ਚੰਡੀਗੜ੍ਹ,15 ਫਰਵਰੀ, Gee98 News service
-ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਆਪਣੇ ਇੱਕ ਸਿਆਸੀ ਪੈਂਤੜੇ ਨਾਲ ਸਭ ਨੂੰ ਹੈਰਾਨ ਕਰ ਦਿੱਤਾ ਹੈ। 13 ਫਰਵਰੀ ਨੂੰ ਪੰਜਾਬ ਕੈਬਨਿਟ ਦੀ ਮੀਟਿੰਗ ਤੋਂ ਬਾਅਦ ਜਦੋਂ ਸਾਰੇ ਸੀਨੀਅਰ ਅਫਸਰ ਮੀਟਿੰਗ ਵਿੱਚੋਂ ਉੱਠ ਕੇ ਬਾਹਰ ਚਲੇ ਗਏ ਤਾਂ ਭਗਵੰਤ ਮਾਨ ਨੇ ਸਾਰੇ ਮੰਤਰੀਆਂ ਨੂੰ ਰੋਕਿਆ ਅਤੇ ਬਤੌਰ ਮੁੱਖ ਮੰਤਰੀ ਅਸਤੀਫ਼ੇ ਦੀ ਪੇਸ਼ਕਸ਼ ਕੀਤੀ। ਸੂਤਰਾਂ ਅਨੁਸਾਰ ਭਗਵੰਤ ਮਾਨ ਦੇ ਇਸ ਅਚਾਨਕ ਰਵਈਏ ਨੇ ਮੰਤਰੀਆਂ ਨੂੰ ਹੈਰਾਨ ਕੀਤਾ ਪ੍ਰੰਤੂ ਇਹ ਕੋਈ ਅਚਾਨਕ ਜ਼ੁਬਾਨ ਵਿੱਚੋਂ ਕੱਢੀ ਗੱਲ ਨਹੀਂ ਸੀ ਸਗੋਂ ਇਹ ਭਗਵੰਤ ਮਾਨ ਦਾ ਇੱਕ ਸਿਆਸੀ ਪੈਂਤੜਾ ਦਾ ਸੀ ਜਿਸ ਨਾਲ ਉਹਨਾਂ ਨੇ ਮੀਟਿੰਗ ‘ਚ ਹਾਜ਼ਰ ਪੰਜਾਬ ‘ਆਪ’ ਦੇ ਪ੍ਰਧਾਨ ਅਤੇ ਸੀਨੀਅਰ ਮੰਤਰੀ ਅਮਨ ਅਰੋੜਾ ਨੂੰ ਸਿਆਸੀ ਤੌਰ ‘ਤੇ ਚਿੱਤ ਕੀਤਾ। ਆਪ ਦੇ ਅੰਦਰੂਨੀ ਸੂਤਰਾਂ ਅਨੁਸਾਰ ਭਗਵੰਤ ਮਾਨ ਅਮਨ ਅਰੋੜਾ ਦੇ ਇੱਕ ਬਿਆਨ ਤੋਂ ਡਾਹਢੇ ਨਾਰਾਜ਼ ਹਨ। ਦੱਸ ਦੇਈਏ ਕਿ ਪਿਛਲੇ ਦਿਨੀ ਅਮਨ ਅਰੋੜਾ ਨੇ ਬੇਬਾਕੀ ਨਾਲ ਇਹ ਆਖ ਦਿੱਤਾ ਸੀ ਕਿ ਪੰਜਾਬ ਦਾ ਮੁੱਖ ਮੰਤਰੀ ਲਿਆਕਤ ਦੇ ਆਧਾਰ ‘ਤੇ ਚੁਣਿਆ ਜਾਣਾ ਚਾਹੀਦਾ ਹੈ, ਨਾ ਕਿ ਹਿੰਦੂ ਸਿੱਖ ਸ਼੍ਰੇਣੀ ਦੇ ਆਧਾਰ ‘ਤੇ ਚੁਣਿਆ ਜਾਣਾ ਚਾਹੀਦਾ ਹੈ। ਅਮਨ ਅਰੋੜਾ ਨੇ ਇਹ ਵੀ ਆਖਿਆ ਸੀ ਕਿ ਪੰਜਾਬ ਦਾ ਮੁੱਖ ਮੰਤਰੀ ਹਿੰਦੂ ਵੀ ਹੋ ਸਕਦਾ ਹੈ। ਇਹ ਉਹੀ ਦਿਨ ਸਨ ਜਦੋਂ ਪੰਜਾਬ ‘ਚ ਮੁੱਖ ਮੰਤਰੀ ਭਗਵੰਤ ਮਾਨ ਨੂੰ ਬਦਲਣ ਦੀ ਚਰਚਾ ਜ਼ੋਰਾਂ ‘ਤੇ ਸੀ। ਇਹਨਾਂ ਦਿਨਾਂ ਦੌਰਾਨ ਅਮਨ ਅਰੋੜੇ ਦੇ ਬਿਆਨ ਨੇ ਭਗਵੰਤ ਮਾਨ ਦੇ ਮੱਥੇ ‘ਤੇ ਤਿਉੜੀਆਂ ਪਾਈਆਂ। ਮੁੱਖ ਮੰਤਰੀ ਨੇ ਅਮਨ ਅਰੋੜਾ ਦਾ ਜਵਾਬ ਦੇਣ ਲਈ ਮੀਡੀਆ ‘ਚ ਜਾਣ ਦੀ ਬਜਾਏ ਸਹੀ ਸਮੇਂ ਦੀ ਉਡੀਕ ਕੀਤੀ ਅਤੇ ਆਪਣੇ ਸਲਾਹਕਾਰਾਂ ਦੀ ਸਲਾਹ ਨਾਲ ਅਸਤੀਫ਼ੇ ਦਾ ਇੱਕ ਤੀਰ ਅਜਿਹਾ ਛੱਡਿਆ ਕਿ ਅਮਨ ਅਰੋੜਾ ਸਮੇਤ ਸਪੀਕਰ ਕੁਲਤਾਰ ਸਿੰਘ ਸੰਧਵਾਂ ਅਤੇ ਮੁੱਖ ਮੰਤਰੀ ਦੇ ਅਹੁਦੇ ‘ਤੇ ਅੱਖ ਟਿਕਾਈ ਬੈਠੇ ਹੋਰ ਆਪ ਆਗੂਆਂ ਨੂੰ ਛਲਣੀ ਕਰ ਗਿਆ। ਸੂਤਰਾਂ ਅਨੁਸਾਰ ਜਿਸ ਵੇਲੇ ਭਗਵੰਤ ਮਾਨ ਨੇ ਅਸਤੀਫ਼ੇ ਦੀ ਪੇਸ਼ਕਸ਼ ਕੀਤੀ ਉਸ ਵੇਲੇ ਭਗਵੰਤ ਮਾਨ ਦੀ ਸ਼ਬਦਾਵਲੀ ਸੁਣ ਕੇ ਅਮਨ ਅਰੋੜਾ ਦੇ ਚਿਹਰੇ ਦੀਆਂ ਹਵਾਈਆਂ ਉੱਡ ਰਹੀਆਂ ਸਨ ਕਿਉਂਕਿ ਮੀਟਿੰਗ ‘ਚ ਭਗਵੰਤ ਮਾਨ ਦੇ ਸ਼ਬਦ ਸਨ ਕਿ “ਕਿਸੇ ਨੂੰ ਮੀਡੀਆ ‘ਚ ਕੁਝ ਕਹਿਣ ਦੀ ਲੋੜ ਨਹੀਂ ਜੇ ਕੋਈ ਮੁੱਖ ਮੰਤਰੀ ਬਣਨ ਦਾ ਚਾਹਵਾਨ ਹੈ ਤਾਂ ਉਹ ਬਣ ਸਕਦਾ ਹੈ”। ਪੰਜਾਬ ਦੀ ਰਾਜਨੀਤੀ ‘ਚ ਇਹ ਜੱਗ ਜ਼ਾਹਿਰ ਹੈ ਕਿ ਮੁੱਖ ਮੰਤਰੀ ਦੇ ਜਿਹੜੇ ਅਹੁਦੇ ਤੱਕ ਪੁੱਜਣ ਲਈ ਭਗਵੰਤ ਮਾਨ ਨੇ ਆਪਣੀ ਹੀ ਪਾਰਟੀ ਦੇ ਸੀਨੀਅਰ ਆਗੂਆਂ ਦੀ ਬਲੀ ਦਿੱਤੀ ਅਤੇ ਹਰ ਹੀਲਾ ਵਸੀਲਾ ਵਰਤਿਆ। ਭਗਵੰਤ ਮਾਨ ਇਹ ਅਹੁਦਾ ਐਨੀ ਜਲਦੀ ਨਹੀਂ ਛੱਡ ਸਕਦੇ। ਭਗਵੰਤ ਮਾਨ ਦੀ ਸਿਆਸੀ ਫ਼ਿਤਰਤ ਜਾਨਣ ਵਾਲੇ ਇਹ ਚੰਗੀ ਤਰ੍ਹਾਂ ਜਾਣਦੇ ਹਨ ਕਿ ਪੂਰੇ ਪੰਜ ਸਾਲ ਮੁੱਖ ਮੰਤਰੀ ਦੀ ਕੁਰਸੀ ‘ਤੇ ਟਿਕੇ ਰਹਿਣ ਲਈ ਭਗਵੰਤ ਮਾਨ ਕਿਸੇ ਹੱਦ ਤੱਕ ਵੀ ਜਾ ਸਕਦੇ ਹਨ। ਦਿੱਲੀ ‘ਚ ਆਪ ਦੀ ਹਾਰ ਅਤੇ ਖੁਦ ਕੇਜਰੀਵਾਲ ਦੀ ਹਾਰ ਤੋਂ ਬਾਅਦ ਮੰਨਿਆ ਤਾਂ ਜਾ ਰਿਹਾ ਸੀ ਕਿ ਪੰਜਾਬ ‘ਚ ਭਗਵੰਤ ਮਾਨ ‘ਤੇ ਗਾਜ ਡਿੱਗੇਗੀ ਪ੍ਰੰਤੂ ਪਿਛਲੇ ਦੋ ਕੁ ਦਿਨਾਂ ਦੀਆਂ ਸਰਗਰਮੀਆਂ ਤੋਂ ਇਸਦੇ ਉਲਟ ਹਾਲਾਤ ਬਣਦੇ ਨਜ਼ਰ ਆ ਰਹੇ ਹਨ। ਦਿੱਲੀ ਹਾਰ ਤੋਂ ਬਾਅਦ ਸੋਸ਼ਲ ਮੀਡੀਆ ਪਲੇਟਫਾਰਮ ‘ਤੇ ਪੰਜਾਬ ‘ਚ ਆਪ ਵਲੰਟੀਅਰਾਂ ਅਤੇ ਆਪ ਦੇ ਟਕਸਾਲੀ ਆਗੂਆਂ ਨੇ ਆਪਣੇ ਆਗੂਆਂ ਨੂੰ ਚੇਤਾਵਨੀ ਦੇਣੀ ਸ਼ੁਰੂ ਕਰ ਦਿੱਤੀ ਹੈ ਕਿ ਪੰਜਾਬ ‘ਚ ਸੰਭਲ ਜਾਵੋ ਅਜੇ ਡੁੱਲੇ ਬੇਰਾਂ ਦਾ ਕੁਝ ਨਹੀਂ ਵਿਗੜਿਆ। ਭਾਵੇਂ ਕਿ ਇਹ ਚਰਚਾ ਕੀਤੀ ਜਾ ਰਹੀ ਹੈ ਕਿ ਕੇਜਰੀਵਾਲ ਪੰਜਾਬ ‘ਚ ਮਜ਼ਬੂਤ ਹੈ ਅਤੇ ਉਸਦੇ ਨਾਲ ਕਾਫੀ ਸਾਰੇ ਵਿਧਾਇਕ ਹਨ ਪਰੰਤੂ ਪੰਜਾਬ ‘ਚ ਆਮ ਆਦਮੀ ਪਾਰਟੀ ਦੀ ਅਸਲ ਤਾਕਤ ਪਿੰਡ ਪੱਧਰ ‘ਤੇ ਕੰਮ ਕਰਨ ਵਾਲੇ ਉਸ ਦੇ ਵਲੰਟੀਅਰ ਹੀ ਹਨ, ਜਦਕਿ ਦੂਜੇ ਪਾਸੇ ਪੰਜਾਬ ‘ਚ ਕਿਸੇ ਆਪ ਵਿਧਾਇਕ ਅਤੇ ਮੰਤਰੀ ਤੱਕ ਦੀ ਵੀ ਕੋਈ ਸਿਆਸੀ ਵੁੱਕਤ ਨਹੀਂ ਜਿਸ ਨੂੰ ਰਾਤ ਸੌਣ ਵੇਲੇ ਪਤਾ ਨਹੀਂ ਹੁੰਦਾ ਕਿ ਉਹ ਸਵੇਰ ਨੂੰ ਮੰਤਰੀ ਰਹੇਗਾ ਜਾਂ ਨਹੀਂ ਰਹੇਗਾ। ਪੰਜਾਬ ‘ਚ ਆਪ ਨੂੰ ਇੱਕ ਹੋਰ ਅੰਦਰੂਨੀ ਸੰਕਟ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ ਕਿ ਇਸ ਦੇ ਸੀਨੀਅਰ ਵਿਧਾਇਕਾਂ ਨੇ ਮੰਤਰੀ ਬਣਨ ਲਈ ਲਾਬਿੰਗ ਸ਼ੁਰੂ ਕਰ ਦਿੱਤੀ ਹੈ। ਵਿਧਾਇਕਾਂ ਦੀਆਂ ਇਹ ਸਰਗਰਮੀਆਂ ਵੀ ਭਗਵੰਤ ਮਾਨ ਦੇ ਹੱਕ ਵਿੱਚ ਹੀ ਹਨ ਕਿਉਂਕਿ ਆਪ ਦੀ ਹਾਈ ਕਮਾਂਡ ਦੇ ਆਗੂਆਂ ਨਾਲੋਂ ਭਗਵੰਤ ਮਾਨ ਆਪਣੇ ਵਿਧਾਇਕਾਂ ਦੀ ਸਿਆਸੀ ਲਾਲਸਾ ਦੇ ਵੱਧ ਜਾਣਕਾਰ ਹਨ। ਭਰੋਸੇਯੋਗ ਸੂਤਰਾਂ ਅਨੁਸਾਰ ਭਗਵੰਤ ਮਾਨ ਨੇ ਆਪਣੇ ਵਿਧਾਇਕਾਂ ਦੀ ਅਮਰਵੇਲ ਵਾਂਗ ਵਧੀ ਆਮਦਨ ਦੇ ਵੇਰਵੇ ਵੀ ਇਕੱਠੇ ਕਰਨੇ ਸ਼ੁਰੂ ਕਰ ਦਿੱਤੇ ਹਨ। ਮੁੱਖ ਮੰਤਰੀ ਵੱਲੋਂ ਭ੍ਰਿਸ਼ਟਾਚਾਰ ਦੇ ਦੋਸ਼ਾਂ ਵਿੱਚ ਸ਼ਾਮਿਲ ਆਪਣੇ ਵਿਧਾਇਕਾਂ ‘ਤੇ ਨੇੜਿਓ ਨਜ਼ਰ ਰੱਖਣੀ ਸ਼ੁਰੂ ਕਰ ਦਿੱਤੀ ਹੈ। ਭਗਵੰਤ ਮਾਨ ਦੇ ਅਤੀ ਨੇੜਲੇ ਸਾਥੀ ਨੇ ਆਪਣਾ ਨਾਮ ਗੁਪਤ ਰੱਖਣ ਦੀ ਸ਼ਰਤ ‘ਤੇ ਦੱਸਿਆ ਕਿ ਸੂਬੇ ਦੇ ਗਰਾਊਂਡ ਪੱਧਰ ‘ਤੇ ਕੰਮ ਕਰਨ ਵਾਲੇ ਭਗਵੰਤ ਮਾਨ ਦੇ ਅਤੀ ਵਿਸ਼ਵਾਸ ਪਾਤਰ ਵਲੰਟੀਅਰਜ਼ ਨੇ ਆਪਣੇ ਆਪਣੇ ਵਿਧਾਇਕਾਂ ਦੀਆਂ ਕਾਰਜ ਪੱਤਰੀਆਂ ਭਗਵੰਤ ਮਾਨ ਨੂੰ ਸੌਂਪਣੀਆਂ ਸ਼ੁਰੂ ਕਰ ਦਿੱਤੀਆਂ ਹਨ। ਬਹਰਹਾਲ ! ਅਸਤੀਫੇ ਦੀ ਪੇਸ਼ਕਸ਼ ਭਗਵੰਤ ਮਾਨ ਦੇ ਦਿਲ ਦੇ ਵਿੱਚੋਂ ਨਿਕਲੀ ਸਿਆਸਤ ਅਤੇ ਪਾਰਟੀ ਪ੍ਰਤੀ ਇਮਾਨਦਾਰੀ ਦੀ ਚੀਸ ਨਹੀਂ ਸਗੋਂ ਇਹ ਆਪਣੇ ਮੰਤਰੀ ਸਾਥੀਆਂ ਨੂੰ ਇੱਕ ਅਜਿਹਾ ਸੰਕੇਤ ਸੀ ਕਿ ਜੇਕਰ ਭਗਵੰਤ ਮਾਨ ਮੁੱਖ ਮੰਤਰੀ ਬਣਨ ਤੋਂ ਪਹਿਲਾਂ ਚੋਟੀ ਦੇ ਆਗੂਆਂ ਨੂੰ ਖੁੱਡੇ ਲਾਈਨ ਲਗਾ ਸਕਦੇ ਹਨ ਤਾਂ ਅਜੇ ਵੀ ਭਗਵੰਤ ਮਾਨ ਵਿੱਚ ਉਹ ਕਾਬਲੀਅਤ ਬਚੀ ਹੋਈ ਹੈ।
