ਚੰਡੀਗੜ੍ਹ, 9 ਮਈ, Gee98 news service
ਜੰਮੂ ਕਸ਼ਮੀਰ ਦੇ ਪਹਿਲਗਾਮ ਖੇਤਰ ਵਿੱਚ ਨਿਰਦੋਸ਼ ਭਾਰਤੀ ਨਾਗਰਿਕਾਂ ਦੇ ਕਤਲੇਆਮ ਤੋਂ ਬਾਅਦ ਭਾਰਤ ਵੱਲੋਂ ਪਾਕਿਸਤਾਨ ਦੇ ਖ਼ਿਲਾਫ਼ ਜਵਾਬੀ ਕਾਰਵਾਈ ਕੀਤੀ ਜਾ ਰਹੀ ਹੈ। ਭਾਰਤ ਵੱਲੋਂ ਆਪਰੇਸ਼ਨ ਸਿੰਧੂਰ ਤਹਿਤ ਪਾਕਿਸਤਾਨ ‘ਤੇ ਹਵਾਈ ਹਮਲੇ ਕੀਤੇ ਜਾ ਰਹੇ ਹਨ। ਇਸ ਦੌਰਾਨ ਸੋਸ਼ਲ ਮੀਡੀਆ ‘ਤੇ ਭਾਰਤ ਵੱਲੋਂ ਕੀਤੇ ਜਾ ਰਹੇ ਹਮਲਿਆਂ ਦੀਆਂ ਵੀਡੀਓਜ਼ ਅਤੇ ਪੋਸਟਾਂ ਪਾਈਆਂ ਜਾ ਰਹੀਆਂ ਹਨ, ਪਰੰਤੂ ਬਹੁਤ ਸਾਰੇ ਅਜਿਹੇ ਪੁਆਇੰਟ ਹਨ ਜਿਹੜੇ ਯੁੱਧ ਦੇ ਦਿਨਾਂ ਦੌਰਾਨ ਸੋਸ਼ਲ ਮੀਡੀਆ ਉੱਪਰ ਪੋਸਟਾਂ ਪਾਉਣ ਮੌਕੇ ਧਿਆਨ ਮੰਗਦੇ ਹਨ ਕਿਉਂਕਿ ਯੁੱਧ ਦੇ ਦਿਨਾਂ ਦੌਰਾਨ ਸੋਸ਼ਲ ਮੀਡੀਆ ‘ਤੇ ਕੀਤੀਆਂ ਗਈਆਂ ਕੁਝ ਗਤੀਵਿਧੀਆਂ ਕਾਨੂੰਨੀ ਤੌਰ ‘ਤੇ ਗੰਭੀਰ ਅਪਰਾਧ ਬਣ ਸਕਦੀਆਂ ਹਨ ਅਤੇ ਕੈਦ ਹੋ ਸਕਦੀ ਹੈ।
ਜੇਕਰ ਕੋਈ ਵਿਅਕਤੀ ਜੰਗ ਦੌਰਾਨ ਕਹਿੰਦਾ ਹੈ ਕਿ “ਫੌਜ ਹਾਰ ਰਹੀ ਹੈ”, “ਭਾਰਤ ‘ਤੇ ਕਬਜ਼ਾ ਹੋ ਗਿਆ ਹੈ” ਜਾਂ “ਸਰਕਾਰ ਝੂਠ ਬੋਲ ਰਹੀ ਹੈ” ਅਤੇ ਬਿਆਨ ਝੂਠਾ ਹੈ, ਤਾਂ ਇਸਨੂੰ ਦੇਸ਼ ਵਿਰੁੱਧ ਅਫਵਾਹਾਂ ਕਿਹਾ ਜਾਵੇਗਾ ਅਤੇ ਤੁਹਾਨੂੰ ਬੀਐਨਐਸ ਦੀ ਧਾਰਾ 197 (1) ਦੇ ਤਹਿਤ ਜੇਲ੍ਹ ਭੇਜਿਆ ਜਾ ਸਕਦਾ ਹੈ। ਜੇਕਰ ਕੋਈ ਪੁਰਾਣਾ ਜਾਂ ਨਕਲੀ ਵੀਡੀਓ ਸਾਂਝਾ ਕਰਦਾ ਹੈ ਜਿਸ ਵਿੱਚ ਬੰਬ ਡਿੱਗਦੇ ਜਾਂ ਲਾਸ਼ਾਂ ਪਈਆਂ ਦਿਖਾਈਆਂ ਜਾਂਦੀਆਂ ਹਨ ਅਤੇ ਕਹਿੰਦਾ ਹੈ ਕਿ ਇਹ ਹਾਲ ਹੀ ਵਿੱਚ ਹੋਇਆ ਹੈ, ਤਾਂ ਇਸਨੂੰ ਦੇਸ਼ ਵਿੱਚ ਡਰ ਅਤੇ ਭਰਮ ਫੈਲਾਉਣ ਵਾਲਾ ਕੰਮ ਮੰਨਿਆ ਜਾਵੇਗਾ ਅਤੇ ਆਈਟੀ ਐਕਟ ਦੇ ਤਹਿਤ ਇਸ ਲਈ ਸਖ਼ਤ ਸਜ਼ਾ ਦੀ ਵਿਵਸਥਾ ਹੈ।
ਜੇਕਰ ਕੋਈ ਜੰਗ ਦੌਰਾਨ ਪਾਕਿਸਤਾਨ ਜਾਂ ਕਿਸੇ ਦੁਸ਼ਮਣ ਦੇਸ਼ ਦੀ ਪ੍ਰਸ਼ੰਸਾ ਕਰਦਾ ਹੈ, ਉਨ੍ਹਾਂ ਦੇ ਝੰਡੇ ਸਾਂਝੇ ਕਰਦਾ ਹੈ ਜਾਂ ਲਿਖਦਾ ਹੈ ਕਿ “ਪਾਕਿਸਤਾਨ ਨੂੰ ਜਿੱਤਣਾ ਚਾਹੀਦਾ ਹੈ”, ਤਾਂ ਇਸਨੂੰ ਦੇਸ਼ਧ੍ਰੋਹ ਮੰਨਿਆ ਜਾ ਸਕਦਾ ਹੈ। ਜਿਸ ਵਿੱਚ, ਬੀਐਨਐਸ ਦੀ ਧਾਰਾ 152 ਦੇ ਤਹਿਤ, ਉਮਰ ਕੈਦ ਹੋ ਸਕਦੀ ਹੈ। ਜੇਕਰ ਕੋਈ ਸੋਸ਼ਲ ਮੀਡੀਆ ‘ਤੇ ਸੈਨਿਕਾਂ ਦੀ ਲੋਕੇਸ਼ਨ, ਆਪਰੇਸ਼ਨ ਦੀ ਜਾਣਕਾਰੀ ਸੋਸ਼ਲ ਮੀਡੀਆ ‘ਤੇ ਪੋਸਟ ਕਰਦਾ ਹੈ, ਜਿਵੇਂ ਕਿ “ਟੈਂਕ ਫਲਾਣੀ ਜਗ੍ਹਾ ‘ਤੇ ਪਹੁੰਚੇ”, ਤਾਂ ਇਸਨੂੰ ਸੁਰੱਖਿਆ ਵਿੱਚ ਉਲੰਘਣਾ ਮੰਨਿਆ ਜਾਵੇਗਾ। ਇਸ ਲਈ ਦੋਸ਼ੀ ਨੂੰ ਸਰਕਾਰੀ ਭੇਦ ਐਕਟ, 1923 ਦੇ ਤਹਿਤ ਸਜ਼ਾ ਦਿੱਤੀ ਜਾ ਸਕਦੀ ਹੈ। ਜੰਗ ਦੌਰਾਨ ਝੂਠੀਆਂ ਕਹਾਣੀਆਂ ਫੈਲਾਉਣਾ ਜਿਵੇਂ ਕਿ “ਭਾਰਤ ਨੇ ਖੁਦ ਹਮਲਾ ਕੀਤਾ” ਜਾਂ “ਸਾਡੀ ਫੌਜ ਨਿਰਦੋਸ਼ ਲੋਕਾਂ ਨੂੰ ਮਾਰ ਰਹੀ ਹੈ” ਨੂੰ ਮਨੋਵਿਗਿਆਨਕ ਯੁੱਧ ਮੰਨਿਆ ਜਾ ਸਕਦਾ ਹੈ ਅਤੇ ਇਸ ਨਾਲ ਲੰਬੀ ਕੈਦ ਹੋ ਸਕਦੀ ਹੈ।
