ਬੋਲ ਪੰਡੋਰੀ ਦੇ….ਮਿੱਤਰਾਂ ਦੀ ਲੂਣ ਦੀ ਡਲੀ…….!
-ਇਹ ਕਿਵੇਂ ਹੋ ਸਕਦੈ..ਪਰ ਇਹ ਹੋਈ ਜਾਂਦੈ..ਕਈ ਵਰ੍ਹਿਆਂ ਤੋਂ ਇਵੇਂ ਹੀ ਆਖਿਆ ਜਾਂਦਾ..ਕਿਥੇ ਮਿਸ਼ਰੀ ਤੇ ਕਿਥੇ ਲੂਣ,ਫਿਰ ਵੀ ਇਹੀ ਕਹਿੰਦੇ ਨੇ ਕਿ ਮੇਰੀ ਲੂਣ ਦੀ ਡਲੀ ਨੂੰ ਮਿਸ਼ਰੀ ਦੇ ਬਰੋਬਰ ਜਾਣ ਲਵੀ..ਤੇ ਅਗਲਾ ਮੰਨ ਵੀ ਜਾਂਦਾ..ਇਹੀ ਤਾਂ ਮੁਹੱਬਤ ਆਂ,ਮੁਹੱਬਤ ਚੀਜ਼ ਬੜੀ ਅਜੀਬ ਆਂ.. ਚੀਜ਼ ਜਾਂ ਭਾਵਨਾ..ਅਜੋਕੇ ਦੌਰ ਦੀ ਮੁਹੱਬਤ ਦੇ ਸੰਦਰਭ ਵਿੱਚ ਤਾਂ ਚੀਜ਼ ਕਹਿਣਾ ਹੀ ਚੰਗਾ ਰਹੇਗਾ…ਭਾਵਨਾ ਤਾਂ ਗੰਧਲੀ ਹੋਣ ਨੂੰ ਕੁਝ ਪਲ ਈਂ ਲੱਗਦੇ ਨੇ…ਚਾਰ ਦਿਨਾਂ ਦੀ ਚਾਂਦਨੀ…ਚਾਰ ਦਿਨਾਂ ਦੀ ਮੁਹੱਬਤ..ਫੇਰ ਜਿਸਮਾਂ ਦੀ ਭੁੱਖ.. ਮਿਸ਼ਰੀ ਨੂੰ ਲੂਣ ਬਣਦਿਆਂ ਕੁਝ ਪਲ ਈਂ ਲੱਗਦੇ ਨੇ, ਸਾਰੀ ਮੁਹੱਬਤ ਜਿਸਮਾਂ ਦੇ ਵਿੱਚ ਨਪੀੜੀ ਜਾਂਦੀ ਆਂ..ਮਰਦ ਜ਼ਾਤ ਮਿਸ਼ਰੀ ਲੈ ਜਾਂਦੀ ਆਂ ਤੇ ਲੂਣ….ਚਲੋ ਛੱਡੋ… ਜਦੋਂ ਅਗਲੇ ਨੇ ਆਖ ਈਂ ਦਿੱਤਾ ਕਿ ਮਿਸ਼ਰੀ ਬਰੋਬਰ ਜਾਣ ਲਵੀਂ…ਤੇ ਫਿਰ ਔਰਤ ਲੂਣ ਦੀ ਡਲੀ ਨੂੰ ਹੀ ਮਿਸ਼ਰੀ ਮੰਨ ਕੇ ਹਿੱਕ ਨਾਲ ਲਾ ਕੇ ਰੱਖਦੀ ਆਂ…ਕੀਤਾ ਵੀ ਕੀ ਜਾਵੇ, ਜਜ਼ਬਾਤਾਂ ‘ਚ ਔਰਤ ਕੋਮਲ ਮੰਨੀ ਜਾਂਦੀ ਆਂ ਤੇ ਮਰਦ ਕਠੋਰ…ਅਜੋਕੇ ਦੌਰ ਦੀਆਂ ਮੁਹੱਬਤ ਦੀਆਂ ਕਹਾਣੀਆਂ ਨੂੰ ਦੇਖ/ਸੁਣ ਕੇ ਲੱਗਦੈ ਕਿ ਮਰਦ ਕੋਲ ਸਾਲੇ ਜਜ਼ਬਾਤ ਹੁੰਦੇ ਈਂ ਨੀ…ਸ਼ਾਇਦ ਤੁਸੀਂ ਵੀ “ਹਾਂ” ਆਖ ਦੇਵੋ..ਪਰ ਗੱਲ ਇਹ ਵੀ ਠੀਕ ਨਹੀਂ…ਹੁਣ ਮੁਹੱਬਤ ਕੋਮਲ ਜਜ਼ਬਾਤਾਂ ਵਾਲੇ ਪਾਸੇ ਵੀ ਨਹੀਂ…ਹੁਣ ਦੀਆਂ ਮੁਹੱਬਤ ਕਹਾਣੀਆਂ ਜਦੋਂ ਸਾਹਮਣੇ ਆਉਂਦੀਆਂ ਨੇ, ਕਦੇ ਕਦੇ ਤਾਂ ਭੰਬਲਭੂਸੇ ‘ਚ ਪੈ ਜਾਈਦਾ ਕਿ ਮੁਹੱਬਤ ਮਿਸ਼ਰੀ ਆਂ ਜਾਂ ਲੂਣ.. ਪਰ ਉਂਝ ਜੇ ਦੇਖਿਆ ਜਾਵੇ ਤਾਂ ਮਿਸ਼ਰੀ ਨਾਲੋਂ ਲੂਣ ਵੱਧ ਵਰਤਿਆ ਜਾਂਦਾ…ਹਰਾਮੀਪੁਣੇ ਨਾਲ ਵੀ ਲੂਣ ਈਂ ਜੁੜਿਆ ਹੋਇਆ…ਕਿੰਨਾ ਅਜੀਬ ਜਿਹਾ ਲੱਗਦਾ ਹਨਾਂ…ਅਗਲੇ ਨੂੰ ਥੋੜ੍ਹਾ ਜਿਹਾ ਲੂਣ ਦੇ ਦੇਵੋ..ਹਰਾਮ ਨਹੀਂ ਕਰੇਗਾ…ਫਿਰ ਜਨਮ ਮੌਕੇ ਮਾਂ ਬੱਚੇ ਨੂੰ ਲੂਣ ਦੀ ਗੁੜਤੀ ਕਿਉਂ ਨਹੀਂ ਦਿੰਦੀ.. ਤੁਸੀਂ ਵੇਖ ਤਾਂ ਰਹੇ ਹੋ ਆਪਣੇ ਆਲੇ ਦੁਆਲੇ…ਹੁਣ ਤਾਂ ਹਰਾਮਪੁਣਾ ਸਭ ਤੋਂ ਵੱਧ ਔਲਾਦ ਹੀ ਕਰਦੀ ਆਂ…ਕੋਈ ਗੁੜਤੀ ਦੀ ਸ਼ੀਸ਼ੀ ਬਣਾਉਣ ਵਾਲੀਆਂ ਕੰਪਨੀਆਂ ਨੂੰ ਕਹੋ ਥੋੜਾ ਜਿਹਾ ਲੂਣ ਪਾ ਦਿਆ ਕਰਨ ਵਿੱਚ…ਕਿਆ ਬਾਤ ਏਂ…ਬੁਢਾਪਾ ਸ਼ਾਨਦਾਰ ਹੋਵੇਗਾ..ਤੁਸੀਂ ਸਹਿਮਤ ਹੋ ਮੇਰੇ ਨਾਲ…ਐਵੇਂ ਸਹਿਮਤ ਨਾ ਹੋ ਜਾਇਓ ਕਿ ਮੈਂ ਆਖ ਦਿੱਤਾ….ਮੈਂ ਥੋੜ੍ਹਾ ਆਖਿਆ…ਮੈਨੂੰ ਨਹੀਂ ਪਤਾ ਕੀਹਨੇ ਆਖਿਆ ਕਿ…ਮਿੱਤਰਾ ਦੀ ਲੂਣ ਦੀ ਡਲੀ ਮਿਸ਼ਰੀ ਬਰੋਬਰ ਜਾਣੀ..ਐਂ ਕਿਵੇਂ ਜਾਣ ਲਈਏ,ਉਹ ਭਲੇ ਜ਼ਮਾਨੇ ਹੋਰ ਸੀ…ਉਦੋਂ ਖ਼ੂਨ ਦਾ ਰੰਗ ਸੱਚੀ ਲਾਲ ਹੁੰਦਾ ਸੀ..ਤੇ ਹੁਣ ਦੇਖੋ ਤਾਂ ਬਾਪੂ ਦੀ ਦੋ ਹਿੱਸਿਆਂ ‘ਚ ਵੰਡੀ ਜ਼ਮੀਨ ਦੀ ਵੱਟ ‘ਤੇ ਗੰਡਾਸਾ ਲਈ ਖੜੇ ਆਪਣੇ ਭਰਾ ਦੇ ਖ਼ੂਨ ਦਾ ਰੰਗ ਵੇਖੋ ਤਾਂ…9 ਮਹੀਨੇ ਪੇਟ ‘ਚ ਰੱਖੀ…18 ਵਰ੍ਹੇ ਹਿੱਕ ਨਾਲ ਲਾ ਕੇ ਰੱਖੀ… ਚੁੰਨੀ ਦੇ ਪੱਲੂ ‘ਚ ਲੁਕੋ ਕੇ..ਫਿਰ ਜੱਜ ਮੂਹਰੇ ਜਾ ਕੇ ਧੀ ਆਖ ਦਿੰਦੀ ਆਂ… ਮੈਂ ਤਾਂ ਜਾਣਦੀ ਈਂ ਨਹੀਂ ਕੌਣ ਆਂ..ਮਾਪਿਆਂ ਤੋਂ ਖ਼ਤਰਾ..ਸੁਰੱਖਿਆ ਦੇਵੋ…ਨਿੱਕਾ ਹੁੰਦਾ ਮਾਂ ਦੇ ਦੁੱਧ ‘ਤੇ ਦੰਦੀਆਂ ਵੱਢਣ ਵਾਲਾ..ਵੱਡਾ ਹੋ ਕੇ ਘਰਵਾਲੀ ਦੀ ਬੁੱਕਲ ‘ਚੋਂ ਨੀ ਨਿਕਲਦਾ..ਮੈਂ ਥੋੜ੍ਹਾ ਕਹਿਨਾ…ਮਾਵਾਂ ਨੂੰ ਕੁੱਟਣ ਦੀਆਂ ਖ਼ਬਰਾਂ ਕਹਿੰਦੀਆਂ ਨੇ.. ਖ਼ਬਰਾਂ ਤਾਂ ਇਹ ਵੀ ਕਹਿੰਦੀਆਂ ਨੇ…ਪੁੱਤ ਨੇ ਪਿਓ ਤੇ ਪਿਓ ਨੇ ਪੁੱਤ ਮਾਰਤਾ..ਕਿਵੇਂ ਮੰਨ ਲਈਏ ਲੂਣ ਦੀ ਡਲੀ ਨੂੰ ਮਿਸ਼ਰੀ ਬਰੋਬਰ…ਤੁਸੀਂ ਮੰਨਦੇ ਓ…!
–ਨਿਰਮਲ ਸਿੰਘ ਪੰਡੋਰੀ, ਪੱਤਰਕਾਰ।
94170-33033
