-80 ਸਾਲ ਦੇ ਬਜ਼ੁਰਗ ਦੀ ਕੱਟੀ ਗਈ ਪੈਨਸ਼ਨ…ਜਦੋਂ ਦਫ਼ਤਰ ਗਿਆ ਤਾਂ ਕਰਮਚਾਰੀ ਕਹਿੰਦੇ…ਬਾਬਾ ਤੂੰ ਤਾਂ ਮਰ ਚੁੱਕਿਆ ਏਂ…।
ਚੰਡੀਗੜ੍ਹ, 22 ਅਪ੍ਰੈਲ, Gee98 News service
-ਇੱਕ 80 ਸਾਲ ਦੇ ਬਜ਼ੁਰਗ ਨੂੰ ਜਾਂ ਤਿੰਨ ਚਾਰ ਮਹੀਨੇ ਬੁਢਾਪਾ ਪੈਨਸ਼ਨ ਨਾ ਮਿਲੀ ਤਾਂ ਉਹ ਜ਼ਿਲ੍ਹਾ ਸਮਾਜਿਕ ਸੁਰੱਖਿਆ ਦਫ਼ਤਰ ਪਹੁੰਚਿਆ ਜਿੱਥੋਂ ਦੇ ਕਰਮਚਾਰੀਆਂ ਦਾ ਜਵਾਬ ਸੁਣ ਕੇ 80 ਸਾਲ ਦੇ ਬਜ਼ੁਰਗ ਦੇ ਪੈਰਾਂ ਹੇਠੋਂ ਜ਼ਮੀਨ ਨਿਕਲ ਗਈ। ਇਹ ਮਾਮਲਾ ਮਾਨਸਾ ਜ਼ਿਲ੍ਹੇ ਦੇ ਪਿੰਡ ਹੀਰੋ ਕਲਾਂ ਨਾਲ ਸਬੰਧਿਤ ਹੈ ਜਿੱਥੇ ਇੱਕ ਬਜ਼ੁਰਗ ਰੁਲਦੂ ਸਿੰਘ ਨੂੰ ਸਾਲ 2000 ਤੋਂ ਲੈ ਕੇ ਬੁਢਾਪਾ ਪੈਨਸ਼ਨ ਮਿਲ ਰਹੀ ਸੀ ਪਰੰਤੂ ਪਿਛਲੇ ਤਿੰਨ ਚਾਰ ਮਹੀਨਿਆਂ ਤੋਂ ਜਦ ਉਸ ਦੀ ਬੁਢਾਪਾ ਪੈਨਸ਼ਨ ਨਾ ਮਿਲੀ ਤਾਂ ਉਹ ਬੈਂਕ ਦੇ ਚੱਕਰ ਕੱਟਦਾ ਰਿਹਾ ਜਦੋਂ ਬੈਂਕ ਕਰਮਚਾਰੀਆਂ ਨੇ ਵੀ ਉਸ ਨੂੰ ਕੋਈ ਹੱਥ ਪੱਲਾ ਨਾ ਫੜਾਇਆ ਤਾਂ ਉਹ ਕਿਸੇ ਤਰੀਕੇ ਨਾਲ ਮਾਨਸਾ ਦੇ ਜ਼ਿਲ੍ਹਾ ਸਮਾਜਿਕ ਸੁਰੱਖਿਆ ਦਫ਼ਤਰ ਵਿੱਚ ਪਹੁੰਚਿਆ ਅਤੇ ਆਪਣੀ ਪੈਨਸ਼ਨ ਨਾ ਮਿਲਣ ਸਬੰਧੀ ਫਰਿਆਦ ਕੀਤੀ। ਬਜ਼ੁਰਗ ਰੁਲਦੂ ਸਿੰਘ ਦੀ ਫਰਿਆਦ ਸੁਣਦੇ ਹੋਏ ਜ਼ਿਲ੍ਹਾ ਸਮਾਜਿਕ ਸੁਰੱਖਿਆ ਦਫ਼ਤਰ ਮਾਨਸਾ ਦੇ ਕਰਮਚਾਰੀਆਂ ਨੇ ਰੁਲਦੂ ਸਿੰਘ ਦੀ ਪੈਨਸ਼ਨ ਨਾਲ ਸੰਬੰਧਿਤ ਆਪਣੇ ਵਿਭਾਗ ਦਾ ਰਿਕਾਰਡ ਚੈੱਕ ਕਰਕੇ ਕਿਹਾ ਕਿ “ਬਾਬਾ ਤੂੰ ਤਾਂ ਕਈ ਮਹੀਨੇ ਪਹਿਲਾਂ ਮਰ ਚੁੱਕਾ ਏਂ…ਤੈਨੂੰ ਹੁਣ ਪੈਨਸ਼ਨ ਨਹੀਂ ਮਿਲ ਸਕਦੀ”। ਕਰਮਚਾਰੀਆਂ ਦਾ ਜਵਾਬ ਸੁਣ ਕੇ ਬਜ਼ੁਰਗ ਰੁਲਦੂ ਸਿੰਘ ਦੇ ਪੈਰਾਂ ਹੇਠੋਂ ਜ਼ਮੀਨ ਨਿਕਲ ਗਈ ਅਤੇ ਉਸਨੇ ਕਰਮਚਾਰੀਆਂ ਨੂੰ ਕਿਹਾ ਕਿ “ਮੈਂ ਤਾਂ ਜਿਉਂਦਾ ਜਾਗਦਾ ਖੜਾ ਹਾਂ, ਜੇਕਰ ਮਰ ਗਿਆ ਹੁੰਦਾ ਤਾਂ ਤੁਹਾਡੇ ਤੱਕ ਕਿਵੇਂ ਆਉਂਦਾ”। ਜ਼ਿਲ੍ਹਾ ਸਮਾਜਿਕ ਸੁਰੱਖਿਆ ਵਿਭਾਗ ਮਾਨਸਾ ਦੇ ਕਾਗਜ਼ਾਂ ਵਿੱਚ ਮਰ ਚੁੱਕਿਆ ਬਜ਼ੁਰਗ ਰੁਲਦੂ ਸਿੰਘ ਆਪਣੇ ਆਪ ਨੂੰ ਜਿਉਂਦੇ ਹੋਣ ਦੇ ਸਬੂਤ ਲੈ ਕੇ ਦਰ ਦਰ ਦੀਆਂ ਠੋਕਰਾਂ ਖਾ ਰਿਹਾ ਹੈ। ਦਫ਼ਤਰ ਦੇ ਕਰਮਚਾਰੀਆਂ ਦਾ ਕਹਿਣਾ ਹੈ ਕਿ ਪੈਨਸ਼ਨ ਲੈ ਰਹੇ ਲਾਭਪਾਤਰੀਆਂ ਦੇ ਸਰਵੇਖਣ ਦੌਰਾਨ ਅਕਸਰ ਅਜਿਹੀਆਂ ਗਲਤੀਆਂ ਹੋ ਜਾਂਦੀਆਂ ਹਨ, ਉਹਨਾਂ ਕਿਹਾ ਕਿ ਕਈ ਵਾਰ ਇੱਕ ਪਿੰਡ ਵਿੱਚ ਇੱਕੋ ਨਾਮ ਦੇ ਜ਼ਿਆਦਾ ਵਿਅਕਤੀ ਹੋਣ ਕਰਕੇ ਵੀ ਇਹੋ ਜਿਹੀ ਗਲਤੀ ਹੋ ਜਾਂਦੀ ਹੈ ਜਿਸ ਨੂੰ ਠੀਕ ਕਰ ਦਿੱਤਾ ਜਾਵੇਗਾ।
