ਚੰਡੀਗੜ੍ਹ,6 ਮਈ, Gee98 news service
-ਪੰਜਾਬ ਸਰਕਾਰ ਨੇ ਮਾਲ ਵਿਭਾਗ ਦੇ ਅਧਿਕਾਰੀਆਂ ਲਈ ਦਫ਼ਤਰਾਂ ‘ਚ ਹਾਜ਼ਰੀ ਸਬੰਧੀ ਸਖ਼ਤ ਹੁਕਮ ਜਾਰੀ ਕਰ ਦਿੱਤੇ ਹਨ ਅਤੇ ਨਾਲ ਹੀ ਚੇਤਾਵਨੀ ਦਿੱਤੀ ਹੈ ਕਿ ਇਹਨਾਂ ਹੁਕਮਾਂ ਦੀ ਉਲੰਘਣਾ ਕਰਨ ਵਾਲੇ ਮਾਲ ਅਧਿਕਾਰੀਆਂ ਦੇ ਖ਼ਿਲਾਫ਼ ਕਾਰਵਾਈ ਕੀਤੀ ਜਾਵੇਗੀ। ਸਰਕਾਰ ਨੇ ਹੁਕਮ ਦਿੱਤੇ ਹਨ ਕਿ ਹੁਣ ਨਾਇਬ ਤਹਿਸੀਲਦਾਰ ਜਾਂ ਤਹਿਸੀਲਦਾਰਾਂ ਅਤੇ ਮਾਲ ਵਿਭਾਗ ਦੇ ਹੋਰ ਅਧਿਕਾਰੀਆਂ ਨੂੰ ਸਵੇਰੇ 9 ਵਜੇ ਤੱਕ ਹਰ ਹਾਲਤ ਆਪਣੇ ਦਫ਼ਤਰ ਪੁੱਜਣਾ ਹੋਵੇਗਾ ਅਤੇ ਵਿਭਾਗ ਵੱਲੋਂ ਤਿਆਰ ਕੀਤੇ ਇੱਕ ਵਿਸ਼ੇਸ਼ ਐਮ ਸੇਵਾ ਐਪ ਰਾਹੀਂ ਸੈਲਫੀ ਖਿੱਚ ਕੇ ਆਪਣੀ ਹਾਜ਼ਰੀ ਲਗਾਉਣੀ ਹੋਵੇਗੀ। ਕੋਈ ਮਾਲ ਅਧਿਕਾਰੀ ਭਾਵੇਂ ਆਪਣੇ ਦਫ਼ਤਰ ਵਿੱਚ 9 ਵਜੇ ਤੋਂ ਪਹਿਲਾਂ ਪੁੱਜ ਜਾਵੇ ਪਰ ਜੇਕਰ ਉਹ ਵਿਸ਼ੇਸ਼ ਐਪ ‘ਤੇ ਸੈਲਫੀ ਰਾਹੀਂ ਹਾਜ਼ਰੀ ਨਹੀਂ ਲਗਾਵੇਗਾ ਤਾਂ ਉਸ ਨੂੰ ਗ਼ੈਰ ਹਾਜ਼ਰ ਮੰਨਿਆ ਜਾਵੇਗਾ। ਸਰਕਾਰ ਵੱਲੋਂ ਇਹ ਵੀ ਹਦਾਇਤ ਕੀਤੀ ਗਈ ਹੈ ਕਿ ਇਸ ਸਬੰਧੀ ਕਿਸੇ ਵੀ ਅਧਿਕਾਰੀ ਦੀ ਕੋਈ ਬਹਾਨੇਬਾਜ਼ੀ ਨਹੀਂ ਚੱਲੇਗੀ ਭਾਵ ਕਿ ਕੋਈ ਅਧਿਕਾਰੀ ਆਪਣੇ ਦਫ਼ਤਰ ਤੋਂ ਬਿਨਾਂ ਕਿਸੇ ਹੋਰ ਜਗ੍ਹਾ ਤੋਂ ਐਪ ਰਾਹੀਂ ਹਾਜ਼ਰੀ ਨਹੀਂ ਲਗਵਾ ਸਕਦਾ। ਕੋਈ ਵੀ ਅਧਿਕਾਰੀ ਭਾਵੇਂ ਉਹ ਨਾਇਬ ਤਹਿਸੀਲਦਾਰ ਹੋਵੇ ਜਾਂ ਤਹਿਸੀਲਦਾਰ ਹੋਵੇ ਜਾਂ ਫਿਰ ਜਿਸ ਕੋਲ ਸਬ ਰਜਿਸਟਰਾਰ ਦੀਆਂ ਤਾਕਤਾਂ ਹੋਣ ਉਸ ਨੂੰ ਆਪਣੀ ਕੁਰਸੀ ਦੀ ਲੋਕੇਸ਼ਨ ‘ਤੇ ਪੁੱਜ ਕੇ ਵਿਸ਼ੇਸ਼ ਐਪ ਰਾਹੀਂ ਹਾਜ਼ਰੀ ਲਗਵਾਉਣੀ ਹੋਵੇਗੀ। ਇਸੇ ਤਰ੍ਹਾਂ ਸਰਕਾਰ ਵੱਲੋਂ ਇਹ ਹੁਕਮ ਵੀ ਜਾਰੀ ਕੀਤੇ ਗਏ ਹਨ ਕਿ ਜਿਹੜੇ ਵਿਅਕਤੀ ਨੇ 5 ਵਜੇ ਤੱਕ ਆਪਣੇ ਸਾਰੇ ਦਸਤਾਵੇਜ ਆਨਲਾਈਨ ਅਪਡੇਟ ਕਰ ਦਿੱਤੇ ਉਸਦੀ ਰਜਿਸਟਰੀ ਹਰ ਹਾਲਤ ਵਿੱਚ ਸੰਬੰਧਿਤ ਅਧਿਕਾਰੀ ਨੂੰ ਕਰਨੀ ਹੋਵੇਗੀ ਭਾਵੇਂ ਕਿ ਉਸ ਨੂੰ 6 ਵੱਜ ਜਾਣ ਜਾਂ 7 ਵੱਜ ਜਾਣ, ਜੇਕਰਲੋੜੀਂਦੇ ਸਾਰੇ ਦਸਤਾਵੇਜ਼ 5 ਵਜੇ ਤੋਂ ਪਹਿਲਾਂ ਪਹਿਲਾਂ ਆਨਲਾਈਨ ਅਪਲੋਡ ਹੋ ਜਾਣ ਅਤੇ ਸੰਬੰਧਤ ਵਿਅਕਤੀ 5 ਵਜੇ ਤੋਂ ਪਹਿਲਾਂ ਦਫ਼ਤਰ ਵਿੱਚ ਹਾਜ਼ਰ ਹੋਵੇ ਤਾਂ ਉਸ ਦੀ ਰਜਿਸਟਰੀ ਹਰ ਹਾਲਤ ਵਿੱਚ ਕਰਨੀ ਹੋਵੇਗੀ। ਸਰਕਾਰ ਵੱਲੋਂ ਇਹ ਹੁਕਮ ਤਹਿਸੀਲਾਂ ਵਿੱਚ ਰਜਿਸਟ੍ਰੇਸ਼ਨ ਦੇ ਕੰਮ ਨੂੰ ਸੁਚਾਰੂ ਢੰਗ ਨਾਲ ਚਲਾਉਣ ਲਈ ਦਿੱਤੇ ਗਏ ਹਨ।
