ਬਰਨਾਲਾ, 29 ਸਤੰਬਰ (ਨਿਰਮਲ ਸਿੰਘ ਪੰਡੋਰੀ) :
ਪੰਜਾਬ ਦੇ ਮੱਖ ਮੰਤਰੀ ਭਗਵੰਤ ਮਾਨ ਅਤੇ ਸਾਬਕਾ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਮੇਹਣੋ-ਮੇਹਣੀ ਹੋ ਰਹੇ ਹਨ। ਮੁੱਖ ਮੰਤਰੀ ਭਗਵੰਤ ਮਾਨ ਵੱਲੋਂ ਵਿਧਾਨ ਸਭਾ ’ਚ ਚੰਨੀ ਉੱਪਰ ਪੰਜਾਬ ’ਚੋਂ ਗ਼ੈਰਹਾਜ਼ਰੀ ਸੰਬੰਧੀ ਟਿੱਪਣੀ ਕਰਦੇ ਹੋਏ ਕਿਹਾ ਗਿਆ ਸੀ ਕਿ ਉਹ ਜਦ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਬਤੌਰ ਮੁੱਖ ਮੰਤਰੀ ਚੰਨੀ ਵੱਲੋਂ ਕੀਤੇ ਫ਼ੈਸਲੇ ਦੀਆਂ ਫਾਇਲਾਂ ਦੇਖਦੇ ਹਨ ਤਾਂ ਉਨ੍ਹਾਂ ਨੂੰ ਕੁਝ ਸਮਝ ਨਹੀਂ ਲੱਗਦਾ ਅਤੇ ਉਹ ਇਸ ਸੰਬੰਧੀ ਚੰਨੀ ਨਾਲ ਗੱਲ ਕਰਨਾ ਚਾਹੁੰਦੇ ਹਨ। ਮੁੱਖ ਮੰਤਰੀ ਨੇ ਸਿੱਧੇ ਤੌਰ ’ਤੇ ਸੰਕੇਤ ਦਿੱਤਾ ਹੈ ਕਿ ਚੰਨੀ ਦੇ ਤਿੰਨ ਮਹੀਨਿਆਂ ਦੇ ਕਾਰਜਕਾਲ ਦੌਰਾਨ ਹੋਏ ਕੁਝ ਫ਼ੈਸਲਿਆਂ ਵਿੱਚ ਗੜਬੜ ਹੈ ਪ੍ਰੰਤੂ ਇੱਥੇ ਸਵਾਲ ਇਹ ਉੱਠਦਾ ਹੈ ਕਿ ਜੇਕਰ ਸੱਚ-ਮੁੱਚ ਹੀ ਚੰਨੀ ਦੇ ਮੁੱਖ ਮੰਤਰੀ ਸਮੇਂ ਕੋਈ ਘਪਲਾ ਜ਼ਾਹਿਰ ਹੰੁਦਾ ਹੈ ਤਾਂ ਸਰਕਾਰ ਬਣਦੀ ਕਾਨੂੰਨੀ ਕਾਰਵਾਈ ਕਰਨ ਦੇ ਰਾਹ ਕਿਉਂ ਨਹੀਂ ਪੈ ਰਹੀ ਅਤੇ ਬਿਨਾਂ ਕਿਸੇ ਪੜਤਾਲ ਤੇ ਕਾਨੂੰੂਨੀ ਕਾਰਵਾਈ ਕੀਤੇ ਬਿਨਾਂ ਸੂਬੇ ਦਾ ਮੁੱਖ ਮੰਤਰੀ ਸਿੱਧੇ ਤੌਰ ’ਤੇ ਸਾਬਕਾ ਮੁੱਖ ਮੰਤਰੀ ਨਾਲ ਕੋਈ ਗੱਲ ਕਰਨ ਦਾ ਕਿਹੜਾ ਅਧਿਕਾਰ ਰੱਖਦਾ ਹੈ। ਭਗਵੰਤ ਮਾਨ ਨੇ ਭਾਵੇਂ ਚੰਨੀ ਦੇ ਗ਼ੈਰਹਾਜ਼ਰੀ ਤੇ ਸਿਆਸੀ ਟਕੋਰ ਕੀਤੀ ਸੀ ਪ੍ਰੰਤੂ ਉਨਾਂ ਦੀ ਇਹ ਟਕੋਰ ਭਗਵੰਤ ਮਾਨ ਦੀ ਇਹ ਟਕੋਰ ਬਚਕਾਨਾਪਣ ਜਾਪਦੀ ਹੈ। ਦੂਜੇ ਪਾਸੇ ਕਾਂਗਰਸ ਦੇ ਪ੍ਰਧਾਨ ਰਾਜਾ ਵੜਿੰਗ ਨੇ ਚੰਨੀ ਨਾਲ ਗੱਲ ਕਰਨ ਸੰਬੰਧੀ ਭਗਵੰਤ ਮਾਨ ਦੀ ਇੱਛਾ ਉੱਪਰ ਟਿੱਪਣੀ ਕਰਦੇ ਹੋਏ ਕਿਹਾ ਕਿ ਸਿਰਫ਼ ਤਿੰਨ ਮਹੀਨੇ ਮੁੱਖ ਮੰਤਰੀ ਰਹਿਣ ਵਾਲੇ ਵਿਅਕਤੀ ਨਾਲ ਗੱਲ ਕਰਨ ਜਾਂ ਪੁੱਛ ਪੜਤਾਲ ਕਰਨ ਲਈ ਭਗਵੰਤ ਮਾਨ ਤਰਲੋਮੱਛੀ ਹੋ ਰਹੇ ਹਨ ਪ੍ਰੰਤੂ ਪੌਣੇ ਪੰਜ ਸਾਲ ਮੁੱਖ ਮੰਤਰੀ ਰਹਿਣ ਵਾਲੇ ਕੈਪਟਨ ਅਮਰਿੰਦਰ ਸਿੰਘ ਦੇ ਸਮੇਂ ਹੋਏ ਫ਼ੈਸਲਿਆਂ ਸੰਬੰਧੀ ਭਗਵੰਤ ਮਾਨ ਨੇ ਚੁੱਪੀਧਾਰਨ ਕੀਤੀ ਹੋਈ ਹੈ ਜਦਕਿ ਮੁੱਖ ਮੰਤਰੀ ਬਣਨ ਤੋਂ ਪਹਿਲਾਂ ਭਗਵੰਤ ਮਾਨ ਖ਼ੁਦ ਕੈਪਟਨ ਅਮਰਿੰਦਰ ਸਿੰਘ ਦੀ ਕਾਰਜਸ਼ੈਲੀ ਉੱਪਰ ਸਵਾਲ ਚੁੱਕਦੇ ਰਹੇ ਹਨ। ਸਾਬਕਾ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਨੇ ਵੀ ਭਗਵੰਤ ਮਾਨ ਦੀ ਟਿੱਪਣੀ ਦਾ ਜਵਾਬ ਦਿੰਦੇ ਹੋਏ 24 ਘੰਟੇ ਫੋਨ ਉੱਪਰ ਹਾਜ਼ਰ ਰਹਿਣ ਦੀ ਗੱਲ ਆਖੀਂ ਹੈ। ਮੁੱਖ ਮੰਤਰੀ ਅਤੇ ਸਾਬਕਾ ਮੁੱਖ ਮੰਤਰੀ ਦੇ ਇਹ ਮਿਹਣੇ ਇਸ ਗੱਲ ਦਾ ਵੀ ਸੰਕੇਤ ਹਨ ਕਿ ਅਜੋਕੇਦੌਰ ਦੇ ਰਾਜਨੇਤਾਵਾਂ ਦਾ ਦਿਮਾਗ ਆਪਣੇ ਵਿਰੋਧੀਆਂ ਨੂੰ ਕਿਸੇ ਨਾਲ ਕਿਸੇ ਬਹਾਨੇ ਸਿਆਸੀ ਤੌਰ ’ਤੇ ਬਦਨਾਮ ਕਰਨ ਵੱਲ ਜ਼ਿਆਦਾ ਕਾਰਜਸ਼ੀਲ ਰਹਿੰਦਾ ਹੈ ਜਦਕਿ ਲੋਕ ਹਿੱਤਾਂ ਨਾਲ ਜੁੜੇ ਮਸਲਿਆ ਜਾਂ ਲੋਕਾਂ ਦੀਆਂ ਸਮੱਸਿਆਵਾਂ ਸੰਬੰਧੀ ਡੰਗ ਟਪਾਊਨੀਤੀ ਅਖਤਿਆਰ ਕਰ ਲਈ ਜਾਂਦੀ ਹੈ। ਬਹਰਹਾਲ ! ਮੁੱਖ ਮੰਤਰੀ ਭਗਵੰਤ ਮਾਨ ਨੂੰ ਪ੍ਰਸ਼ਾਸਨਿਕ ਤੌਰ ’ਤੇ ਕੰਮ ਕਰਦੇ ਹੋਏ ਮੁੱਖ ਮੰਤਰੀ ਦੇ ਅਹੁਦੇ ਦਾ ਸਟੇਟਸ ਧਿਆਨ ਵਿੱਚ ਰੱਖਣਾ ਜ਼ਰੂਰੀ ਹੈ ਕਿਉਂਕਿ ਮੁੱਖ ਮੰਤਰੀ ਵੱਲੋਂ ਦਿੱਤੇ ਬਿਆਨ ਜੇਕਰ ਮੁੱਢਲੀ ਨਜ਼ਰੇ ਹੀ ਹਾਸੋਹੀਣੇ ਲੱਗਦੇ ਹੋਣ ਤਾਂ ਇਸ ਦਾ ਪ੍ਰਭਾਵ ਮੁੱਖ ਮੰਤਰੀ ਦੇ ਵਿਅਕਤੀਤਵ ਉੱਪਰ ਵੀ ਪੈਂਦਾ ਹੈ ਅਤੇ ਇਹ ਜ਼ਰੂਰੀ ਹੈ ਕਿ ਭਗਵੰਤ ਮਾਨ ਨੂੰ ਬਤੌਰ ਮੁੱਖ ਮੰਤਰੀ ਇੱਕ ਹੰਢੇ-ਵਰਤੇ ਨੇਤਾ ਵਾਂਗ ਵਿਚਰਨਾ ਚਾਹੀਦਾ ਹੈ।
