ਬਰਨਾਲੇ ‘ਚ ਸਿੱਖਿਆ ਕ੍ਰਾਂਤੀ ਨੂੰ ਸ਼ੀਸ਼ਾ ਦਿਖਾ ਰਹੇ ਨੇ ਦਸਵੀਂ ਤੇ ਬਾਰਵੀਂ ਦੇ ਨਤੀਜੇ
ਬਰਨਾਲਾ,18 ਮਈ,(ਨਿਰਮਲ ਸਿੰਘ ਪੰਡੋਰੀ)-
-ਪੰਜਾਬ ਸਕੂਲ ਸਿੱਖਿਆ ਬੋਰਡ ਦੀ ਬਾਰਵੀਂ ਕਲਾਸ ਦੇ ਨਤੀਜੇ ‘ਚ ਬਰਨਾਲਾ ਜ਼ਿਲ੍ਹੇ ਦੀ ਵਿਦਿਆਰਥਣ ਨੇ ਸੂਬੇ ਭਰ ‘ਚੋਂ ਪਹਿਲਾ ਸਥਾਨ ਪ੍ਰਾਪਤ ਕਰਕੇ ਜ਼ਿਲ੍ਹੇ ਦਾ ਨਾਮ ਰੌਸ਼ਨ ਕੀਤਾ ਪ੍ਰੰਤੂ ਦੂਜੇ ਪਾਸੇ ਜੇਕਰ ਬੋਰਡ ਵੱਲੋਂ ਜਾਰੀ ਕੀਤੀ ਜ਼ਿਲ੍ਹਿਆਂ ਦੀ “ਪਾਸ ਫੀਸਦੀ ਦਰ” ਉੱਪਰ ਨਜ਼ਰ ਮਾਰੀ ਜਾਵੇ ਤਾਂ ਬੋਰਡ ਦੀ ਇਹ ਸੂਚੀ ਹਰੇਕ ਬਰਨਾਲਾ ਵਾਸੀ ਲਈ ਨਮੋਸ਼ੀਜਨਕ ਹੈ। ਸਿੱਖਿਆ ਬੋਰਡ ਵੱਲੋਂ ਜਾਰੀ ਕੀਤੀ ਜ਼ਿਲ੍ਹਾਵਾਰ ਪਾਸ ਫੀਸਦੀ ਸੂਚੀ ਵਿੱਚ ਬਰਨਾਲਾ ਫਾਡੀ ਰਿਹਾ ਹੈ। ਵਿਦਿਆਰਥਣ ਹਰਸੀਰਤ ਕੌਰ ਦੀ ਬਦੌਲਤ ਬਰਨਾਲਾ ਜ਼ਿਲ੍ਹਾ ਵਿਅਕਤੀਗਤ ਤੌਰ ‘ਤੇ ਪਹਿਲੇ ਸਥਾਨ ‘ਤੇ ਰਿਹਾ ਪ੍ਰੰਤੂ ਓਵਰਆਲ ਸੂਬੇ ਦੀ ਪਾਸ ਫੀਸਦੀ ਦਰ ਵਿੱਚ ਵੀ ਬਰਨਾਲਾ ਹੇਠਾਂ ਤੋਂ ਪਹਿਲੇ ਸਥਾਨ ‘ਤੇ ਭਾਵ ਫਾਡੀ ਹੀ ਹੈ। ਜ਼ਿਲ੍ਹੇ ਦੀ ਇੱਕ ਵਿਦਿਆਰਥਣ ਦਾ ਸਮੁੱਚੇ ਪੰਜਾਬ ‘ਚੋਂ ਪਹਿਲੇ ਸਥਾਨ ‘ਤੇ ਆਉਣਾ ਮਾਣਮੱਤੀ ਪ੍ਰਾਪਤੀ ਹੈ ਪ੍ਰੰਤੂ ਜ਼ਿਲ੍ਹੇ ਦਾ ਬਾਕੀ ਜ਼ਿਲ੍ਹਿਆਂ ਤੋਂ ਫਾਡੀ ਰਹਿ ਜਾਣਾ ਵੱਡੇ ਸਵਾਲ ਖੜੇ ਕਰਦਾ ਹੈ। ਬਾਰਵੀਂ ਜਮਾਤ ਦੇ ਨਤੀਜੇ ਦੀ ਜ਼ਿਲ੍ਹਾਵਾਰ ਪਾਸ ਫੀਸਦੀ ਦਰ ਦੀ ਇਹ ਸੂਚੀ ਬਰਨਾਲਾ ‘ਚ ਸਿੱਖਿਆ ਕ੍ਰਾਂਤੀ ਨੂੰ ਵੀ ਸ਼ੀਸ਼ਾ ਦਿਖਾ ਰਹੀ ਹੈ, ਬਸ਼ਰਤੇ ਕੇ ਜ਼ਿਲ੍ਹੇ ਦੇ ਸੱਤਾਧਾਰੀ ਚੌਧਰੀਆਂ ਨੂੰ ਇਹ ਸ਼ੀਸ਼ਾ ਦੇਖਣ ਦੀ ਹਿੰਮਤ ਹੋਵੇ ਤਾਂ ਬਰਨਾਲਾ ਜ਼ਿਲ੍ਹੇ ਵਿੱਚ ਸਕੂਲਾਂ ਦਾ ਵਿਦਿਅਕ ਪੱਧਰ ਇਹਨਾਂ ਸਿਆਸੀ ਚੌਧਰੀਆਂ ਵੱਲੋਂ ਰੱਖੇ ਜਾ ਰਹੇ ਉਦਘਾਟਨੀ ਪੱਥਰਾਂ ਦੀ ਚਮਕ ਨੂੰ ਧੁੰਦਲਾ ਕਰ ਰਿਹਾ ਹੈ। ਸਿੱਖਿਆ ਬੋਰਡ ਵੱਲੋਂ ਜਾਰੀ ਕੀਤੀ ਜ਼ਿਲ੍ਹਾਵਾਰ ਪਾਸ ਫੀਸਦੀ ਸੂਚੀ ਅਨੁਸਾਰ ਬਰਨਾਲਾ ਜ਼ਿਲ੍ਹਾ ਪੰਜਾਬ ਵਿੱਚੋਂ 86.07 ਫੀਸਦੀ ਦਰ ਨਾਲ 23ਵੇਂ ਸਥਾਨ ‘ਤੇ ਰਿਹਾ ਹੈ, ਜਦ ਕਿ ਜ਼ਿਲ੍ਹਾ ਅੰਮ੍ਰਿਤਸਰ ਨੇ 96.29 ਫੀਸ ਦੀ ਦਰ ਨਾਲ ਪਹਿਲਾ ਸਥਾਨ ਪ੍ਰਾਪਤ ਕੀਤਾ ਹੈ। ਇੱਥੇ ਇਹ ਵੀ ਦੱਸ ਦੇਈਏ ਕਿ ਮੁੱਖ ਮੰਤਰੀ ਅਤੇ ਤਿੰਨ ਕੈਬਨਿਟ ਮੰਤਰੀਆਂ ਦਾ ਜ਼ਿਲ੍ਹਾ ਸੰਗਰੂਰ ਵੀ ਇਸ ਸੂਚੀ ਵਿੱਚ 22ਵੇਂ ਸਥਾਨ ‘ਤੇ ਹੈ। ਬਾਰਵੀਂ ਕਲਾਸ ਦੇ ਨਤੀਜੇ ਵਿੱਚ ਜਿਲੇਵਾਰ ਪਾਸ ਫੀਸਦੀ ਸੂਚੀ ਵਿੱਚ ਗੁਰਦਾਸਪੁਰ ਦੂਜੇ, ਪਠਾਨਕੋਟ ਤੀਜੇ, ਕਪੂਰਥਲਾ ਚੌਥੇ, ਫਰੀਦਕੋਟ 5ਵੇਂ, ਤਰਨਤਾਰਨ 6ਵੇਂ, ਐਸਬੀਐਸ ਨਗਰ 7ਵੇਂ, ਐਸ ਏ ਐਸ ਨਗਰ 8ਵੇਂ, ਹੁਸ਼ਿਆਰਪੁਰ 9ਵੇਂ, ਰੂਪਨਗਰ 10ਵੇਂ, ਫਿਰੋਜ਼ਪੁਰ 11ਵੇਂ, ਪਟਿਆਲਾ 12ਵੇਂ, ਫਤਿਹਗੜ੍ਹ ਸਾਹਿਬ 13ਵੇਂ, ਮਲੇਰਕੋਟਲਾ 14ਵੇਂ, ਮਾਨਸਾ 15ਵੇਂ, ਬਠਿੰਡਾ 16ਵੇਂ, ਜਲੰਧਰ 17ਵੇਂ, ਮੋਗਾ 18ਵੇਂ, ਸ੍ਰੀ ਮੁਕਤਸਰ ਸਾਹਿਬ 19ਵੇਂ, ਫਾਜ਼ਿਲਕਾ 20ਵੇਂ,ਅਤੇ ਲੁਧਿਆਣਾ 21ਵੇਂ ਸਥਾਨ ‘ਤੇ ਰਿਹਾ ਹੈ। ਦੂਜੇ ਪਾਸੇ ਦਸਵੀਂ ਕਲਾਸ ਦੇ ਨਤੀਜਿਆਂ ਵਿੱਚ ਵੀ ਬਰਨਾਲਾ ਦੀ ਸਥਿਤੀ ਬਹੁਤ ਹੀ ਚੰਗੀ ਨਹੀਂ ਹੈ। ਦਸਵੀਂ ਕਲਾਸ ਦੇ ਨਤੀਜਿਆਂ ਵਿੱਚ ਵੀ ਬਰਨਾਲਾ ਪੰਜਾਬ ਚੋਂ 20ਵੇਂ ਸਥਾਨ ‘ਤੇ ਰਿਹਾ ਹੈ। ਦਸਵੀਂ ਅਤੇ ਬਾਰਵੀਂ ਦੇ ਨਤੀਜੇ ‘ਚ ਸਾਰੇ ਜਿਲ੍ਹਿਆਂ ਵਿੱਚੋਂ ਫਾਡੀ ਆਉਣ ਦੀ ਇਹ ਖ਼ਬਰ ਬਰਨਾਲਾ ਦੇ ਸਿਆਸੀ ਚੌਧਰੀਆਂ ਨੂੰ ਸਿੱਖਿਆ ਕ੍ਰਾਂਤੀ ਦੇ ਜਸ਼ਨਾਂ ‘ਚੋਂ ਬਾਹਰ ਆਉਣ ਦਾ ਇੱਕ ਵੱਡਾ ਸੰਕੇਤ ਦੇ ਰਹੀ ਹੈ।
