਲਾਵਾ ਵੀ ਉਹਨਾਂ ਦੀਆਂ ਪਿਛਲੇ ਲੰਮੇ ਸਮੇਂ ਤੋਂ ਲਟਕਦੀਆਂ ਕੁਝ ਮੰਗਾਂ ਹਨ, ਜਦੋਂ ਤੱਕ ਇਹ ਸਾਰੇ ਮਸਲੇ ਹੱਲ ਨਹੀਂ ਹੋ ਜਾਂਦੇ ਉਸ ਵੇਲੇ ਤੱਕ ਸੂਬੇ ਦੇ ਸਾਰੇ ਮਾਲ ਅਫਸਰ ਕੰਮ ਨਹੀਂ ਕਰਨਗੇ।
