ਚੰਡੀਗੜ੍ਹ ,13 ਮਈ, Gee98 News service
-ਕੁਝ ਲੋਕਾਂ ਨੂੰ ਆਪਣੇ ਮੋਬਾਈਲ ਫੋਨ ਦੇ ਕਵਰ ਦੇ ਅੰਦਰ ਕੁਝ ਨਾ ਕੁਝ ਰੱਖਣ ਦੀ ਆਦਤ ਜਾਂ ਸ਼ੌਂਕ ਹੁੰਦਾ ਹੈ ਪ੍ਰੰਤੂ ਅਸਲ ਵਿੱਚ ਇਹ ਆਦਤ ਬਹੁਤ ਖਤਰਨਾਕ ਹੈ। ਅਕਸਰ ਲੋਕ ਆਪਣੇ ਮੋਬਾਈਲ ਫੋਨ ਦੇ ਅੰਦਰ ਕਰੰਸੀ ਨੋਟ ਆਧਾਰ ਕਾਰਡ ਜਾਂ ਕੁਝ ਹੋਰ ਜ਼ਰੂਰੀ ਦਸਤਾਵੇਜ਼ ਰੱਖਦੇ ਹਨ ਤਾਂ ਜੋ ਉਹਨਾਂ ਨੂੰ ਯਾਦ ਰਹੇ ਅਤੇ ਲੋੜ ਪੈਣ ‘ਤੇ ਉਹ ਤੁਰੰਤ ਇਸ ਦੀ ਵਰਤੋਂ ਕਰ ਲੈਣ। ਜੇਕਰ ਤੁਸੀਂ ਵੀ ਆਪਣੇ ਮੋਬਾਈਲ ਫੋਨ ਦੇ ਅੰਦਰ ਕਰੰਸੀ ਨੋਟ ਜਾਂ ਹੋਰ ਦਸਤਾਵੇਜ਼ ਰੱਖਦੇ ਹੋ ਤਾਂ ਇਹ ਖ਼ਬਰ ਤੁਹਾਡੇ ਲਈ ਅਹਿਮ ਹੈ। ਪ੍ਰੰਤੂ ਬਹੁਤ ਘੱਟ ਲੋਕ ਇਹ ਜਾਣਦੇ ਹਨ ਕਿ ਇਹ ਆਦਤ ਤੁਹਾਡੇ ਸਮਾਰਟਫੋਨ ਨੂੰ ਬੰਬ ਵਿੱਚ ਬਦਲ ਸਕਦੀ ਹੈ ? ਮੋਬਾਈਲ ਫੋਨ ਭਾਵੇਂ ਕਿੰਨਾ ਵੀ ਮਹਿੰਗਾ ਹੋਵੇ ਪ੍ਰੰਤੂ ਵੱਧ ਤਾਪਮਾਨ ਦੇ ਦਿਨਾਂ ਦੌਰਾਨ ਵੱਧ ਸਮਾਂ ਵਰਤੋਂ ਕਰਨ ਤੋਂ ਬਾਅਦ ਇਹ ਡਿਵਾਈਸ ਗਰਮ ਹੋ ਜਾਂਦੀ ਹੈ ਪਰ ਜਦੋਂ ਤੁਸੀਂ ਫ਼ੋਨ ਦੇ ਕਵਰ ਵਿੱਚ ਕੋਈ ਕਾਗਜ਼, ਨੋਟ ਜਾਂ ਪਲਾਸਟਿਕ ਵਰਗੀ ਚੀਜ਼ ਪਾਉਂਦੇ ਹੋ, ਤਾਂ ਇਹ ਗਰਮੀ ਨੂੰ ਹੋਰ ਵੀ ਵਧਾ ਦਿੰਦਾ ਹੈ। ਇਸ ਕਾਰਨ, ਮੋਬਾਈਲ ਦੇ ਅੰਦਰ ਦਾ ਤਾਪਮਾਨ ਆਮ ਨਾਲੋਂ ਕਿਤੇ ਵੱਧ ਜਾ ਸਕਦਾ ਹੈ। ਇਹ ਤਾਂ ਹਰ ਕੋਈ ਜਾਣਦਾ ਹੈ ਕਿ ਜੇਕਰ ਫ਼ੋਨ ਦੀ ਬੈਟਰੀ ਬਹੁਤ ਜ਼ਿਆਦਾ ਗਰਮ ਹੋ ਜਾਂਦੀ ਹੈ, ਤਾਂ ਧਮਾਕੇ ਦਾ ਖ਼ਤਰਾ ਵੱਧ ਜਾਂਦਾ ਹੈ। ਕਈ ਮਾਮਲਿਆਂ ਵਿੱਚ ਇਹ ਦੇਖਿਆ ਗਿਆ ਹੈ ਕਿ ਜ਼ਿਆਦਾ ਗਰਮ ਹੋਣ ਕਾਰਨ ਮੋਬਾਈਲ ਫੱਟ ਜਾਂਦਾ ਹੈ ਅਤੇ ਵਿਅਕਤੀ ਜ਼ਖ਼ਮੀ ਹੋ ਜਾਂਦਾ ਹੈ। ਇਸ ਲਈ ਮੋਬਾਈਲ ਫੋਨ ਦੇ ਕਵਰ ਵਿੱਚ ਕੋਈ ਚੀਜ਼ ਰੱਖਣ ਦੀ ਆਦਤ ਤੁਰੰਤ ਬਦਲ ਲੈਣੀ ਚਾਹੀਦੀ ਹੈ। ਇਸ ਤੋ ਇਲਾਵਾ ਜੇਕਰ ਤੁਸੀਂ ਚਾਰਜਿੰਗ ਦੌਰਾਨ ਫ਼ੋਨ ਦੀ ਵਰਤੋਂ ਕਰਦੇ ਹੋ ਅਤੇ ਕਵਰ ਹੇਠਾਂ ਕੁਝ ਰੱਖਿਆ ਹੋਇਆ ਹੈ, ਤਾਂ ਖ਼ਤਰਾ ਹੋਰ ਵੀ ਵੱਧ ਜਾਂਦਾ ਹੈ। ਕਈ ਵਾਰ ਮੋਟਾ ਕਵਰ ਅਤੇ ਉਸ ਦੇ ਅੰਦਰ ਰੱਖੀਆਂ ਚੀਜ਼ਾਂ ਫੋਨ ਦੀ ਗਰਮੀ ਨੂੰ ਬਾਹਰ ਨਹੀਂ ਨਿਕਲਣ ਦਿੰਦੀਆਂ, ਜਿਸ ਕਾਰਨ ਗਰਮੀ ਵੱਧ ਜਾਂਦੀ ਹੈ ਅਤੇ ਧਮਾਕੇ ਦਾ ਖ਼ਤਰਾ ਪੈਦਾ ਹੋ ਜਾਂਦਾ ਹੈ। ਇਸ ਦਾ ਨੈੱਟਵਰਕ ਅਤੇ ਚਾਰਜਿੰਗ ‘ਤੇ ਵੀ ਅਸਰ ਪੈਂਦਾ ਹੈ। ਫ਼ੋਨ ਦੇ ਕਵਰ ਵਿੱਚ ਪੈਸੇ ਜਾਂ ਕਾਰਡ ਰੱਖਣ ਨਾਲ ਨਾ ਸਿਰਫ਼ ਗਰਮ ਹੋਣ ਦਾ ਖ਼ਤਰਾ ਹੁੰਦਾ ਹੈ, ਸਗੋਂ ਇਹ ਫ਼ੋਨ ਦੀ ਸਿਗਨਲ ਫੜਨ ਦੀ ਸਮਰੱਥਾ ਨੂੰ ਵੀ ਪ੍ਰਭਾਵਿਤ ਕਰ ਸਕਦਾ ਹੈ।
