-ਫੈਮਲੀ ਕੋਰਟ ਦੇ ਫੈਸਲੇ ਵਿਰੁੱਧ ਪਤਨੀ ਦੀ ਪਟੀਸ਼ਨ ਕੀਤੀ ਖ਼ਾਰਜ
ਚੰਡੀਗੜ੍ਹ :- ਪੰਜਾਬ ਹਰਿਆਣਾ ਹਾਈਕੋਰਟ ਨੇ ਇੱਕ ਪਤੀ ਨੂੰ ਮਾਨਸਿਕ ਤੌਰ ’ਤੇ ਪ੍ਰੇਸ਼ਾਨ ਕਰਨ, ਉਸ ਦੀਆਂ ਝੂਠੀਆਂ ਸ਼ਿਕਾਇਤਾਂ ਕਰਨ ਅਤੇ ਉਸ ਨੂੰ ਨੌਕਰੀ ਤੋਂ ਅਸਤੀਫ਼ਾ ਦੇਣ ਲਈ ਮਜ਼ਬੂਰ ਕਰਨ ਵਾਲੀ ਪਤਨੀ ਨੂੰ ‘ਜ਼ਾਲਮ’ ਕਰਾਰ ਦਿੱਤਾ ਹੈ। ਹਾਈਕੋਰਟ ਨੇ ਫਰੀਦਾਬਾਦ ਦੀ ਇੱਕ ਫੈਮਲੀ ਕੋਰਟ ਵੱਲੋਂ ਦਿੱਤੇ ਤਲਾਕ ਵਿਰੁੱਧ ਪਤਨੀ ਵੱਲੋਂ ਪਾਈ ਪਟੀਸ਼ਨ ਦੀ ਸੁਣਵਾਈ ਦੌਰਾਨ ਇਹ ਟਿੱਪਣੀ ਕੀਤੀ ਅਤੇ ਪਟੀਸ਼ਨ ਖਾਰਜ ਕਰਦੇ ਹੋਏ ਫੈਮਲੀ ਕੋਰਟ ਦੇ ਫੈਸਲੇ ਨੂੰ ਪਤੀ ਦੇ ਹੱਕ ’ਚ ਬਰਕਰਾਰ ਰੱਖਿਆ। ਵੇਰਵੇ ਅਨੁਸਾਰ ਉਕਤ ਜੋੜੇ ਦਾ ਵਿਆਹ 1992 ਵਿੱਚ ਹੋਇਆ ਸੀ ਜਿਸ ਤੋਂ ਬਾਅਦ ਦੋਵਾਂ ਵਿਚਕਾਰ ਹਮੇਸ਼ਾ ਮਨ- ਮਟਾਵ ਰਿਹਾ । ਪਤਨੀ ਸਰਕਾਰੀ ਨੌਕਰੀ ਕਰਦੀ ਸੀ ਅਤੇ ਪਤੀ ਪ੍ਰਾਈਵੇਟ ਨੌਕਰੀ ਕਰਦਾ ਸੀ। ਪਤਨੀ ਅਕਸਰ ਆਪਣੀ ਵੱਧ ਤਨਖ਼ਾਹ ਦਾ ਤਾਅਨਾ ਪਤੀ ਨੂੰ ਮਾਰਦੀ ਰਹਿੰਦੀ ਸੀ। ਦੋਵਾਂ ਵਿਚਕਾਰ ਅਕਸਰ ਝਗੜਾ ਰਹਿੰਦਾ ਸੀ। ਪਤਨੀ ਬੇਟੀ ਦੇ ਸਾਹਮਣੇ ਹੀ ਪਤੀ ਨੂੰ ਬੇਇੱਜ਼ਤ ਕਰਦੀ ਸੀ। ਪਤਨੀ ਨੇ ਪਤੀ ਦੀ ਕੰਪਨੀ ਨੂੰ ਉਸ ਦੀਆਂ ਕਈਵਾਰ ਸ਼ਿਕਾਇਤਾਂ ਕੀਤੀਆਂ ਜਿਸ ਕਰਕੇ ਪਤੀ ਨੂੰ ਨੌਕਰੀ ਤੋਂ ਅਸਤੀਫ਼ਾ ਦੇਣਾ ਪਿਆ। ਇਸ ਤੋਂ ਇਲਾਵਾ ਪਤਨੀ ਨੇ ਆਪਣੇ ਪਤੀ ਦੇ ਖਿਲਾਫ਼ ਕਈ ਮੁਕੱਦਮੇ ਵੀ ਦਰਜ ਕਰਵਾਏ ਪ੍ਰੰਤੂ ਹਰ ਵਾਰ ਜਾਂਚ ਦੌਰਾਨ ਪਤੀ ਬੇਕਸੁੂਰ ਸਾਬਤ ਹੁੰਦਾ ਰਿਹਾ। ਆਖਿਰ ! ਪਤੀ ਨੇ ਫਰੀਦਾਬਾਦ ਦੀ ਫੈਮਲੀ ਕੋਰਟ ਵਿੱਚ ਤਲਾਕ ਦੀ ਅਰਜ਼ੀ ਦਾਇਰ ਕਰ ਦਿੱਤੀ ਅਤੇ ਕੋਰਟ ਨੇ ਪਤੀ ਦੇ ਹੱਕ ’ ਫੈਸਲਾ ਦਿੰਦੇ ਹੋਏ ਤਲਾਕ ਦੇ ਦਿੱਤਾ ਪ੍ਰੰਤੂ ਪਤਨੀ ਨੇ ਫੈਮਲੀ ਕੋਰਟ ਦੇ ਤਲਾਕ ਦੇ ਫੈਸਲੇ ਨੂੰ ਹਾਈਕੋਰਟ ’ਚ ਚਣੌਤੀ ਦਿੱਤੀ। ਹਾਈਕੋਰਟ ਨੇ ਸੁਣਵਾਈ ਦੌਰਾਨ ਸਾਰੇ ਮਾਮਲੇ ਦੀ ਪੂਰੀ ਘੋਖ ਕਰਦੇ ਹੋਏ ਟਿੱਪਣੀਆਂ ਕੀਤੀਆਂ ਕਿ ‘‘ਪਤਨੀ ਦੀਆਂ ਝੂਠੀਆਂ ਸ਼ਿਕਾਇਤਾਂ ਕਾਰਨ ਪਤੀ ਨੂੰ ਨੌਕਰੀ ਗਵਾਉਣੀ ਪਈ, ਵਾਰ-ਵਾਰ ਆਪਣੀ ਬੇਟੀ ਸਾਹਮਣੇ ਬੇਇੱਜ਼ਤੀ ਦਾ ਸਾਹਮਣਾ ਕਰਨਾ ਪਿਆ, ਪਤਨੀ ਦੀਆਂ ਸਾਰੀਆਂ ਸ਼ਿਕਾਇਤਾਂ ਝੂਠੀਆਂ ਸਾਬਤ ਹੁੰਦੀਆਂ ਰਹੀਆਂ , ਵਿਆਹ ਤੋਂ ਲੈ ਕੇ ਪਤਨੀ ਦੇ ਮਾੜੇ ਵਤੀਰੇ ਕਾਰਨ ਪਤੀ ਨੂੰ ਮਾਨਸਿਕ ਦੁੱਖ ਝੱਲਣਾ ਪਿਆ’’। ਇਸ ਲਈ ਪਤਨੀ ਦੇ ਅਜਿਹੇ ਵਤੀਰੇ ਨੂੰ ਬੇਰਹਿਮ ਮੰਨਦੇ ਹੋਏ ਹਾਈਕੋਰਟ ਨੇ ਪਤਨੀ ਨੂੰ ਜ਼ਾਲਮ ਕਰਾਰ ਦਿੱਤਾ ਅਤੇ ਫੈਮਲੀ ਕੋਰਟ ਵੱਲੋਂ ਦਿੱਤੇ ਤਲਾਕ ਦੇ ਫ਼ੈਸਲੇ ਸੰਬੰਧੀ ਪਤੀ ਦੇ ਹੱਕ ’ਚ ਮੋਹਰ ਲਗਾ ਦਿੱਤੀ।
