ਸਿੱਖਿਆ ਕ੍ਰਾਂਤੀ ਦੇ ਸਮਾਗਮਾਂ ‘ਤੇ ਪੱਲਿਓਂ ਖਰਚਾ ਕਰ ਰਹੇ ਨੇ ਅਧਿਆਪਕ
ਚੰਡੀਗੜ੍ਹ, 30 ਅਪ੍ਰੈਲ, Gee98 News service
-ਪੰਜਾਬ ‘ਚ ਸਿੱਖਿਆ ਕ੍ਰਾਂਤੀ ਮੁਹਿੰਮ ਤਹਿਤ ਸਰਕਾਰੀ ਸਕੂਲਾਂ ਵਿੱਚ ਵਿਕਾਸ ਕਾਰਜਾਂ ਦੇ ਕੀਤੇ ਜਾ ਰਹੇ ਉਦਘਾਟਨੀ ਸਮਾਗਮਾਂ ਸੰਬੰਧੀ ਹੈਰਾਨੀਜਨਕ ਖੁਲਾਸਾ ਸਾਹਮਣੇ ਆਇਆ ਹੈ। ਸਰਕਾਰ ਦੀ ਇਸ ਸਿੱਖਿਆ ਕ੍ਰਾਂਤੀ ਮੁਹਿੰਮ ਦੌਰਾਨ ਜਿੱਥੇ ਸੱਤਾਧਾਰੀ ਆਗੂ ਆਪਣੀ ਬੱਲੇ ਬੱਲੇ ਕਰਵਾ ਰਹੇ ਹਨ ਉੱਥੇ ਸਿੱਖਿਆ ਕ੍ਰਾਂਤੀ ਦੇ ਸਮਾਗਮਾਂ ‘ਤੇ ਹੋ ਰਹੇ ਖਰਚੇ ਕਾਰਨ ਅਧਿਆਪਕਾਂ ਦੇ ਬੋਝੇ ਖਾਲੀ ਹੋ ਰਹੇ ਹਨ। ਉੰਝ ਭਾਵੇਂ ਸਰਕਾਰ ਨੇ ਸਿੱਖਿਆ ਕਾਂਤੀ ਲਈ 20 ਕਰੋੜ ਰੁਪਏ ਰਾਖਵੇਂ ਰੱਖੇ ਹਨ ਪ੍ਰੰਤੂ ਪ੍ਰਾਪਤ ਜਾਣਕਾਰੀ ਅਨੁਸਾਰ ਅਜੇ ਸਰਕਾਰ ਨੇ ਇਹਨਾਂ ਸਮਾਗਮਾਂ ਦੇ ਖਰਚੇ ਲਈ ਸਕੂਲਾਂ ਨੂੰ ਇੱਕ ਧੇਲਾ ਵੀ ਜਾਰੀ ਨਹੀਂ ਕੀਤਾ। ਸਿੱਖਿਆ ਵਿਭਾਗ ਵੱਲੋਂ ਬਣਾਏ ਸ਼ਡਿਊਲ ਮੁਤਾਬਕ ਜੇਕਰ ਇਹਨਾਂ ਸਮਾਗਮਾਂ ਦੀ ਗੱਲ ਕੀਤੀ ਜਾਵੇ ਤਾਂ ਉਦਘਾਟਨੀ ਕਾਰਜਾਂ ਦੇ ਨੀਹ ਪੱਥਰ ਦੇ 5000 ਰੁਪਏ ਤੋਂ ਇਲਾਵਾ ਸੈਕੰਡਰੀ ਸਕੂਲ ਨੂੰ 20000, ਹਾਈ ਸਕੂਲ ਨੂੰ 10000 ਅਤੇ ਪ੍ਰਾਇਮਰੀ ਸਕੂਲਾਂ ਨੂੰ 5000 ਪ੍ਰਤੀ ਸਮਾਗਮ ਦਾ ਖਰਚਾ ਪੰਜਾਬ ਸਰਕਾਰ ਵੱਲੋਂ ਰੱਖਿਆ ਗਿਆ ਹੈ, ਪ੍ਰੰਤੂ ਸੱਚਾਈ ਇਹੀ ਹੈ ਕਿ ਜਿਨਾਂ ਸਕੂਲਾਂ ਵਿੱਚ ਇਹ ਸਮਾਗਮ ਹੋ ਚੁੱਕੇ ਹਨ ਉਹਨਾਂ ਸਕੂਲਾਂ ਦਾ ਖਰਚਾ ਅਜੇ ਤੱਕ ਵੀ ਕਿਸੇ ਸਕੂਲ ਨੂੰ ਸਰਕਾਰ ਵੱਲੋਂ ਜਾਰੀ ਨਹੀਂ ਕੀਤਾ ਗਿਆ ਸਗੋਂ ਇਹਨਾਂ ਸਾਰੇ ਸਮਾਗਮਾਂ ਦਾ ਖਰਚਾ ਅਧਿਆਪਕਾਂ ਨੇ ਆਪਣੀ ਜੇਬ ਵਿੱਚੋਂ ਕੀਤਾ ਹੈ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਅਧਿਆਪਕ ਇਹਨਾਂ ਸਮਾਗਮਾਂ ਦੇ ਬਿੱਲ ਬਣਾ ਕੇ ਭੇਜਣਗੇ ਅਤੇ ਸਕੂਲ ਨੂੰ ਬਾਅਦ ਵਿੱਚ ਖਰਚੇ ਦੀ ਇਹ ਰਕਮ ਜਾਰੀ ਕੀਤੀ ਜਾਵੇਗੀ ਪ੍ਰੰਤੂ ਬਿੱਲ ਬਣਾ ਕੇ ਭੇਜਣ ਤੋਂ ਬਾਅਦ ਸਿੱਖਿਆ ਕ੍ਰਾਂਤੀ ਦੇ ਇਹਨਾਂ ਸਮਾਗਮਾਂ ਦੀ ਖਰਚ ਕੀਤੀ ਰਕਮ ਅਧਿਆਪਕਾਂ ਲਈ ਊਠ ਦਾ ਬੁੱਲ ਬਣਨ ਦੇ ਅਸਾਰ ਵੀ ਹਨ। ਇੱਕ ਹਾਈ ਸਕੂਲ ਦੇ ਮਾਸਟਰ ਨੇ ਇਹ ਪੁਸ਼ਟੀ ਕਰਦੇ ਹੋਏ ਕਿਹਾ ਕਿ ਉਹਨਾਂ ਨੇ ਆਪਣੇ ਸਕੂਲ ਵਿੱਚ ਸਿੱਖਿਆ ਕ੍ਰਾਂਤੀ ਸਮਾਗਮ ਦੇ ਉਦਘਾਟਨ ਦਾ ਸਾਰਾ ਖਰਚਾ ਆਪਣੇ ਪੱਲਿਓਂ ਕੀਤਾ ਹੈ, ਜਦੋਂ ਸਰਕਾਰ ਵੱਲੋਂ ਪੈਸੇ ਮਿਲਣਗੇ ਤਾਂ ਦੇਖਾਂਗੇ। ਅਧਿਆਪਕ ਆਗੂਆਂ ਦਾ ਇਹ ਵੀ ਕਹਿਣਾ ਹੈ ਕਿ ਸਰਕਾਰ ਵੱਲੋਂ ਇਨਾਂ ਸਮਾਗਮਾਂ ਵਿੱਚ ਬਤੌਰ ਮੁੱਖ ਮਹਿਮਾਨ ਪਹੁੰਚ ਰਹੇ ਵਿਧਾਇਕ, ਮੰਤਰੀ, ਹਲਕਾ ਇੰਚਾਰਜ ਅਤੇ ਆਪ ਆਗੂਆਂ ਦੀ ਆਓ ਭਗਤ ਲਈ ਬਕਾਇਦਾ ਲਿਖਤੀ ਹੁਕਮ ਜਾਰੀ ਕੀਤੇ ਜਾਂਦੇ ਹਨ। ਉਹਨਾਂ ਕਿਹਾ ਕਿ ਸਰਕਾਰ ਨੇ ਇਹਨਾਂ ਮੁੱਖ ਮਹਿਮਾਨਾਂ ਦੀ ਆਓ ਭਗਤ ਅਤੇ ਸ਼ਾਨਦਾਰ ਸਵਾਗਤ ਲਈ ਬਕਾਇਦਾ ਸ਼ਡਿਊਲ ਜਾਰੀ ਕੀਤਾ ਹੈ ਪ੍ਰੰਤੂ ਇਹਨਾਂ ਮੁੱਖ ਮਹਿਮਾਨਾਂ ਦੇ ਸ਼ਾਨਦਾਰ ਸਵਾਗਤ ਲਈ ਬਜਟ ਬਹੁਤ ਘੱਟ ਰੱਖਿਆ ਹੈ ਕਿਉਂਕਿ ਅਸਲ ਵਿੱਚ ਮੰਤਰੀਆਂ ਵਿਧਾਇਕਾਂ ਤੇ ਹਲਕਾ ਇੰਚਾਰਜਾਂ ਦੀ ਇੱਛਾ ਅਨੁਸਾਰ ਜਿਸ ਤਰ੍ਹਾਂ ਦੇ ਸਮਾਗਮ ਮੁੱਖ ਅਧਿਆਪਕਾਂ ਨੂੰ ਮਜਬੂਰੀਵੱਸ ਕਰਵਾਉਣੇ ਪੈਂਦੇ ਹਨ ਉਹਨਾਂ ਉੱਪਰ 50 ਤੋਂ ਲੈ ਕੇ 60 ਹਜ਼ਾਰ ਰੁਪਏ ਤੱਕ ਪ੍ਰਤੀ ਸਮਾਗਮ ਖਰਚਾ ਆ ਰਿਹਾ ਹੈ। ਹੁਣ ਸਵਾਲ ਉੱਠਦਾ ਹੈ ਕਿ ਇਹ ਪੈਸੇ ਅਧਿਆਪਕਾਂ ਨੂੰ ਕੌਣ ਦੇਵੇਗਾ ਕਿਉਂਕਿ ਸਰਕਾਰ ਨੇ ਇਹਨਾਂ ਸਮਾਗਮਾਂ ਲਈ ਸੈਕੰਡਰੀ ਲਈ 20000 ਹਾਈ ਲਈ 10000 ਅਤੇ ਪ੍ਰਾਇਮਰੀ ਸਕੂਲ ਲਈ ਸਿਰਫ਼ 5000 ਹੀ ਰੱਖਿਆ ਹੈ। ਦੂਜੇ ਪਾਸੇ ਇਹ ਵੀ ਜਾਣਕਾਰੀ ਸਾਹਮਣੇ ਆ ਰਹੀ ਹੈ ਕਿ ਮੰਤਰੀਆਂ ਤੇ ਵਿਧਾਇਕਾਂ ਵੱਲੋਂ ਪਹਿਲਾਂ ਸਕੂਲਾਂ ਨੂੰ ਸਮਾਗਮ ਦੀ ਤਰੀਕ ਦੇ ਦਿੱਤੀ ਜਾਂਦੀ ਹੈ ਜਿਸ ਤੋਂ ਬਾਅਦ ਸਕੂਲ ਵਾਲੇ ਉਦਘਾਟਨੀ ਪੱਥਰ ‘ਤੇ ਤਾਰੀਕ ਲਿਖ ਕੇ ਪੱਥਰ ਬਣਵਾ ਲੈਂਦੇ ਹਨ ਅਤੇ ਟ੍ਰਾਫੀਆਂ ਤਿਆਰ ਕਰਵਾ ਲੈਂਦੇ ਹਨ ਅਤੇ ਟੈਂਟ ਦੀ ਬੁਕਿੰਗ ਸਮੇਤ ਹੋਰ ਸਾਰੇ ਪ੍ਰਬੰਧ ਕਰ ਲਏ ਜਾਂਦੇ ਹਨ ਪ੍ਰੰਤੂ ਐਨ ਮੌਕੇ ‘ਤੇ ਆ ਕੇ ਮੰਤਰੀਆਂ ਤੇ ਵਿਧਾਇਕਾਂ ਵੱਲੋਂ ਆਪਣੇ ਰੁਝੇਵਿਆਂ ਦਾ ਵੇਰਵਾ ਦੇ ਕੇ ਇਹ ਸਮਾਗਮ ਰੱਦ ਕਰ ਦਿੱਤੇ ਜਾਂਦੇ ਹਨ ਜਿਸ ਕਰਕੇ ਤਾਰੀਕ ਲਿਖੀ ਹੋਣ ਕਰਕੇ ਪਹਿਲਾਂ ਬਣਿਆ ਉਦਘਾਟਨੀ ਪੱਥਰ ਤੇ ਟ੍ਰਾਫੀਆਂ ਦੁਬਾਰਾ ਬਣਵਾਉਣੀਆਂ ਪੈਂਦੀਆਂ ਹਨ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਇਸੇ ਤਰ੍ਹਾਂ ਵਿਧਾਨ ਸਭਾ ਹਲਕਾ ਬਰਨਾਲਾ ਤੇ ਮਹਿਲ ਕਲਾਂ ਵਿੱਚ 3 ਮਈ ਨੂੰ ਹੋਣ ਵਾਲੇ ਸਮਾਗਮ ਰੱਦ ਕਰ ਦਿੱਤੇ ਗਏ ਹਨ ਜਿਨਾਂ ਸੰਬੰਧੀ ਸਕੂਲਾਂ ਦੇ ਅਧਿਆਪਕਾਂ ਵੱਲੋਂ ਪੂਰੇ ਪ੍ਰਬੰਧ ਕੀਤੇ ਜਾ ਚੁੱਕੇ ਹਨ। ਇਹ ਵੀ ਸਾਹਮਣੇ ਆਇਆ ਹੈ ਸਿੱਖਿਆ ਕ੍ਰਾਂਤੀ ਦੇ ਇਹਨਾਂ ਉਦਘਾਟਨੀ ਸਮਾਗਮਾਂ ਲਈ ਸਿੱਖਿਆ ਵਿਭਾਗ ਦੇ ਅਧਿਕਾਰੀਆਂ ਨੂੰ ਲਿਖ਼ਤੀ ਹਦਾਇਤਾਂ ਦੇ ਨਾਲ ਨਾਲ ਜਵਾਨੀ ਹਦਾਇਤਾਂ ਵੀ ਜਾਰੀ ਕੀਤੀਆਂ ਜਾਂਦੀਆਂ ਹਨ ਅਤੇ ਇਹਨਾਂ ਹਦਾਇਤਾਂ ਦੀ ਬਦੌਲਤ ਹੀ ਸਕੂਲਾਂ ਦੇ ਮੁੱਖ ਅਧਿਆਪਕਾਂ ਨੂੰ ਆਪਣੇ ਬੋਝੇ ਖਾਲੀ ਕਰਨੇ ਪੈ ਰਹੇ ਹਨ।
