–ਪੰਜਾਬੀ ਦੀ ਇੱਕ ਕਹਾਵਤ ਹੈ “ਅੰਨੀਂ ਪੀਹੇ ਕੁੱਤੇ ਚੱਟਣ”…ਦਰਅਸਲ ਇਹ ਕਹਾਵਤਾਂ ਕਿਸੇ ਸੱਚਾਈ ਵੱਲ ਸੰਕੇਤਕ ਹੁੰਦੀਆਂ ਹਨ… ਨਾ ਤਾਂ ਕੋਈ ਅੰਨ੍ਹਾ ਵਿਅਕਤੀ ਚੱਕੀ ਪੀਸ ਸਕਦਾ ਹੈ ਅਤੇ ਨਾ ਹੀ ਕੁੱਤੇ ਚੱਕੀ ਨੂੰ ਚੱਟ ਸਕਦੇ ਨੇ…ਪਰ ਕਈ ਵਾਰੀ ਇਹ ਕਹਾਵਤਾਂ ਸਮਾਜਿਕ ਵਰਤਾਰੇ ਵਿੱਚ ਸੱਚੀਆਂ ਵੀ ਹੋ ਨਿਬੜਦੀਆਂ ਹਨ…ਅਜਿਹਾ ਇੱਕ ਮਾਮਲਾ ਤੁਹਾਡੇ ਧਿਆਨ ਵਿੱਚ ਲਿਆਉਂਦੇ ਹਾਂ…. ਪੰਜਾਬ ਦੇ ਜੰਗਲਾਤ ਵਿਭਾਗ ਦੇ ਵਿੱਚ ਇੱਕ ਡਰਾਈਵਰ ਜਾਅਲੀ ਅੰਗਹੀਣ ਸਰਟੀਫਿਕੇਟ ਬਣਾ ਕੇ ਡਰਾਈਵਰ ਦੀ ਨੌਕਰੀ ਕਰ ਰਿਹਾ ਹੈ… ਨੌਕਰੀ ਡਰਾਈਵਰ ਦੀ ਅੰਗਹੀਣਤਾ ਕੰਨਾਂ ਤੋਂ ਬੋਲੇ ਦੀ… ਭਾਵ ਕਿ ਡਰਾਈਵਰ ਸਾਹਿਬ ਨੇ ਅੰਗਹੀਣਤਾ ਦਾ ਸਰਟੀਫਿਕੇਟ ਬਣਾ ਲਿਆ ਕਿ ਮੈਂ ਕੰਨਾਂ ਤੋਂ ਬੋਲਾ ਹਾਂ…ਹੁਣ ਤੁਸੀਂ ਸੋਚੋਗੇ ਕਿ ਜਿਹੜਾ ਹੋਇਆ ਲੰਗੜਾ ਉਹਨੇ ਪਹਾੜ ਕਿਵੇਂ ਚੜਨਾ…ਕੰਨਾਂ ਤੋਂ ਬੋਲੇ ਵਿਅਕਤੀ ਦਾ ਡਰਾਈਵਰੀ ਨਾਲ ਕੀ ਸਬੰਧ…ਪਰ ਇੱਥੇ ਸਭ ਚੱਲਦਾ…ਡਰਾਈਵਰ ਸਾਹਿਬ ਅਜੇ ਵੀ ਬੜੀ ਸ਼ਾਨ ਨਾਲ ਜੰਗਲਾਤ ਵਿਭਾਗ ਦੇ ਸੰਗਰੂਰ ਦਫ਼ਤਰ ‘ਚ ਨੌਕਰੀ ਕਰ ਰਹੇ ਨੇ…ਹੈਰਾਨੀ ਇਸ ਗੱਲ ਦੀ ਹੈ ਕਿ ਜਦ ਇੱਕ ਸਮਾਜ ਸੇਵੀ ਵਿਅਕਤੀ ਨੇ ਉਕਤ ਮਾਮਲਾ ਧਿਆਨ ਵਿੱਚ ਆਉਣ ‘ਤੇ ਡਰਾਈਵਰ ਦੀ ਨੌਕਰੀ ਨਾਲ ਸੰਬੰਧਿਤ ਸਰਟੀਫਿਕੇਟ ਮੰਗੇ ਜਿਸ ਵਿੱਚ ਅੰਗਹੀਣ ਸਰਟੀਫਿਕੇਟ ਵੀ ਸੀ ਤਾਂ ਸੱਜਾ ਖੱਬਾ ਕਰਕੇ ਉਸਨੂੰ ਨੌਕਰੀ ‘ਤੇ ਰੱਖਣ ਵਾਲੇ ਵੇਲੇ ਦੇ ਅਫ਼ਸਰਾਂ ਨੇ ਉਸ ਦਾ ਵਿਭਾਗ ਵਿੱਚੋਂ ਰਿਕਾਰਡ ਹੀ ਲਾਪਤਾ ਕਰ ਦਿੱਤਾ… ਹੁਣ ਡਰਾਈਵਰ ਸਾਹਿਬ ਵਿਭਾਗ ਵਿੱਚ ਬਤੌਰ ਡਰਾਈਵਰ ਨੌਕਰੀ ਤਾਂ ਕਰ ਰਹੇ ਨੇ ਪਰ ਮਹਿਕਮੇ ਕੋਲ ਸੰਗਰੂਰ ਤੋਂ ਲੈ ਕੇ ਪਟਿਆਲਾ,ਚੰਡੀਗੜ੍ਹ ਤੱਕ ਉਸ ਦਾ ਰਿਕਾਰਡ ਹੀ ਨਹੀਂ ਹੈ…ਤੁਸੀਂ ਆਪਣੀ ਜ਼ਿੰਦਗੀ ਵਿੱਚ ਕਦੇ ਅੰਨ੍ਹੀ ਪੀਹਦੀ ਦੇਖੀ ਨਹੀਂ ਹੋਣੀ ਅਤੇ ਨਾ ਹੀ ਕੁੱਤੇ ਚੱਟਦੇ ਵੇਖੇ ਹੋਣੇ ਆਂ…ਪ੍ਰੰਤੂ ਉਕਤ ਘਟਨਾਕ੍ਰਮ ਵਿੱਚ ਸਾਫ਼ ਦਿਸ ਰਿਹਾ ਕਿ ਅੰਨ੍ਹੀ ਪੀਸ ਰਹੀ ਹੈ ਤੇ ਕੁੱਤੇ ਚੱਟ ਰਹੇ…ਇਹ ਅੰਦਾਜ਼ਾ ਤੁਸੀਂ ਖੁਦ ਲਗਾਓ ਕਿ ਅੰਨ੍ਹਾ ਕੌਣ ਆਂ ਤੇ ਕੁੱਤੇ ਕੌਣ ਨੇ…ਸਾਡੀ ਜ਼ਿੰਮੇਵਾਰੀ ਤਾਂ ਤੁਹਾਡੇ ਧਿਆਨ ‘ਚ ਲਿਆਉਣੀ ਆਂ, ਅਸੀਂ ਪੂਰੀ ਕਰ ਦਿੱਤੀ… ਬਾਕੀ ਕੰਮ ਤੁਸੀਂ ਕਰੋ… ਤੁਸੀਂ ਵੇਖੋ ਕਿ ਜਿਹੜਾ ਅੰਨ੍ਹੀ ਪੀਸਦੀ ਆਂ ਉਹ ਕਿੱਥੇ ਜਾਂਦਾ ਤੇ ਜਿਹੜੇ ਕੁੱਤੇ ਚੱਟਦੇ ਨੇ ਉਹ ਕੀਹਦੇ ਰੱਖੇ ਹੋਏ ਨੇ…ਇਸ ਘਟਨਾਕ੍ਰਮ ਨਾਲ ਜੁੜਿਆ ਹੈਰਾਨੀਜਨਕ ਪੱਖ ਇਹ ਵੀ ਹੈ ਕਿ ਸ਼ਿਕਾਇਤਕਰਤਾ ਪਿਛਲੇ 7-8 ਸਾਲ ਤੋਂ ਇਸ ਮਾਮਲੇ ‘ਚ ਸਬੰਧਿਤ ਘਪਲੇਬਾਜ਼ਾਂ ਨੂੰ ਸਜ਼ਾ ਦਿਵਾਉਣ ਲਈ ਚਾਰਾਜੋਈ ਕਰ ਰਿਹਾ ਹੈ… ਪਰ ਗੱਲ ਅਜੇ ਉੱਥੇ ਹੀ ਅਟਕੀ ਹੋਈ ਆਂ ਕਿ ਅੰਨੀ ਪੀਸਣੋ ਨਹੀਂ ਹਟ ਰਹੀ ਅਤੇ ਕੁੱਤੇ ਸ਼ਿਕਾਇਤ ਕਰਤਾ ਨੂੰ ਚੱਕੀ ਦੇ ਨੇੜੇ ਨਹੀਂ ਲੱਗਣ ਦੇ ਰਹੇ…ਹੁਣ ਸ਼ਿਕਾਇਤਕਰਤਾ ਨੇ ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਨੂੰ ਇੱਕ ਲਿਖ਼ਤੀ ਦਰਖ਼ਾਸਤ ਦਿੱਤੀ ਹੈ ਕਿ ਉਹ ਖ਼ੁਦ ਦਿਲਚਸਪੀ ਲੈ ਕੇ ਵੇਖਣ ਕਿ ਆਖ਼ਰ ਅੰਨ੍ਹੀ ਕਿਵੇਂ ਪੀਸ ਰਹੀ ਆਂ ਤੇ ਕੁੱਤੇ ਕਿਵੇਂ ਚੱਟ ਰਹੇ ਨੇ…ਵੇਖਦੇ ਆਂ ਕਿ ਮੁੱਖ ਮੰਤਰੀ ਦੇ ਦਖ਼ਲ ਅੰਦਾਜ਼ੀ ਤੋਂ ਬਾਅਦ ਵੀ ਅੰਨ੍ਹੀ ਪੀਸਣੋ ਹੱਟਦੀ ਆਂ ਜਾਂ ਫਿਰ…! ਇੱਕ ਗੱਲ ਹੋਰ ਤੁਸੀਂ ਧਿਆਨ ਰੱਖਿਓ ਕਿਤੇ ਸੰਗਰੂਰ ਤੁਹਾਡੀ ਗੱਡੀ ਦੇ ਅੱਗੇ ਜੰਗਲਾਤ ਮਹਿਕਮੇ ਦੀ ਗੱਡੀ ਜਾ ਰਹੀ ਹੋਵੇ ਤਾਂ ਐਵੇਂ “ਟੀਂ ਟੀਂ…ਪਾਂ ਪਾਂ” ਨਾ ਕਰੀ ਜਾਇਓ…ਕਿਉਂਕਿ ਜੰਗਲਾਤ ਮਹਿਕਮੇ ਦਾ ਇੱਥੇ ਇੱਕ ਅਜਿਹਾ ਡਰਾਈਵਰ ਵੀ ਹੈ ਜੋ ਕੰਨਾਂ ਤੋਂ ਬੋਲਾ ਹੈ…!
– ਨਿਰਮਲ ਸਿੰਘ ਪੰਡੋਰੀ, ਪੱਤਰਕਾਰ।
Menu
