ਬਰਨਾਲਾ, 30 ਜੂਨ ( ਨਿਰਮਲ ਸਿੰਘ ਪੰਡੋਰੀ )-
-ਦਿੱਲੀ ਜਾਂ ਹੋਰ ਰਾਜਾਂ ਤੋਂ ਚੋਰੀ ਕੀਤੀਆਂ ਜਾਂ ਡਿਫਾਲਟਰ ਗੱਡੀਆਂ/ਕਾਰਾਂ ਲਿਆ ਕੇ ਜਾਅਲੀ ਕਾਗਜ਼ ਤਿਆਰ ਕਰਕੇ ਵੇਚਣ ਵਾਲੇ ਇੱਕ ਗਿਰੋਹ ਨੂੰ ਬਰਨਾਲਾ ਦੇ ਸੀਆਈਏ ਸਟਾਫ਼ ਨੇ ਕਾਬੂ ਕੀਤਾ ਹੈ। ਇਸ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਪ੍ਰੈਸ ਕਾਨਫਰੰਸ ਦੌਰਾਨ ਸ੍ਰੀ ਅਸ਼ੋਕ ਕੁਮਾਰ ਐਸਪੀ ਨੇ ਦੱਸਿਆ ਕਿ ਸੀਆਈਏ ਇੰਚਾਰਜ ਇੰਸਪੈਕਟਰ ਬਲਜੀਤ ਸਿੰਘ ਨੇ ਮੁਖ਼ਬਰੀ ਦੇ ਆਧਾਰ ‘ਤੇ ਇੱਕ ਅਜਿਹੇ ਗਿਰੋਹ ਨੂੰ ਕਾਬੂ ਕੀਤਾ ਹੈ ਜੋ ਪੰਜਾਬ, ਦਿੱਲੀ ਜਾਂ ਹੋਰ ਬਾਹਰਲੇ ਰਾਜਾਂ ਤੋਂ ਕਾਰਾਂ/ਗੱਡੀਆਂ ਚੋਰੀ ਕਰਕੇ ਜਾਂ ਕਰਵਾ ਕੇ ਜਾਂ ਫੁੱਲ ਫਾਈਨਾਂਸ ਹੋਈਆਂ ਕਾਰਾਂ/ਗੱਡੀਆਂ, ਜਿਨਾਂ ਦੀਆਂ ਕਿਸ਼ਤਾਂ ਨਾ ਭਰੀਆਂ ਹੋਣ ਜਾਂ ਐਕਸੀਡੈਂਟ ਵਿੱਚ ਪੂਰੀ ਤਰ੍ਹਾਂ ਖ਼ਤਮ ਹੋਈਆਂ ਗੱਡੀਆਂ ਦੇ ਇੰਜਨ ਨੰਬਰ, ਅਸੀਂ ਨੰਬਰ ਤੇ ਟੈਂਪਰਿੰਗ ਕਰਕੇ ਅਤੇ ਜਾਅਲੀ ਫਰਜ਼ੀ ਐਨਓਸੀ ਤਿਆਰ ਕਰਕੇ ਗੱਡੀਆਂ ਕਾਰਾਂ ਦੇ ਬਿੱਲਾਂ ਵਿੱਚ ਚਾਸੀ ਨੰਬਰ, ਇੰਜਣ ਨੰਬਰ ਦੇ ਅੱਖਰਾਂ ਨੂੰ ਬਦਲ ਕੇ ਅਤੇ ਹੋਰ ਕਾਗ਼ਜ਼ਾਂ ਨਾਲ ਛੇੜਛਾੜ ਕਰਕੇ ਰਜਿਸਟਰੇਸ਼ਨ ਅਥਾਰਟੀ ਦੇ ਏਜੰਟਾਂ ਜਾਂ ਕਲਰਕਾਂ ਨਾਲ ਮਿਲੀ ਭੁਗਤ ਕਰਕੇ ਇਹਨਾਂ ਗੱਡੀਆਂ ਦੀਆਂ ਜਾਅਲੀ ਆਰਸੀਜ਼ ਤਿਆਰ ਕਰਵਾ ਕੇ ਨਵੇਂ ਫਰਜ਼ੀ ਤਿਆਰ ਕੀਤੇ ਐਡਰੈਸ ਲਿਖ ਕੇ ਭੋਲੇ ਭਾਲੇ ਲੋਕਾਂ ਨੂੰ ਮੋਟੀਆਂ ਰਕਮਾਂ ‘ਤੇ ਵੇਚ ਕੇ ਠੱਗੀਆਂ ਮਾਰਦੇ ਸਨ।
ਇਹ ਗਿਰੋਹ ਜਿੱਥੇ ਗੱਡੀਆਂ ਦੀਆਂ ਜਾਅਲੀ ਐਨਓਸੀ ਤਿਆਰ ਕਰਕੇ ਟੈਕਸ ਦੀਆਂ ਰਸੀਦਾਂ ਲਗਾ ਕੇ ਸਰਕਾਰ ਨੂੰ ਵੀ ਮੋਟਾ ਚੂਨਾ ਲਗਾਉਂਦੇ ਸਨ ਉੱਥੇ ਗੱਡੀਆਂ ਦੇ ਫਰਜ਼ੀ ਕਾਗਜ਼ ਲਗਾ ਕੇ ਬੈਂਕਾਂ ਤੋਂ ਲੋਨ ਵੀ ਕਰਵਾਉਂਦੇ ਸਨ। ਇਸ ਗਿਰੋਹ ਸਬੰਧੀ ਜਾਣਕਾਰੀ ਮਿਲਣ ਤੋਂ ਬਾਅਦ ਥਾਣਾ ਧਨੌਲਾ ਵਿਖੇ ਮੁਕੱਦਮਾ ਨੰਬਰ 38 ਮਿਤੀ 17 ਜੂਨ 2025 ਵੱਖ-ਵੱਖ ਧਾਰਾਵਾਂ ਤਹਿਤ ਦਰਜ ਕੀਤਾ ਅਤੇ ਇੰਸਪੈਕਟਰ ਬਲਜੀਤ ਸਿੰਘ ਦੀ ਟੀਮ ਨੇ ਉਮੇਸ਼ ਕੁਮਾਰ ਪੁੱਤਰ ਜਬਰ ਸਿੰਘ ਵਾਸੀ ਸੇਖਾ ਰੋਡ ਬਰਨਾਲਾ ਅਤੇ ਜਸ਼ਨਪ੍ਰੀਤ ਸਿੰਘ ਪੁੱਤਰ ਦਰਸ਼ਨ ਸਿੰਘ ਵਾਸੀ ਗੁਰਸੇਵਕ ਨਗਰ ਧਨੌਲਾ ਰੋਡ ਬਰਨਾਲਾ ਅਤੇ ਇਹਨਾਂ ਦੇ ਸਾਥੀਆਂ ਪ੍ਰਵੀਨ, ਸ਼ਨੀ,ਸੰਦੀਪ ਨੂੰ ਕਾਬੂ ਕੀਤਾ। ਇਸ ਗਿਰੋਹ ਕੋਲੋਂ ਪੁਲਿਸ ਨੇ ਇੱਕ ਜੈਨ ਕਾਰ, ਇੱਕ ਥਾਰ ਗੱਡੀ, ਤਿੰਨ ਕਰੇਟਾ ਕਾਰਾਂ, ਇੱਕ ਵਰਨਾ ਕਾਰ ਅਤੇ ਦੋ ਫਾਰਚੂਨਰ ਗੱਡੀਆਂ ਬਰਾਮਦ ਕੀਤੀਆਂ। ਇਨਾਂ 8 ਗੱਡੀਆਂ ਦੀ ਕੀਮਤ ਲੱਗਭੱਗ ਇੱਕ ਕਰੋੜ ਦੱਸੀ ਜਾ ਰਹੀ ਹੈ। ਪੁਲਿਸ ਦੋਸ਼ੀਆਂ ਤੋਂ ਦੌਰਾਨੇ ਰਿਮਾਂਡ ਪੁੱਛ ਕਰ ਰਹੀ ਹੈ ਜਿਸ ਦੇ ਆਧਾਰ ‘ਤੇ ਹੋਰ ਅਹਿਮ ਖੁਲਾਸੇ ਹੋਣ ਦੀ ਸੰਭਾਵਨਾ ਵੀ ਹੈ।
ਫੋਟੋ ਕੈਪਸ਼ਨ- ਪੁਲਿਸ ਵੱਲੋਂ ਗਿਰੋਹ ਤੋਂ ਬਰਾਮਦ ਕੀਤੀਆਂ ਗੱਡੀਆਂ
