–ਹੰਡਿਆਇਆ ਮੰਡੀ ’ਚੋਂ ਲਗਾਤਾਰ ਦੋ ਰਾਤਾਂ ਚੋਰਾਂ ਨੇ ਕੀਤੇ ਝੋਨੇ ਦੇ ਗੱਟੇ ਚੋਰੀ
— ਮੰਤਰੀ ਜੀ ਨੇ ਅਧਿਕਾਰੀਆਂ ਨੂੰ ਕਿਹਾ ਕਿ ਧਿਆਨ ਰੱਖੋ ਪਰ .. ..!
ਬਰਨਾਲਾ, 15 ਅਕਤੂਬਰ (ਨਿਰਮਲ ਸਿੰਘ ਪੰਡੋਰੀ) :
ਅਨਾਜ ਮੰਡੀਆਂ ’ਚੋਂ ਰਾਤ ਸਮੇਂ ਝੋਨੇ ਦੇ ਗੱਟੇ ਚੋਰੀ ਹੋਣ ਦੀਆਂ ਘਟਨਾਵਾਂ ਨੇ ਵਪਾਰੀਆਂ ਦੇ ਨੱਕ ’ਚ ਦਮ ਕੀਤਾ ਹੋਇਆ ਹੈ। 11 ਅਕਤੂਬਰ ਅਨਾਜ ਮੰਡੀ ਬਰਨਾਲਾ ’ਚ ਪੁੱਜੇ ਕੈਬਨਿਟ ਮੰਤਰੀ ਸ੍ਰੀ ਲਾਲ ਚੰਦ ਕਟਾਰੂਚੱਕ ਦੇ ਧਿਆਨ ਵਿੱਚ ਵੀ ਮੰਡੀ ਦੇ ਮਜ਼ਦੂਰਾਂ ਨੇ ਚੋਰੀ ਸੰਬੰਧੀ ਸਮੱਸਿਆ ਲਿਆਂਦੀ ਪ੍ਰੰਤੂ ਇਸ ਦੇ ਬਾਵਜੂਦ ਵੀ ਮੰਡੀਆਂ ਵਿੱਚੋਂ ਝੋਨੇ ਦੇ ਗੱਟੇ ਚੋਰੀ ਹੋਣ ਦੀਆਂ ਘਟਨਾਵਾਂ ਬਾਦਸਤੂਰ ਜਾਰੀ ਹਨ। ਕੈਬਨਿਟ ਮੰਤਰੀ ਨੇ ਮੌਕੇ ’ਤੇ ਹਾਜ਼ਰ ਡਿਪਟੀ ਕਮਿਸ਼ਨਰ ਅਤੇ ਉੱਚ ਪੁਲਿਸ ਅਧਿਕਾਰੀਆਂ ਨੂੰ ਰਾਤ ਸਮੇਂ ਮੰਡੀਆਂ ਦੇ ਆਸ-ਪਾਸ ਗਸ਼ਤ ਵਧਾਉਣ ਦੇ ਹੁਕਮ ਵੀ ਦਿੱਤੇ ਪ੍ਰੰਤੂ ਪਰਨਾਲਾ ਉੱਥੇ ਦਾ ਉੱਥੇ ਹੀ ਹੈ। ਹੰਡਿਆਇਆ ਅਨਾਜ ਮੰਡੀ ਵਿੱਚ ਵੀ ਝੋਨੇ ਦੀ ਚੋਰੀ ਦੀਆਂ ਘਟਨਾਵਾਂ ਨੇ ਵਪਾਰੀਆਂ ਨੂੰ ਪ੍ਰੇਸ਼ਾਨ ਕੀਤਾ ਹੋਇਆ ਹੈ। ਇਸ ਸੰਬੰਧੀ ਗੱਲਬਾਤ ਕਰਦੇ ਹੋਏ ਵਪਾਰੀ ਰਵੀ ਕੁਮਾਰ ਨੇ ਦੱਸਿਆ ਕਿ 12 ਅਕਤੂਬਰ ਦੀ ਰਾਤ ਨੂੰ ਉਨ੍ਹਾਂ ਦੇ ਫੜ ’ਚੋਂ 12 ਗੱਟੇ ਚੋਰੀ ਹੋਏ ਅਤੇ 13 ਅਕਤੂਬਰ ਦੀ ਰਾਤ ਨੂੰ ਅਸ਼ਵਨੀ ਕੁਮਾਰ ਦੇ ਫੜ ’ਚੋਂ 28 ਗੱਟੇ ਚੋਰੀ ਹੋਏ ਅਤੇ 14 ਅਕਤੂਬਰ ਦੀ ਰਾਤ ਵੀ ਚੋਰ ਆਏ ਪੰਤੂ ਮਜ਼ਦੂਰਾਂ ਨੂੰ ਪਤਾ ਲੱਗਣ ’ਤੇ ਭੱਜ ਗਏ। ਉਨ੍ਹਾਂ ਕਿਹਾ ਕਿ ਚੋਰ ਰਾਤ ਸਮੇਂ ਕਰੀਬ 2 ਵਜੇ ਤੋਂ ਬਾਅਦ ਚੋਰੀ ਕਰਦੇ ਹਨ ਜਿਸ ਵੇਲੇ ਮਜ਼ਦੂਰ ਥੱਕ ਹਾਰ ਕੇ ਸੌਂ ਜਾਂਦੇ ਹਨ। ਇੱਕ ਪਾਸੇ ਚੋਰਾਂ ਨੇ ਵਪਾਰੀਆਂ ਦਾ ਲੱਕ ਤੋੜਿਆ ਹੋਇਆ ਹੈ ਦੂਜੇ ਪਾਸੇ ਪੁਲਿਸ ਵਪਾਰੀਆਂ ਦੀ ਗੱਲ ਨਹੀਂ ਸੁਣ ਰਹੀ। ਰਵੀ ਕੁਮਾਰ ਨੇ ਦੱਸਿਆ ਕਿ ਜਦ ਝੋਨੇ ਦੀ ਚੋਰੀ ਸੰਬੰਧੀ ਪੁਲਿਸ ਚੌਂਕੀ ਹੰਡਿਆਇਆ ਵਿਖੇ ਇਤਲਾਹ ਦੇਣ ਗਏ ਤਾਂ ਪੁਲਿਸ ਕਰਮਚਾਰੀਆਂ ਨੇ ਰਿਪੋਰਟ ਲਿਖਣ ਦੇ ਬਜਾਏ ਕਿਹਾ ਕਿ ਪਹਿਲਾਂ ਚੋਰਾਂ ਦੇ ਨਾਮ ਦੱਸੋ। ਰਵੀ ਕੁਮਾਰ ਨੇ ਦੱਸਿਆ ਕਿ ਆਲਟੋ ਗੱਡੀ ਵਿੱਚੋਂ ਉੱਤਰਦੇ ਹੋਏ ਬੰਦਿਆਂ ਦੀ ਸੀਸੀਟੀਵੀ ਫੁਟੇਜ਼ ਵੀ ਪੁਲਿਸ ਨੂੰ ਦਿੱਤੀ ਹੈ ਪ੍ਰੰਤੂ ਫਿਰ ਵੀ ਪੁਲਿਸ ਰਿਪੋਰਟ ਦਰਜ ਕਰਨ ਤੋਂ ਆਨਾਕਾਨੀ ਕਰ ਰਹੀ ਹੈ। ਸਵਾਲ ਉਠਦੇ ਹਨ ਕਿ ਕੈਬਨਿਟ ਮੰਤਰੀ ਵੱਲੋਂ ਡਿਪਟੀ ਕਮਿਸ਼ਨਰ, ਐਸਪੀਡੀ ਅਤੇ ਜ਼ਿਲਾ ਮੰਡੀ ਅਫ਼ਸਰ ਨੂੰ ਆਹਮੋ-ਸਾਹਮਣੇ ਆਮ ਲੋਕਾਂ ਤੇ ਪੱਤਰਕਾਰਾਂ ਦੀ ਹਾਜ਼ਰੀ ’ਚ ਮੰਡੀਆਂ ’ਚ ਹੋ ਰਹੀ ਚੋਰੀ ਸੰਬੰਧੀ ਸਖ਼ਤ ਕਦਮ ਚੁੱਕਣ ਦੀ ਹਦਾਇਤ ਦਿੱਤੀ ਪ੍ਰੰਤੂ ਫਿਰ ਵੀ ਅਧਿਕਾਰੀਆਂ ਦੇ ਕੰਨ ’ਤੇ ਜੂੰਅ ਤੱਕ ਨਹੀਂ ਸਰਕੀ ਅਤੇ ਝੋਨਾ ਚੋਰ ਪੂਰੀ ਮੌਜ ਮਸਤੀ ਨਾਲ ਬਿਨ੍ਹਾਂ ਕਿਸੇ ਡਰ ਭੈਅ ਤੋਂ ਵਪਾਰੀਆਂ ਦੀਆਂ ਜ਼ੇਬਾਂ ਕੱਟ ਰਹੇ ਹਨ ਹੈਰਾਨੀ ਇਸ ਗੱਲ ਦੀ ਵੀ ਹੈ ਥਾਂ-ਥਾਂ ’ਤੇ ਸੀਸੀਟੀਵੀ ਕੈਮਰੇ ਲੱਗੇ ਹੋਣ ਦੇ ਬਾਵਜੂਦ ਵੀ ਪੁਲਿਸ ਚੌਂਕੀ ਹੰਡਿਆਇਆ ਦੇ ਮੁਲਾਜ਼ਮ ਚੋਰੀ ਦਾ ਸ਼ਿਕਾਰ ਵਪਾਰੀਆਂ ਤੋਂ ਚੋਰਾਂ ਦੇ ਨਾਮ ਪੁੱਛ ਰਹੇ ਹਨ ਅਤੇ ਮੁੱਢਲੀ ਰਿਪੋਰਟ ਤੱਕ ਵੀ ਦਰਜ ਨਹੀਂ ਕਰ ਰਹੇ। ਇਸ ਸੰਬੰਧੀ ਜਦ ਚੌਕੀ ਇੰਚਾਰਜ ਸਰਬਜੀਤ ਸਿੰਘ ਨਾਲ ਗੱਲ ਕੀਤੀ ਤਾਂ ਉਨਾਂ ਕਿਹਾ ਕਿ ਸੀਸੀਟੀਵੀ ਕੈਮਰਿਆਂ ਦੀ ਫੁਟੇਜ਼ ਚੈੱਕ ਕੀਤੀ ਜਾ ਰਹੀ ਹੈ, ਜਿਸ ਤਰਾਂ ਵੀ ਫੀਡ ਬੈਕ ਮਿਲੇਗੀ ਉਸ ਦੇ ਆਧਾਰ ’ਤੇ ਚੋਰਾਂ ਦੀ ਸਨਾਖ਼ਤ ਕਰਕੇ ਪੁਲਿਸ ਕਾਰਵਾਈ ਕੀਤੀ ਜਾਵੇਗੀ।
