-SSP ਅਮਨੀਤ ਕੌਂਡਲ ਨੇ ਖੁਦ ਕੀਤੀ ਪੁੱਛਗਿੱਛ
ਚੰਡੀਗੜ੍ਹ, 7 ਅਪ੍ਰੈਲ, Gee98 News service
ਬਠਿੰਡਾ ਵਿਖੇ ਚਿੱਟੇ ਸਮੇਤ ਫੜੀ ਗਈ ਬਰਖਾਸਤ ਮਹਿਲਾ ਕਾਂਸਟੇਬਲ ਅਮਨਦੀਪ ਕੌਰ ਨੇ ਦੋ ਦਿਨਾਂ ਦੇ ਪੁਲਿਸ ਰਿਮਾਂਡ ‘ਚ ਪੁੱਛਗਿੱਛ ਦੌਰਾਨ ਪੁਲਿਸ ਦੇ ਕੁਝ ਹੱਥ ਪੱਲੇ ਨਹੀਂ ਪਾਇਆ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਜਾਂਚ ਟੀਮ ਵੱਲੋਂ ਕੀਤੀ ਪੁੱਛਗਿਛ ਦੌਰਾਨ ਅਮਨਦੀਪ ਕੌਰ ਨੇ ਦੱਸਿਆ ਕਿ ਉਸ ਨੂੰ ਮਹਿੰਗੀਆਂ ਐਨਕਾਂ ਅਤੇ ਕਾਰਾਂ ਉਸਦੀ ਵਿਦੇਸ਼ ਰਹਿੰਦੀ ਇੱਕ ਸਹੇਲੀ ਨੇ ਤੋਹਫੇ ਵਜੋਂ ਦਿੱਤੀਆਂ ਹਨ। ਇਸ ਤੋਂ ਇਲਾਵਾ ਬਠਿੰਡਾ ਦੀ ਇੱਕ ਕਲੋਨੀ ਵਿੱਚ ਉਸਨੇ ਆਪਣੇ ਭਰਾ ਭਰਜਾਈ ਦੇ ਨਾਮ ‘ਤੇ ਪਲਾਟ ਵੀ ਖਰੀਦੇ ਹਨ। ਅਮਨਦੀਪ ਕੋਲ ਇੱਕ ਪਹਿਲਾਂ ਵੀ ਪੁਰਾਣੀ ਥਾਰ ਹੁੰਦੀ ਸੀ ਜੋ ਉਸਨੇ ਇੱਕ ਪੁਲਿਸ ਕਰਮਚਾਰੀ ਦੇ ਜਵਾਈ ਨੂੰ ਵੇਚ ਕੇ ਨਵੀਂ ਥਾਰ ਖਰੀਦੀ ਸੀ ਇਸ ਤੋਂ ਇਲਾਵਾ ਉਸਨੇ ਆਪਣੇ ਜੀਜੇ ਨੂੰ ਨਵਾਂ ਬੁਲੇਟ ਮੋਟਰਸਾਈਕਲ ਵੀ ਖਰੀਦ ਕੇ ਤੋਹਫੇ ਵਿੱਚ ਦਿੱਤਾ ਅਤੇ ਕੁਝ ਦਿਨ ਪਹਿਲਾਂ ਹੀ ਉਸਨੇ ਮਹਿੰਗੇ ਸੋਨੇ ਦੇ ਗਹਿਣੇ ਵੀ ਖਰੀਦੇ ਹਨ। ਇਸ ਵੇਲੇ ਅਮਨਦੀਪ ਕੌਰ ਕੋਲ ਇੱਕ ਥਾਰ ਤੇ ਇੱਕ ਵਰਨਾ ਕਾਰ ਹੈ, ਪੁੱਛਗਿਛ ਦੌਰਾਨ ਇਹ ਵੀ ਸਾਹਮਣੇ ਆਇਆ ਹੈ ਕਿ ਉਸਦੇ ਦੋ ਪਲਾਟ ਵੀ, ਇਹਨਾਂ ਵਿੱਚੋਂ ਇੱਕ ਪਲਾਟ ਦੀ ਕੀਮਤ 50 ਲੱਖ ਤੋਂ ਵੀ ਵੱਧ ਦੱਸੀ ਜਾ ਰਹੀ। ਅਮਨਦੀਪ ਕੌਰ ਇੱਕ ਪਾਲਤੂ ਕੁੱਤਾ ਵੀ ਹੈ ਜਿਸ ਦੀ ਕੀਮਤ 60 ਹਜ਼ਾਰ ਤੋਂ ਲੈ ਕੇ ਡੇਢ ਲੱਖ ਰੁਪਏ ਤੱਕ ਦੱਸੀ ਜਾ ਰਹੀ ਹੈ। ਹੈਰਾਨੀਜਨਕ ਤੱਥ ਇਹ ਵੀ ਸਾਹਮਣੇ ਆ ਰਹੇ ਹਨ ਕਿ ਅਮਨਦੀਪ ਕੌਰ ਭਾਵੇਂ ਲਗਜ਼ਰੀ ਲਾਈਫ ਜਿਉਂ ਰਹੀ ਹੈ ਪ੍ਰੰਤੂ ਉਸਦੇ ਆਪਣੇ ਨਾਮ ‘ਤੇ ਸਿਰਫ ਇੱਕ ਸਕੂਟਰੀ ਹੀ ਹੈ। ਦੋ ਦਿਨਾਂ ਦੇ ਪੁਲਿਸ ਰਿਮਾਂਡ ਦੌਰਾਨ ਉਕਤ ਜਾਣਕਾਰੀ ਪੁਲਿਸ ਭਾਵੇਂ ਪ੍ਰਾਪਤ ਕਰਨ ਵਿੱਚ ਕਾਮਯਾਬ ਰਹੀ ਪਰੰਤੂ ਅਮਨਦੀਪ ਕੌਰ ਦੀ ਨਸ਼ੇ ਦੀ ਤਸਕਰੀ ‘ਚ ਸ਼ਮੂਲੀਅਤ ਬਾਰੇ ਪੁਲਿਸ ਬਹੁਤਾ ਕੁਝ ਹਾਸਲ ਨਹੀਂ ਕਰ ਸਕੀ ਜਾਂ ਫਿਰ ਪੁਲਿਸ ਮੀਡੀਆ ਨੂੰ ਦੱਸਣਾ ਨਹੀਂ ਚਾਹੁੰਦੀ। ਸੂਤਰਾਂ ਅਨੁਸਾਰ ਅਮਨਦੀਪ ਕੌਰ ਇਹ ਮੰਨ ਹੀ ਨਹੀਂ ਰਹੀ ਕਿ ਉਸ ਦੀ ਨਸ਼ਾ ਤਸਕਰੀ ਵਿੱਚ ਸ਼ਮੂਲੀਅਤ ਹੈ, ਬਲਕਿ ਉਹ ਆਪਣੀ ਲਗਜ਼ਰੀ ਲਾਈਫ ਸਬੰਧੀ ਜਾਂਚ ਟੀਮ ਨੂੰ ਭਟਕਾ ਰਹੀ ਹੈ। ਜਾਂਚ ਟੀਮ ਵੱਲੋਂ ਉਸ ਦੀ ਲਗਜ਼ਰੀ ਲਾਈਫ ਸਬੰਧੀ ਕੀਤੇ ਸਵਾਲਾਂ ਦੇ ਜਵਾਬ ਉਹ ਤੋਹਫ਼ੇ ਵਜੋ ਮਿਲੀਆਂ ਸਾਰੀਆਂ ਵਸਤਾਂ ਵੱਲ ਹੀ ਲਿਜਾ ਰਹੀ ਹੈ। ਸੂਤਰਾਂ ਅਨੁਸਾਰ ਬਠਿੰਡਾ ਦੇ ਐਸਐਸਪੀ ਅਮਨੀਤ ਕੌਂਡਲ ਨੇ ਖੁਦ ਵੀ ਅਮਨਦੀਪ ਕੌਰ ਤੋਂ ਪੁੱਛਗਿਛ ਕੀਤੀ ਹੈ। ਇਸ ਤੋਂ ਇਲਾਵਾ ਮੋਹਾਲੀ ਤੋਂ ਆਈ ਇਕ ਵਿਸ਼ੇਸ਼ ਜਾਂਚ ਟੀਮ ਨੇ ਵੀ ਅਮਨਦੀਪ ਕੌਰ ਤੋਂ ਪੁੱਛਗਿਛ ਕੀਤੀ। ਜਾਂਚ ਟੀਮ ਹੁਣ ਅਮਨਦੀਪ ਕੌਰ ਦੇ ਦੋਵੇਂ ਮੋਬਾਇਲ ਫੋਨਾਂ ਦੀ ਕਾਲ ਡਿਟੇਲ ਖੰਗਾਲ ਰਹੀ ਹੈ ਤਾਂ ਜੋ ਉਸਦੀ ਨਸ਼ਾ ਤਸਕਰੀ ਦੇ ਹੋਰ ਸੰਬੰਧਾਂ ਦਾ ਪਤਾ ਲਗਾਇਆ ਜਾ ਸਕੇ। ਸੂਤਰਾਂ ਅਨੁਸਾਰ ਇਹ ਵੀ ਸਾਹਮਣੇ ਆਇਆ ਹੈ ਕਿ ਅਮਨਦੀਪ ਕੌਰ ਨੂੰ ਇੱਕ ਨਹੀਂ ਸਗੋਂ ਦੋ ਆਈਪੀਐਸ ਅਧਿਕਾਰੀਆਂ ਦਾ ਥਾਪੜਾ ਹਾਸਿਲ ਸੀ ਜਿਸ ਦੇ ਬਲਬੂਤੇ ‘ਤੇ ਉਹ ਨਸ਼ਾ ਤਸਕਰੀ ਦੀ ਖੁੱਲ੍ਹੀ ਖੇਡ, ਖੇਡ ਰਹੀ ਸੀ ਅਤੇ ਗ੍ਰਿਫਤਾਰੀ ਤੋਂ ਬਚ ਰਹੀ ਸੀ। ਪੁਲਿਸ ਸੂਤਰਾਂ ਅਨੁਸਾਰ ਜੇਕਰ ਉਸ ਦੀ ਗ੍ਰਿਫਤਾਰੀ ਮੌਕੇ ਐਂਟੀ ਨਾਰਕੋਟਿਕਸ ਦੀ ਟੀਮ ਨਾ ਹੁੰਦੀ ਤਾਂ ਅਮਨਦੀਪ ਨੂੰ ਹੁਣ ਵੀ ਗ੍ਰਿਫ਼ਤਾਰ ਕਰਨਾ ਔਖਾ ਸੀ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਅਮਨਦੀਪ ਕੌਰ ਨੂੰ ਗ੍ਰਿਫਤਾਰ ਕਰਨ ਦੀ ਯੋਜਨਾ ਐਂਟੀ ਨਾਰਕੋਟਿਕਸ ਟਾਸਕ ਫੋਰਸ ਨੇ ਬਣਾਈ ਸੀ ਜਿਸ ਦੇ ਮੁਖੀ ਆਈਪੀਐਸ ਅਧਿਕਾਰੀ ਨਿਲਾਂਭ ਕਿਸ਼ੋਰ ਹਨ, ਜਿਨਾਂ ਦਾ ਨਾਮ ਆਪਣੇ ਡਿਊਟੀ ਪ੍ਰਤੀ ਫਰਜ਼ਾਂ ਨੂੰ ਮੰਨਣ ਵਾਲੇ ਅਫਸਰਾਂ ਦੀ ਕਤਾਰ ਵਿੱਚ ਸਿਖ਼ਰ ‘ਤੇ ਹੈ। ਉਨਾਂ ਨੇ ਹੀ ਮੋਹਾਲੀ ਤੋਂ ਅਮਨਦੀਪ ਕੌਰ ਨੂੰ ਦਬੋਚਣ ਲਈ ਵਿਸ਼ੇਸ਼ ਟੀਮ ਭੇਜੀ ਸੀ ਜਿਸ ਨੇ ਬਠਿੰਡਾ ਪੁਲਿਸ ਨਾਲ ਸਾਂਝੇ ਆਪਰੇਸ਼ਨ ਦੌਰਾਨ ਅਮਨਦੀਪ ਕੌਰ ਨੂੰ ਪੱਕੀ ਸੂਚਨਾ ਦੇ ਆਧਾਰ ਤੇ ਨਾਕਾ ਲਗਾ ਕੇ ਗ੍ਰਿਫਤਾਰ ਕੀਤਾ। ਬਠਿੰਡਾ ਪੁਲਿਸ ਵੱਲੋਂ ਇਸ ਮੌਕੇ ਥਾਣਾ ਸਦਰ ਬਠਿੰਡਾ ਦੇ ਐਸਐਚਓ ਵਜੋਂ ਕੰਮ ਕਰ ਰਹੇ ਸਿਖਲਾਈ ਅਧੀਨ ਆਈਪੀਐਸ ਅਧਿਕਾਰੀ ਅਨੁਭਵ ਜੈਨ ਵੀ ਸ਼ਾਮਿਲ ਸਨ, ਜਿਨਾਂ ਕੋਲ ਆਪਣੀ ਟ੍ਰੇਨਿੰਗ ਦੌਰਾਨ ਹੀ ਡਿਊਟੀ ਸਬੰਧੀ ਕੁਝ ਕਰ ਦਿਖਾਉਣ ਦਾ ਮੌਕਾ ਸੀ ਅਤੇ ਉਹ ਉਹਨਾਂ ਨੇ ਨਹੀਂ ਗਵਾਇਆ। ਸੂਤਰਾਂ ਅਨੁਸਾਰ ਗ੍ਰਿਫ਼ਤਾਰੀ ਮੌਕੇ ਅਮਨਦੀਪ ਕੌਰ ਨੇ ਐਸਐਚਓ ਅਨੁਭਵ ਜੈੈਨ ਨੂੰ ਉੱਚ ਪੁਲਿਸ ਅਧਿਕਾਰੀਆਂ ਨਾਲ ਵਾਰ-ਵਾਰ ਗੱਲ ਕਰਨ ਲਈ ਦਬਾਅ ਬਣਾਇਆ ਪ੍ਰੰਤੂ ਐਸਐਚਓ ਨੇ ਉਸਦੇ ਦੋਵੇਂ ਫੋਨ ਹੀ ਜ਼ਬਤ ਕਰ ਲਏ ਅਤੇ ਉਸਦੀ ਪੇਸ਼ ਨਾ ਜਾਣ ਦਿੱਤੀ। ਚਿੱਟੇ ਸਮੇਤ ਫੜੀ ਇਸ ਮਹਿਲਾ ਹੈਡਕਾਂਸਟੇਬਲ ਦੀ ਆਲੀਸ਼ਾਨ ਕੋਠੀ ਸਬੰਧੀ ਵੀ ਇੱਕ ਹੋਰ ਪੱਖ ਸਾਹਮਣੇ ਆ ਰਿਹਾ ਹੈ। ਸੂਤਰਾਂ ਅਨੁਸਾਰ ਇਹ ਕੋਠੀ ਅਮਨਦੀਪ ਦੇ ਇੱਕ ਮੁਕਤਸਰ ਵਾਸੀ ਦੋਸਤ ਦੀ ਸੀ ਜਿਸ ਨੂੰ ਉਸਨੇ ਬਲਾਤਕਾਰ ਦੇ ਕੇਸ ਵਿੱਚ ਅੰਦਰ ਕਰਵਾ ਦਿੱਤਾ ਅਤੇ ਹੁਣ ਇਸ ਕੋਠੀ ‘ਤੇ ਅਮਨਦੀਪ ਖੁਦ ਕਬਜ਼ਾ ਕਰਕੇ ਰਹਿ ਰਹੀ ਹੈ। ਜਿਸ ਵੇਲੇ ਤੋਂ ਅਮਨਦੀਪ ਇਸ ਕੋਠੀ ਵਿੱਚ ਰਹਿਣ ਲੱਗੀ ਉਸ ਵੇਲੇ ਇਸ ਦੀ ਕੀਮਤ 50 ਲੱਖ ਰੁਪਏ ਸੀ ਅਤੇ ਹੁਣ ਇਸ ਦੀ ਕੀਮਤ ਦੋ ਕਰੋੜ ਤੋਂ ਉੱਪਰ ਦੱਸੀ ਜਾ ਰਹੀ ਹੈ। ਅਮਨਦੀਪ ਕੌਰ ਦੀ ਬਠਿੰਡਾ ਵਿਖੇ ਡਿਊਟੀ ਸਬੰਧੀ ਵੀ ਹੈਰਾਨੀਜਨਕ ਤੱਥ ਸਾਹਮਣੇ ਆ ਰਹੇ ਹਨ। ਅਮਨਦੀਪ ਕੌਰ ਦੀ ਡਿਊਟੀ ਮਾਨਸਾ ਸੀ ਪਰ ਉਸ ਨੂੰ ਬਠਿੰਡਾ ਅਟੈਚ ਕੀਤਾ ਹੋਇਆ ਸੀ। ਪੁਲਿਸ ਸੂਤਰਾਂ ਅਨੁਸਾਰ ਇੱਕ ਜ਼ਿਲ੍ਹੇ ਤੋਂ ਦੂਜੇ ਜ਼ਿਲ੍ਹੇ ਵਿੱਚ ਇਸ ਤਰ੍ਹਾਂ ਕਿਸੇ ਮੁਲਾਜ਼ਮ ਨੂੰ ਡੀਆਈਜੀ ਰੈਂਕ ਦਾ ਅਧਿਕਾਰੀ ਹੀ ਭੇਜ ਸਕਦਾ ਹੈ। ਹੁਣ ਇਹ ਵੀ ਵੱਡੇ ਸਵਾਲ ਖੜੇ ਹੁੰਦੇ ਹਨ ਕਿ ਅਮਨਦੀਪ ਕੌਰ ਨੂੰ ਮਾਨਸਾ ਤੋਂ ਬਠਿੰਡਾ ਕਿਸ ਦੇ ਹੁਕਮਾਂ ‘ਤੇ ਭੇਜਿਆ ਗਿਆ ਅਤੇ ਉਸ ਦੀ ਇਸ ਡਿਊਟੀ ਪ੍ਰਕਿਰਿਆ ਸਬੰਧੀ ਹੁਣ ਤੱਕ ਸਾਰੇ ਅਫਸਰ ਚੁੱਪ ਕਿਉਂ ਸਨ। ਬਠਿੰਡਾ ਪੁਲਿਸ ਨੇ ਅਮਨਦੀਪ ਕੌਰ ਦਾ ਦੋ ਦਿਨਾਂ ਦੇ ਰਿਮਾਂਡ ਤੋਂ ਬਾਅਦ ਦੋ ਦਿਨਾਂ ਦਾ ਹੋਰ ਰਿਮਾਂਡ ਹਾਸਿਲ ਕੀਤਾ ਹੈ। ਲੋਕਾਂ ਦੀਆਂ ਨਜ਼ਰਾਂ ਇਸ ‘ਤੇ ਲੱਗੀਆਂ ਹਨ ਕਿ ਦੋ ਦਿਨਾਂ ਦੇ ਰਿਮਾਂਡ ਦੌਰਾਨ ਕੀ ਬਠਿੰਡਾ ਪੁਲਿਸ ਅਮਨਦੀਪ ਦੀ ਨਸ਼ਾ ਤਸਕਰੀ ਦੇ ਵੱਡੇ ਸੰਬੰਧਾਂ ਤੱਕ ਪੁੱਜ ਸਕੇਗੀ ਜਾਂ ਫਿਰ ਅਮਨਦੀਪ ਕੌਰ ਦੀ ਕਹਾਣੀ ਨੂੰ ਨਸ਼ੇ ਦੇ ਕਾਰੋਬਾਰ ‘ਚ ਸ਼ਾਮਲ ਫੜੇ ਗਏ ਹੋਰ ਪੁਲਿਸ ਮੁਲਾਜ਼ਮਾਂ ਦੀ ਕਹਾਣੀ ਵਾਂਗ ਖਤਮ ਕਰ ਦਿੱਤਾ ਜਾਵੇਗਾ ਕਿਉਂਕਿ ਹੁਣ ਤੱਕ ਦੀ ਪੁੱਛਗਿੱਛ ਦੌਰਾਨ ਸਾਹਮਣੇ ਆਏ ਤੱਥਾਂ ਤੋਂ ਤਾਂ ਇਹੋ ਜ਼ਾਹਰ ਹੁੰਦਾ ਹੈ ਕਿ ਇੰਸਟਾਗਰਾਮ ਦੀ ਰਾਣੀ ਨੂੰ ਪੁਲਿਸ ਨੇ ਦੋ ਦਿਨਾਂ ਦੇ ਰਿਮਾਂਡ ਦੌਰਾਨ ਰਾਣੀ ਵਾਂਗ ਹੀ ਰੱਖਿਆ ਹੈ। ਇਹ ਵੀ ਜਾਂਚ ਦਾ ਵਿਸ਼ਾ ਹੈ ਕਿ ਇਹ ਸਪਾਟਨ ਬੀਬੀ ਨੇ ਆਪਣੇ ਨਸ਼ਾ ਤਸਕਰੀ ਦੇ ਗੋਰਖ ਧੰਦੇ ਨੂੰ ਜਾਰੀ ਰੱਖਣ ਲਈ ਸਥਾਨਕ ਕਿਹੜੇ ਅਫਸਰਾਂ ਅਤੇ ਮੁਲਾਜ਼ਮਾਂ ਦੀਆਂ ਅੱਖਾਂ ਵਿੱਚ ਡੱਕਾ ਮਾਰਿਆ ਅਤੇ ਇਹ ਹੁਣ ਤੱਕ ਕਿਵੇਂ ਬਚਦੀ ਰਹੀ।
