ਚੰਡੀਗੜ੍ਹ,28 ਸਤੰਬਰ, Gee98 news service
-ਪੰਜਾਬ ਵਿਜੀਲੈਂਸ ਬਿਊਰੋ ਨੇ ਦੋ ਪੱਤਰਕਾਰਾਂ ਨੂੰ ਰਿਸ਼ਵਤ ਲੈਂਦੇ ਹੋਏ ਰੰਗੇ ਹੱਥੀਂ ਕਾਬੂ ਕੀਤਾ ਹੈ। ਜਲੰਧਰ ਦੇ ਇਹ ਦੋਵੇਂ ਪੱਤਰਕਾਰ ਦੈਨਿਕ ਕੇਸਰੀ ਅਤੇ ਦੈਨਿਕ ਨਿਊਜ਼ ਨਾਮ ਦੀ ਵੈਬਸਾਈਟਾਂ ਦੇ ਸੰਪਾਦਕ ਹਨ। ਵਿਜੀਲੈਂਸ ਵੱਲੋਂ ਪ੍ਰਾਪਤ ਵੇਰਵੇ ਅਨੁਸਾਰ ਸ਼ਿਕਾਇਤ ਕਰਤਾ ਪਿਆਰੇ ਲਾਲ ਵਾਸੀ ਸੂਰਜ ਗੰਜ ਪੱਛਮੀ ਜਲੰਧਰ ਆਪਣੀ ਨਵੀਂ ਦੁਕਾਨ ਬਣਾ ਰਿਹਾ ਸੀ ਜਿਸ ਦਾ ਨਕਸ਼ਾ ਨਗਰ ਨਿਗਮ ਨੇ ਪਾਸ ਨਹੀਂ ਕੀਤਾ ਸੀ। ਜਦੋਂ ਪੱਤਰਕਾਰਾਂ ਨੂੰ ਇਸ ਦੀ ਭਿਣਕ ਲੱਗੀ ਕਿ ਪਿਆਰੇ ਲਾਲ ਨੇ ਬਿਨਾਂ ਨਕਸ਼ਾ ਪਾਸ ਕਰਵਾਏ ਦੁਕਾਨ ਦੀ ਉਸਾਰੀ ਸ਼ੁਰੂ ਕਰ ਦਿੱਤੀ ਹੈ ਤਾਂ ਦੈਨਿਕ ਕੇਸਰੀ ਦਾ ਮੁੱਖ ਸੰਪਾਦਕ ਅਖਵਾਉਣ ਵਾਲਾ ਪੱਤਰਕਾਰ ਪਵਨ ਵਰਮਾ ਅਤੇ ਦੈਨਿਕ ਨਿਊਜ਼ ਦਾ ਸੰਪਾਦਕ ਅਖਵਾਉਣ ਵਾਲਾ ਪੱਤਰਕਾਰ ਮਨੀਸ਼ ਤੋਖੀ ਸ਼ਿਕਾਇਤ ਕਰਤਾ ਪਿਆਰੇ ਲਾਲ ਕੋਲ ਗਏ ਤੇ ਬਿਨਾਂ ਨਕਸਾ ਪਾਸ ਕਰਵਾਏ ਕੀਤੀ ਜਾ ਰਹੀ ਦੁਕਾਨ ਦੀ ਉਸਾਰੀ ਦੀਆਂ ਫੋਟੋਆਂ ਖਿੱਚ ਲਈਆਂ। ਦੋਵੇਂ ਪੱਤਰਕਾਰਾਂ ਨੇ ਪਿਆਰੇ ਲਾਲ ਨੂੰ ਧਮਕੀ ਦਿੱਤੀ ਕਿ ਉਸ ਦੀ ਦੁਕਾਨ ਦੀ ਉਸਾਰੀ ਬੰਦ ਕਰਵਾ ਦਿੱਤੀ ਜਾਵੇਗੀ। ਇਸ ਦੌਰਾਨ ਪਵਨ ਵਰਮਾ ਨੇ ਪਿਆਰੇ ਲਾਲ ਨੂੰ ਕਿਹਾ ਕਿ ਜੇਕਰ ਉਹ ਕੁਝ ਪੈਸੇ ਉਹਨਾਂ ਨੂੰ ਦੇ ਦੇਵੇਗਾ ਤਾਂ ਉਹ ਦੁਕਾਨ ਦੀ ਉਸਾਰੀ ਨਗਰ ਨਿਗਮ ਕਰਮਚਾਰੀਆਂ ਨੂੰ ਢਾਹੁਣ ਨਹੀਂ ਦੇਣਗੇ ਕਿਉਂਕਿ ਨਗਰ ਨਿਗਮ ਵਿੱਚ ਉਹਨਾਂ ਦੀ ਚੰਗੀ ਪਹੁੰਚ ਹੈ। ਦੋਵੇਂ ਪੱਤਰਕਾਰਾਂ ਨੇ ਸ਼ਿਕਾਇਤ ਕਰਤਾ ਦੇ ਪਿਤਾ ਤੋਂ ਵੀ ਪੈਸੇ ਮੰਗਣੇ ਸ਼ੁਰੂ ਕਰ ਦਿੱਤੇ। ਜਿਸ ਤੋਂ ਬਾਅਦ ਪਿਆਰੇ ਲਾਲ ਨੇ 4000 ਪਵਨ ਵਰਮਾ ਦੇ ਮੋਬਾਈਲ ਅਕਾਊਂਟ ਵਿੱਚ ਪਾ ਦਿੱਤੇ ਅਤੇ ਬਾਕੀ 5000 ਫੇਰ ਦੇਣ ਦਾ ਵਾਅਦਾ ਕੀਤਾ। ਇਸ ਦੌਰਾਨ ਸ਼ਿਕਾਇਤ ਕਰਤਾ ਨੇ ਵਿਜੀਲੈਂਸ ਨਾਲ ਸੰਪਰਕ ਕੀਤਾ ਜਿਸ ਤੋਂ ਬਾਅਦ ਵਿਜੀਲੈਂਸ ਨੇ ਦੋਵੇਂ ਪੱਤਰਕਾਰਾਂ ਨੂੰ ਕਾਬੂ ਕਰਨ ਲਈ ਜਾਲ ਵਿਛਾਇਆ ਅਤੇ ਪੱਤਰਕਾਰ ਪਵਨ ਵਰਮਾ ਨੂੰ 5000 ਦੀ ਰਿਸ਼ਵਤ ਲੈਂਦੇ ਰੰਗੇ ਹੱਥੀ ਕਾਬੂ ਕੀਤਾ ਜਦਕਿ ਉਸਦੇ ਨਾਲ ਦਾ ਸਾਥੀ ਪੱਤਰਕਾਰ ਮਨੀਸ਼ ਤੋਖੀ ਮੌਕੇ ਤੋਂ ਫਰਾਰ ਹੋਣ ਵਿੱਚ ਕਾਮਯਾਬ ਹੋ ਗਿਆ। ਵਿਜੀਲੈਂਸ ਨੇ ਦੋਵੇਂ ਪੱਤਰਕਾਰਾਂ ਦੇ ਖ਼ਿਲਾਫ਼ ਭ੍ਰਿਸ਼ਟਾਚਾਰ ਦੀਆਂ ਧਾਰਾਵਾਂ ਤਹਿਤ ਮੁਕੱਦਮਾ ਦਰਜ ਕੀਤਾ ਹੈ। ਵਿਜੀਲੈਂਸ ਬੁਲਾਰੇ ਨੇ ਅੱਗੇ ਦੱਸਿਆ ਕਿ ਪੁੱਛਗਿੱਛ ਦੌਰਾਨ ਮੁਲਜ਼ਮ ਪਵਨ ਵਰਮਾ ਨੇ ਖੁਲਾਸਾ ਕੀਤਾ ਕਿ ਉਸ ਨੇ ਨਗਰ ਨਿਗਮ, ਜਲੰਧਰ ਤੋਂ ਮਨਜ਼ੂਰਸ਼ੁਦਾ ਨਕਸ਼ੇ ਨਾ ਮਿਲਣ ਕਾਰਨ ਇਮਾਰਤਾਂ ਨੂੰ ਐਮ.ਸੀ.ਜੇ. ਤੋਂ ਢਾਹੁਣ ਦੀ ਧਮਕੀ ਦੇ ਕੇ ਫਗਵਾੜਾ ਦੇ ਗਿਰੀਸ਼ ਕੁਮਾਰ ਤੋਂ ਯੂ.ਪੀ.ਆਈ. ਰਾਹੀਂ 2500 ਰੁਪਏ ਅਤੇ ਸ੍ਰੀ ਚੋਪੜਾ ਵਾਸੀ ਸੋਡਲ ਰੋਡ, ਨੇੜੇ ਕਾਲੀ ਮਾਤਾ ਮੰਦਿਰ, ਜਲੰਧਰ ਤੋਂ ਨਕਦ 5000 ਰੁਪਏ ਰਿਸ਼ਵਤ ਲਈ ਸੀ। ਵਿਜੀਲੈਂਸ ਬੁਲਾਰੇ ਨੇ ਕਿਹਾ ਕਿ ਉਹ ਇਸ ਗੱਲ ਦੀ ਪੜ੍ਹਤਾਲ ਕਰਨਗੇ ਕਿ ਇਹਨਾਂ ਪੱਤਰਕਾਰਾਂ ਨੇ ਹੋਰ ਕਿੰਨੇ ਵਿਅਕਤੀਆਂ ਤੋਂ ਇਸੇ ਤਰ੍ਹਾਂ ਰਿਸ਼ਵਤ ਲਈ ਹੈ। ਦੱਸ ਦੇਈਏ ਕਿ ਇਹ ਚਰਚਾ ਅਕਸਰ ਬਰਨਾਲਾ ਵਿੱਚ ਵੀ ਚਲਦੀ ਰਹਿੰਦੀ ਹੈ ਕਿ ਬਰਨਾਲਾ ‘ਚ ਵੀ ਅਜਿਹੇ ਕੁਝ ਪੱਤਰਕਾਰ ਹਨ ਜਿਹੜੇ ਕਾਲੋਨਾਈਜ਼ਰਾਂ ਅਤੇ ਆਮ ਸ਼ਹਿਰ ਵਾਸੀਆਂ ਨੂੰ ਨਕਸ਼ਾ ਪਾਸ ਕਰਵਾਉਣ ਅਤੇ ਉਨਾਂ ਦੇ ਕਾਰੋਬਾਰ ‘ਚ ਤਰੁੱਟੀਆਂ ਕੱਢ ਕੇ ਲੱਖਾਂ ਰੁਪਏ ਦੀ ਰਿਸ਼ਵਤ ਵਸੂਲ ਰਹੇ ਹਨ ਪਰ ਇਹਨਾਂ ਪੱਤਰਕਾਰਾਂ ਵੱਲ ਵਿਜੀਲੈਂਸ ਦੀ ਟੇਢੀ ਨਜ਼ਰ ਨਹੀਂ ਹੋਈ ਕਿਉਂਕਿ ਇਹਨਾਂ ਤੋਂ ਪੀੜ੍ਹਤ ਕਾਲੋਨਾਈਜ਼ਰ ਅਤੇ ਲੋਕ ਇਹਨਾਂ ਤੋਂ ਰਿਸਵਤ ਦਾ ਟੀਕਾ ਲਗਵਾ ਕੇ ਔਖੇ ਸੌਖੇ ਆਪਣਾ “ਪੁੜਾ” ਮਲ ਕੇ ਚੁੱਪ ਹੋ ਜਾਂਦੇ ਹਨ। ਜਲੰਧਰ ਦੇ ਉਕਤ ਪੱਤਰਕਾਰਾਂ ਵਾਂਗ ਬਰਨਾਲੇ ‘ਚ ਵੀ ਅਜਿਹੇ ਪੱਤਰਕਾਰਾਂ ਦਾ ਗੋਰਖਧੰਦਾ ਖੂਬ ਚੱਲ ਰਿਹਾ ਹੈ ਜਿਸ ਦੇ ਪੱਤਰਕਾਰ ਦੇ ਨਾਮ ‘ਤੇ ਕਲੰਕ ਲਗਾਇਆ ਹੋਇਆ ਹੈ।
Menu
