ਚੰਡੀਗੜ੍ਹ,14 ਦਸੰਬਰ-ਇਹ ਮਾਮਲਾ ਚੰਡੀਗੜ੍ਹ ਜ਼ਿਲ੍ਹਾ ਅਦਾਲਤ ‘ਚ ਇੱਕ ਕੇਸ ਦੀ ਸੁਣਵਾਈ ਦਾ ਹੈ। ਪਤੀ-ਪਤਨੀ ਇਕੱਠੇ ਨਹੀਂ ਰਹਿਣਾ ਚਾਹੁੰਦੇ ਸਨ। ਪਤਨੀ ਨੇ ਪਤੀ ਉਪਰ ਖਰਚੇ ਦਾ ਕੇਸ ਪਾ ਦਿੱਤਾ। ਪਤਨੀ 80 ਹਜ਼ਾਰ ਪ੍ਰਤੀ ਮਹੀਨਾ ਮੰਗ ਰਹੀ ਸੀ ਜਾਂ ਫਿਰ 15 ਲੱਖ ਉੱਕਾ ਪੁੱਕਾ ਮੰਗ ਰਹੀ ਸੀ ਪ੍ਰੰਤੂ ਪਤੀ 12 ਲੱਖ ਉੱਕਾ-ਪੁੱਕਾ ਦੇ ਕੇ ਰਿਸ਼ਤਾ ਖਤਮ ਕਰਨਾ ਚਾਹੁੰਦਾ ਸੀ, ਮਾਮਲਾ ਕਿਸੇ ਪਾਸੇ ਨਹੀਂ ਲੱਗ ਰਿਹਾ ਸੀ। ਕੇਸ ਦੀ ਸੁਣਵਾਈ ਕਰ ਰਹੇ ਜਿਲਾ ਅਦਾਲਤ ਵਿੱਚ ਜੁਡੀਸ਼ੀਅਰ ਮੈਜਿਸਟਰੇਟ ਸ੍ਰੀ ਭਰਤ ਦੋਵੇਂ ਧਿਰਾਂ ਨੂੰ ਅਦਾਲਤ ਦੇ ਚੱਕਰਾਂ ਤੋਂ ਬਚਾਉਣਾ ਚਾਹੁੰਦੇ ਸਨ। ਆਖ਼ਰ ! ਜੱਜ ਨੇ ਆਪਣੀ ਜੇਬ ਵਿੱਚੋਂ ਲੜਕੀ ਵਾਲੇ ਪੱਖ ਨੂੰ 11000 ਆਪਣੇ ਕੋਲੋਂ ਦੇ ਕੇ ਮਾਮਲਾ 12 ਲੱਖ 11 ਹਜ਼ਾਰ ਰੁਪਏ ਵਿੱਚ ਨਿਬੇੜ ਦਿੱਤਾ ਅਤੇ ਕੇਸ ਖਤਮ ਕਰਵਾ ਦਿੱਤਾ । ਚੰਡੀਗੜ੍ਹ ਜ਼ਿਲ੍ਹਾ ਅਦਾਲਤ ਵਿੱਚ ਜੱਜ ਦੇ ਇਸ ਫੈਸਲੇ ਦੀ ਸ਼ਲਾਘਾ ਹੋ ਰਹੀ ਹੈ। ਇਸ ਕੇਸ ਦੀ ਸੁਣਵਾਈ ਦੌਰਾਨ ਜੱਜ ਨੇ ਨੋਟ ਕੀਤਾ ਕਿ ਪਤਨੀ ਕਿਸੇ ਵੀ ਹਾਲਤ ਵਿੱਚ ਪਤੀ ਨਾਲ ਨਹੀਂ ਰਹਿਣਾ ਚਾਹੁੰਦੀ ਤੇ ਪਤੀ ਵੀ ਰਿਸ਼ਤੇ ਨੂੰ ਖਤਮ ਕਰਨਾ ਚਾਹੁੰਦਾ ਹੈ। ਪਤੀ ਇੱਕ ਪ੍ਰਾਈਵੇਟ ਯੂਨੀਵਰਸਿਟੀ ਵਿੱਚ ਚੰਗੀ ਪੋਸਟ ‘ਤੇ ਨੌਕਰੀ ਕਰ ਰਿਹਾ ਹੈ ਤੇ ਉਸਦੇ ਯੂਪੀ ਵਿੱਚ ਅੰਬਾਂ ਦੇ ਬਾਗ ਵੀ ਹਨ। ਪਤੀ ਦੀ ਚੰਗੀ ਆਮਦਨ ਹੋਣ ਕਰਕੇ ਪਤਨੀ ਜ਼ਿਆਦਾ ਪੈਸੇ ਮੰਗ ਰਹੀ ਸੀ। ਪਤਨੀ ਦਾ ਕਹਿਣਾ ਹੈ ਕਿ ਉਹ 2021 ਤੋਂ ਆਪਣੇ ਮਾਪਿਆਂ ਕੋਲ ਰਹਿ ਰਹੀ ਹੈ ਉਸ ਕੋਲ ਕਮਾਈ ਦਾ ਕੋਈ ਸਾਧਨ ਨਹੀਂ ਹੈ। ਉਹ ਮਾਪਿਆਂ ‘ਤੇ ਵੀ ਇੱਕ ਤਰੀਕੇ ਨਾਲ ਬੋਝ ਬਣ ਕੇ ਹੀ ਰਹਿ ਰਹੀ ਹੈ। ਅਦਾਲਤ ਵਿੱਚ ਪਤਨੀ ਦੀ ਦਲੀਲ ਸੀ ਕਿ ਉਸਦੇ ਪਤੀ ਨੇ ਲੰਘ ਚੁੱਕੇ ਸਮੇਂ ਵਿੱਚ ਉਸ ਨੂੰ ਬਹੁਤ ਜ਼ਿਆਦਾ ਹੈਰਾਨ-ਪਰੇਸ਼ਾਨ ਕੀਤਾ, ਇਸ ਕਰਕੇ ਉਹ ਕਿਸੇ ਵੀ ਹਾਲਤ ਵਿੱਚ ਪਤੀ ਦੇ ਨਾਲ ਨਹੀਂ ਰਹਿਣਾ ਚਾਹੁੰਦੀ। ਪਤੀ ਧਿਰ ਦੇ ਵਕੀਲ ਰਮਨ ਸਿਹਾਗ ਨੇ ਕਿਹਾ ਕਿ ਜੇਕਰ ਖਰਚੇ ਦਾ ਕੇਸ ਸ਼ੁਰੂ ਹੋ ਜਾਂਦਾ ਤਾਂ ਕਈ ਸਾਲ ਤੱਕ ਚੱਲਣਾ ਸੀ। ਵਕੀਲ ਨੇ ਕਿਹਾ ਕਿ ਜੱਜ ਦਾ 11000 ਆਪਣੇ ਕੋਲੋਂ ਕੁੜੀ ਨੂੰ ਸ਼ਗਨ ਦੇਣ ਦਾ ਫੈਸਲਾ ਸ਼ਲਾਘਾਯੋਗ ਹੈ ਜਿਸ ਨਾਲ ਕੇਸ ਖਤਮ ਹੋ ਗਿਆ । ਕੇਸ ਦੀ ਸੁਣਵਾਈ ਦੌਰਾਨ ਜਦੋਂ ਜੱਜ ਨੇ ਆਪਣੇ ਕੋਲੋਂ 11000 ਦੇਣੇ ਚਾਹੇ ਪਹਿਲਾਂ ਪਤੀ ਪਤਨੀ ਦੋਵੇਂ ਧਿਰਾਂ ਨੇ ਜੱਜ ਤੋਂ ਪੈਸੇ ਲੈਣ ਤੋਂ ਨਾਂਹ ਕਰ ਦਿੱਤੀ ਪ੍ਰੰਤੂ ਜੱਜ ਨੇ ਆਪਣੇ ਸਟਾਫ਼ ਮੈਂਬਰ ਨੂੰ ਆਪਣਾ ਏਟੀਐਮ ਦੇ ਕੇ ਤੁਰੰਤ 11000 ਕਢਵਾ ਕੇ ਲਿਆਉਣ ਲਈ ਭੇਜਿਆ, ਜਦ ਜੱਜ ਦਾ ਸਟਾਫ਼ ਮੈਂਬਰ 11000 ਕਢਵਾ ਕੇ ਲਿਆਇਆ ਤਾਂ ਜੱਜ ਨੇ ਪਤੀ ਦੇ ਵਕੀਲ ਨੂੰ ਇਹ 11000 ਦੇ ਕੇ ਕਿਹਾ ਕਿ ਇਹ 12 ਲੱਖ ਰੁਪਏ ਵਿੱਚ ਜੋੜ ਕੇ ਪਤਨੀ ਧਿਰ ਨੂੰ ਦੇ ਦੇਵੋ ਅਤੇ ਮਾਮਲੇ ਨੂੰ ਖਤਮ ਕਰੋ । ਮਾਨਯੋਗ ਜੱਜ ਦੀ ਇਸ ਪਹਿਲਕਦਮੀ ‘ਤੇ ਦੋਵੇਂ ਧਿਰਾਂ ਸਹਿਮਤ ਹੋ ਗਈਆਂ। ਹੁਣ ਦੋਵੇਂ ਧਿਰਾਂ ਆਪਸੀ ਸਹਿਮਤੀ ਨਾਲ ਤਲਾਕ ਲੈਣਗੀਆਂ।