ਚੰਡੀਗੜ੍ਹ,13 ਫਰਵਰੀ, Gee98 News service
-ਵਿਕਾਸ ਕਾਰਜਾਂ ਦੇ ਉਦਘਾਟਨ ਲਈ ਰੱਖੇ ਗਏ ਨੀਂਹ ਪੱਥਰ ਤੋਂ ਜਦ ਮੰਤਰੀ ਜੀ ਪਰਦਾ ਹਟਾ ਰਹੇ ਸਨ ਤਾਂ ਦੇਖਿਆ ਕਿ ਪੱਥਰ ਉੱਪਰ ਹਲਕਾ ਵਿਧਾਇਕ ਦਾ ਨਾਮ ਦਰਜ ਨਹੀਂ ਸੀ ਪ੍ਰੰਤੂ ਹੈਰਾਨੀ ਇਸ ਗੱਲ ਦੀ ਨਿਕਲੀ ਕਿ ਇਸ ਪੱਥਰ ਉੱਪਰ ਹਲਕੇ ਤੋਂ ਬਾਹਰਲੇ ਵਿਧਾਇਕਾਂ ਦੇ ਨਾਮ ਮੰਤਰੀ ਦੇ ਨਾਮ ਨਾਲ ਦਰਜ ਸਨ। ਇਹ ਮਾਮਲਾ ਕੁਝ ਦਿਨ ਪਹਿਲਾਂ ਉਸ ਵੇਲੇ ਦਾ ਹੈ ਜਦ ਵਿਧਾਨ ਸਭਾ ਹਲਕਾ ਪਾਇਲ ਦੀ ਹਦੂਦ ਅੰਦਰ ਜੌੜੇਪੁਲ ਵਿੱਚ ਪੰਜਾਬ ਦੇ ਜਲ ਸਰੋਤ ਮੰਤਰੀ ਬਰਿੰਦਰ ਗੋਇਲ ਵੱਲੋਂ ਪਟਿਆਲਾ ਫੀਡਰ ਨਹਿਰ ਦੇ ਸਾਈਡ ਲਾਈਨਿੰਗ ਦੇ ਕੰਮ ਦਾ ਉਦਘਾਟਨ ਕੀਤਾ ਸੀ, ਜਿਸ ਵਿੱਚ ਅਮਰਗੜ੍ਹ ਦੇ ਵਿਧਾਇਕ ਜਸਵੰਤ ਸਿੰਘ ਗੱਜਣਮਾਜਰਾ, ਨਾਭਾ ਦੇ ਵਿਧਾਇਕ ਦੇਵ ਮਾਨ, ਵਿਧਾਇਕ ਬੁੱਧ ਰਾਮ ਸਮੇਤ ਉੱਚ ਅਧਿਕਾਰੀਆਂ ਦਾ ਨਾਮ ਤਾਂ ਲਿਖਿਆ ਹੋਇਆ ਸੀ ਪਰ ਹਲਕਾ ਵਿਧਾਇਕ ਮਨਵਿੰਦਰ ਸਿੰਘ ਗਿਆਸਪੁਰਾ ਦਾ ਨਾਮ ਸ਼ਾਮਲ ਨਹੀਂ ਸੀ।ਇਸ ਗੱਲ ਦਾ ਪਤਾ ਜਦੋਂ ਪੱਥਰ ਨੂੰ ਦੇਖਣ ਤੋਂ ਬਾਅਦ ਪੱਤਰਕਾਰਾਂ ਨੂੰ ਲੱਗਿਆ ਤਾਂ ਉਹਨਾਂ ਮੰਤਰੀ ਨੂੰ ਸਵਾਲ ਕੀਤਾ ਪ੍ਰੰਤੂ ਮੰਤਰੀ ਨੇ ਕਿਹਾ ਕਿ ਇਹ ਨਾਭਾ ਪਟਿਆਲਾ ਨਾਲ ਸਬੰਧਿਤ ਨੀਂਹ ਪੱਥਰ ਹੈ, ਜਦਕਿ ਪੱਥਰ ‘ਤੇ ਡੀਸੀ ਲੁਧਿਆਣਾ ਜਤਿੰਦਰ ਜੋਰਵਾਲ ਦਾ ਨਾਮ ਵੀ ਦਰਜ ਸੀ। ਜ਼ਿਕਰਯੋਗ ਹੈ ਕਿ ਦੂਰ ਪੈਂਦੇ ਹਲਕਿਆਂ ਦੇ ਵਿਧਾਇਕਾਂ ਦੇ ਨਾਂ ਸ਼ਾਮਲ ਕਰ ਲਏ ਗਏ ਤੇ ਆਪਣੇ ਹਲਕੇ ਦੇ ਵਿਧਾਇਕ ਦਾ ਨਾਂ ਹੀ ਲਿਖਣਾ ਭੁੱਲ ਗਏ। ਇਸ ਗੱਲ ਨੂੰ ਲੈ ਕੇ ਇਹ ਨੀਂਹ ਪੱਥਰ ਸਥਾਨਕ ਲੋਕਾਂ ਵਿੱਚ ਕਾਫ਼ੀ ਚਰਚਾ ਦਾ ਵਿਸ਼ਾ ਬਣਿਆ ਹੋਇਆ ਸੀ। ਇਹ ਵੀ ਦੱਸਣਯੋਗ ਹੈ ਕਿ ਵਿਧਾਇਕ ਗਿਆਸਪੁਰਾ ਨੂੰ ਉਸ ਦਿਨ ਵੀ ਮੌਕੇ ‘ਤੇ ਬੁਲਾਇਆ ਗਿਆ ਸੀ। ਉਸ ਮੌਕੇ ਤਾਂ ਮਹਿਕਮੇ ਦੀ ਗਲਤੀ ਕਹਿ ਕੇ ਮਾਮਲਾ ਟਾਲ ਦਿੱਤਾ ਗਿਆ ਸੀ ਤੇ ਪ੍ਰੰਤੂ ਹੁਣ ਪਤਾ ਲੱਗਿਆ ਕਿ ਉਹ ਪੁਰਾਣਾ ਪੱਥਰ ਬਦਲ ਦਿੱਤਾ ਗਿਆ ਅਤੇ ਨਵਾਂ ਪੱਥਰ ਹਲਕਾ ਵਿਧਾਇਕ ਦਾ ਨਾਮ ਲਿਖ ਕੇ ਲਗਾਇਆ ਗਿਆ ਹੈ। ਧਿਆਨ ਰਹੇ ਕਿ ਇਹ ਹਾਸੋਹੀਣੀਆਂ ਗੱਲਾਂ ਉਸ ਪਾਰਟੀ ਦੀ ਸਰਕਾਰ ਦੇ ਰਾਜਭਾਗ ਵਿੱਚ ਵਾਪਰ ਰਹੀਆਂ ਜਿਸ ਦੇ ਮੁੱਖ ਮੰਤਰੀ ਤੱਕ ਇਹ ਕਹਿੰਦੇ ਰਹੇ ਕਿ ਨੀਂਹ ਪੱਥਰਾਂ ‘ਤੇ ਮਿਸਤਰੀਆਂ-ਮਜ਼ਦੂਰਾਂ ਦੇ ਨਾਮ ਲਿਖਾਂਗੇ।
